உலகெங்கிலும் உள்ள சமத்துவம் மற்றும் பன்முகத்தன்மையை ஊக்குவிக்கும் முயற்சியில் ஐக்கிய நாடுகள் சபையால் 1996ல் சர்வதேச சகிப்புத்தன்மை தினம் அறிமுகப்படுத்தப்பட்டது. சகிப்புத்தன்மை என்பது உலகின் கலாசாரங்களின் பன்முகத்தன்மை மற்றும் அனைத்து மக்களுக்குமான மரியாதை, பாராட்டு மற்றும் ஏற்றுக்கொள்ளல் போன்றவற்றைக் குறிக்கிறது.

சகிப்புத்தன்மையின் சிறப்பியல்புகள்:

பன்முகத்தன்மை: சகிப்புத்தன்மை என்பது அடிப்படை மனித உரிமை. இது தனிநபர்கள் மட்டுமல்ல, குழுக்கள் மற்றும் மாநிலங்களாலும் நடைமுறைப்படுத்தப்பட வேண்டும். இது இனம், மதம், பாலினம் அல்லது பாலியல் போன்ற வேறுபாடுகளை பொருட்படுத்தாமல் தனி நபர்கள் அல்லது குழுக்களை அங்கீகரிப்பது, மதிப்பது மற்றும் ஏற்றுக்கொள்வது. சகிப்புத்தன்மையின் நன்மைகள் பன்முகத்தன்மை கொண்டவை. இவை தனிப்பட்ட மற்றும் சமூக நிலைகளில் ஆழமான தாக்கத்தை ஏற்படுத்துகின்றன.

சமூக ஒருங்கிணைப்பு: பல்வேறு குழுக்கள் இடையே புரிந்துணர்வையும் ஏற்றுக்கொள்ளலையும் ஊக்குவிப்பதன் மூலம் சமூக உணர்வை வளர்க்கிறது. வெவ்வேறு பின்னணியில் உள்ளவர்கள் நேர்மறையாக பழகும்போது அது நம்பிக்கையை வளர்க்கிறது, சமூகப் பிளவுகளை குறைக்கிறது. பல கலாசார சமூகங்களில் சமூக ஒற்றுமை முக்கியமானது. அப்போதுதான் அங்கு அமைதியும் இணக்கமும் நிலவும். சமூக ஒருங்கிணைப்பு மோதல்களையும் பதற்றங்களையும் கணிசமாகக் குறைக்கும்.

கலாசாரப் பரிமாற்றம்: ஒரு சகிப்புத்தன்மையுள்ள சமூகம் பல்வேறு கண்ணோட்டங்கள் மற்றும் மரபுகளுக்கு செவி சாய்க்கும். இது கலாசார பரிமாற்றத்தை மேம்படுத்துகிறது. பல்வேறு பழக்க வழக்கங்கள், கருத்துக்கள் மற்றும் கலை வெளிப்பாடுகள் செழிக்கக்கூடிய ஒரு துடிப்பான சமூக வாழ்க்கைக்கு இது பங்களிக்கிறது. இந்தக் கலாசார பன்முகத்தன்மை கலை, வணிகம் மற்றும் அறிவியல் உள்ளிட்ட பல்வேறு துறைகளில் புதுமை மற்றும் படைப்பாற்றலுக்கு வழிவகுக்கிறது.

தனிப்பட்ட நல்வாழ்வு: சகிப்புத்தன்மை உள்ள சூழலில் வாழ்வது மன மற்றும் உணர்ச்சி நல்வாழ்வை மேம்படுத்துகிறது. ஏற்றுக் கொள்ளப்பட்ட மற்றும் மதிப்பு மிக்கதாக உணரும் நபர்கள், மன அழுத்தம், பதற்றம் மற்றும் மனச்சோர்வை அனுபவிப்பது குறைவாக இருக்கும். மேலும், அவர்கள் சமூக நடவடிக்கைகளில் ஈடுபடுவதற்கும் ஒருவரை ஒருவர் ஆதரிப்பதற்குமான அதிக வாய்ப்புகள் உருவாகும்.

ஆரோக்கியமான ஜனநாயகம்: ஆரோக்கியமான ஜனநாயகத்தின் செயல்பாட்டிற்கு சகிப்புத்தன்மை இன்றியமையாதது. மனித உரிமைகளைப் பாதுகாப்பதற்கும் சிறுபான்மையினரின் குரல்கள் கேட்கப்படுவதையும் பரிசீலிக்கப்படுவதையும் உறுதி செய்யும் வாய்ப்புகள் அதிகரிக்கும். சமூக நீதிக்கு இது மிகவும் இன்றியமையாதது.

கல்விப் பயன்கள்: சகிப்புத்தன்மை கல்வி அமைப்புகளில் விமர்சன சிந்தனை மற்றும் பச்சாதாபத்தை ஊக்குவிக்கிறது. மாணவர்கள் வேறுபாடுகளை பாராட்டவும் திறமையான தொடர்பு மற்றும் ஒத்துழைப்புக்கான திறன்களை வளர்த்துக் கொள்ளவும் கற்றுக் கொள்கிறார்கள். பன்முக கலாசார சூழல்கள் நிறைந்த உலகமயமாக்கப்பட்ட உலகத்திற்கு அவர்களை இது தயார்படுத்துகிறது.

உலகளாவிய அமைதி: சகிப்புத்தன்மை சர்வதேச அமைதிக்கு பங்களிக்கிறது. சகிப்புத்தன்மையை ஏற்றுக்கொள்ளும் நாடுகள் பரஸ்பரம் மரியாதையின் அடிப்படையில் ராஜதந்திர உறவுகளில் ஈடுபட அதிக வாய்ப்பு உள்ளது. மகாத்மா காந்தி, மார்ட்டின் லூதர் கிங், பராக் ஒபாமா போன்றவர்கள் தனது சகிப்புத்தன்மை கொண்ட குணத்தால் தங்கள் நாடுகளில் பலவிதமான அரசியல் மாற்றங்களை ஏற்படுத்தியவர்கள் என்பது குறிப்பிடத்தக்கது.

மகாத்மா காந்தி அகிம்சை மற்றும் கீழ்ப்படியாமை போன்ற கொள்கைகளுடன் அநீதியை எதிர்த்து, இந்தியாவில் சமூக மாற்றம் மற்றும் நல்லிணக்கத்தை அடைவதற்கான வழிமுறையாக சகிப்புத்தன்மையை ஊக்குவித்தார். இதேபோல், நெல்சன் மண்டேலா தென்னாப்பிரிக்காவில் நல்லிணக்கம் மற்றும் ஒற்றுமைக்காக வாதிட்டார். இனப் பிளவுகளைக் கடந்து ஒரு ஜனநாயக சமுதாயத்தை உருவாக்க சகிப்புத்தன்மையின் முக்கியத்துவத்தை வலியுறுத்தினார். அவர்களின் மரபுகள், சகிப்புத்தன்மை எவ்வாறு சமூக இயக்கங்களை மாற்றியமைத்து நீடித்த அமைதிக்கு வழிவகுக்கும் என்பதை எடுத்துக்காட்டுகிறது.