காலை வேளையில் நாம் கண்விழிக்கும் போது கேட்கும் முதல் ஒலி, பறவைகளின் இனிமையான கீச் கீச் சத்தம்தான். வீட்டு மொட்டை மாடியில் இருந்து வரும் குருவியின் சின்னச் சின்ன குரல்கள் முதல், காட்டுப் பகுதிகளில் கேட்கும் பல்வேறு வகை பறவைகளின் இசை வரையிலும், பறவைகள் தங்கள் ஒலியால் நம்மை மகிழ்விப்பதுடன், இயற்கையின் அழகை நமக்கு உணர்த்துகின்றன. ஆனால், ஏன் பறவைகள் குறிப்பாக காலை வேளையில் இவ்வளவு சத்தமாகப் பாடுகின்றன? 

பறவைகள் பல்வேறு காரணங்களுக்காக ஒலி எழுப்புகின்றன. குறிப்பாக, இணை தேடுவதே பறவைகள் ஒலி எழுப்புவதற்கு முதன்மையான காரணம். இனப்பெருக்க காலத்தில், ஆண் பறவைகள் தங்கள் இனத்தைச் சேர்ந்த பெண் பறவைகளைக் கவரும் பொருட்டு மிகவும் இனிமையான ஒலிகளை எழுப்புகின்றன. ஒவ்வொரு இனப் பறவையும் தனித்துவமான ஒலிகளை உருவாக்கி, தங்கள் இனத்தைச் சேர்ந்த பெண் பறவைகளை அடையாளம் காண உதவுகின்றன.

தங்களது வாழிடத்தை மற்ற பறவைகளிடம் இருந்து பாதுகாத்துக்கொள்ள, ஆண் பறவைகள் தங்கள் பகுதியை குறித்த செய்தியை ஒலியின் மூலம் பரப்புகின்றன. இதன் மூலம் மற்ற ஆண் பறவைகள் தங்கள் பகுதிக்குள் நுழையாமல் தடுக்கப்படுகின்றன.

சில பறவை இனங்கள் கூட்டமாக வாழ்கின்றன. இந்த கூட்டத்தை ஒன்று சேர்த்து வைக்கவும், ஒன்றாக இரை தேட செல்லவும் பறவைகள் ஒலிகளைப் பயன்படுத்துகின்றன. எதிரிகள் தாக்கும் போது அல்லது வேறு ஏதாவது ஆபத்து ஏற்படும் போது, பறவைகள் ஒலியின் மூலம் ஒருவருக்கொருவர் எச்சரிக்கை செய்து கொள்கின்றன.

காலை வேளையில் ஏன் அதிகமாகக் கத்துகின்றன?

இரவு முழுவதும் ஓய்வெடுத்து, காலை எழுந்ததும் பறவைகளின் உடல் மற்றும் மனம் புத்துணர்ச்சியுடன் இருக்கும். இந்த புத்துணர்ச்சியை வெளிப்படுத்தும் ஒரு வழியாக ஒலி எழுப்புவது அமைகிறது.‌ மேலும், காலை வேளையில் இரை தேட செல்லும் போது, மற்ற பறவைகளுடன் தொடர்பு கொள்ளவும், தங்கள் பகுதியை குறித்த செய்தியை பரப்பவும் பறவைகள் சத்தம் போடுகின்றன.

காலை வெளிச்சம் பறவைகளின் உடலில் உள்ள ஒரு குறிப்பிட்ட சுரப்பியைத் தூண்டி, ஒலி எழுப்புவதற்கான உந்துதலை ஏற்படுத்துகிறது. காலை வேளையில் வெப்பநிலை குறைவாக இருக்கும். இந்த குளிர்ச்சியான சூழலில், பறவைகளின் குரல் எதிரொலித்து, அதிக தூரம் கேட்கும்.

பறவைகளின் ஒலிகளின் தனித்துவம்: 

ஒவ்வொரு பறவை இனமும் தனித்துவமான ஒலிகளை உருவாக்குகின்றன. இந்த ஒலிகள் அவற்றின் உடல் அமைப்பு, வாழும் சூழல் மற்றும் இனப்பெருக்க நடத்தை ஆகியவற்றைப் பொறுத்து மாறுபடும். சில பறவைகள் சிட்டுக்குருவி போல சின்னச் சின்ன குரல்களில் பாடினால், சில பறவைகள் குயில் போல நீண்ட இனிமையான ஒலிகளை எழுப்புகின்றன.

பறவைகளின் இனிமையான இசை நமக்கு மகிழ்ச்சியைத் தருவதோடு, இயற்கையின் அழகையும் உணர்த்துகிறது. எனவே, பறவைகளின் இனிமையான சத்தத்தை இரைச்சலாகப் பார்க்காமல் அதை ரசிக்கக் கற்றுக் கொள்ளுங்கள்.