லடாக்கில் மூன்றாம் நாள் சுற்றுலாவினைத் துவங்கும் முன்னால், சில புவியியல் குறிப்புகளைத் தெரிந்து கொள்வோம். 

Mountain Pass – கணவாய்  என்பது பெரிய கடினமான மலைகளில் பயணம் செல்ல இயற்கையே அமைத்திருக்கும் வழி ஆகும். லடாக்குக்கே 'கணவாய்களின் பூமி' என்று தான் அடைமொழி கொடுக்கப்பட்டிருக்கிறது. அத்தனை தூரம் சென்றுவிட்டுக் கணவாய்களைப் பார்க்காமல் வருவதா..?

மூன்றாம் நாள் ஒரு சாகசப் பயணமாக இருக்கும்.‌ ஜெர்க்கின் வகையறாக்களை மூட்டை கட்டிக்கொண்டு லேவில் இருந்து வடக்கு நோக்கி இமயத்தில் பயணம் துவங்கவேண்டியது தான். சென்ற இரு தினங்களை விட 'நாம் இமயத்துக்கு வந்திருக்கிறோம்' என்ற feel இந்த மூன்றாம் நாள் பயணத்தில் தான் கிடைக்கும். 

லடாக் வந்து நான்கு நாட்கள் அகிவிட்டபடியால் உடல் ஓரளவுக்கு இந்த உயரத்துக்கும் காலநிலைக்கும் பிராணவாயு செறிவுக்கும் பழகியிருக்கும் என்ற நம்பிக்கையோடு நான்கு சக்கர மோட்டார் வாகனம் மூலம் பயணித்து, உலகத்தின் முதலாவது உயரமான இடத்தை நோக்கிப் போகலாமா..

கார்துங்லா கணவாய்..

கடல்மட்டத்தில் இருந்து சரியாக 17,982 அடி உயரத்தில் இருக்கிறது இந்த Kardungla Pass. செல்லும் வழியில் வழவழ சாலைகளை எதிர்பார்ப்பதற்கில்லை. எல்லைச் சாலைகள் அமைப்பினர் (Border Roads Organization) சாலைகள் போட்டுக்கொண்டிருக்கிறார்கள்.‌ இமயத்தில் சாலை போடுவதென்ன சாதாரண காரியமா.. ஆங்காங்கே சாலை போடும் பணியாளர்களையும், கனரக வாகனங்களையும் காண‌ முடிகிறது. சுமார் இரண்டு மணி நேர‌ப் பயணம் நம்மைத் தெற்கு புல்லூ என்ற இடத்தில் கொண்டு விடுகிறது. இது கடல் மட்டத்திலிருந்து 16000 அடி உயரத்தில் உள்ள ஒரு இராணுவ Base Camp. இங்கே இறங்கி ஒரு சின்ன break எடுத்துக்கொண்டு மீண்டும் அரைகுறை சாலையில் முக்கால் மணி நேரம்  பயணம் செய்தால் கடல்மட்டத்தில் இருந்து 17982அடி உயரத்தில் அமைந்துள்ள கார்துங்லா கணவாயினை அடைந்துவிடலாம்.  

கண்ணங்கரேல் என்று இருப்பதால் இந்த இமயத்துக்கு  இப்பெயர் வைத்துள்ளார்களாம். மலைத்தொடரில் பயணிக்க இயற்கையாகவே உருவான ‌ வழியாகிய இந்த கார்துங்லா கணவாய் சிந்து - ஷயோக் ஆகிய இரு ஆறுகளின் சமவெளிகளை இணைத்து வைக்கும் இமயத்தின் முக்கியமான கணவாய் ஆகும். இதுவே நூப்ரா பள்ளத்தாக்கின் ஆரம்பம். இங்கிருந்து  90கி.மீட்டர் தொலைவில் உலகத்தின் உயரமான இராணுவ  இருப்புத்தளமாகிய சியாச்சின் பனிப்பாறை அமைந்துள்ளது. உலகின் மூன்றாம் துருவம் எனப்படும் இந்த சியாச்சின் பனிப்பாறை, இந்திய துணைக்கண்டத்தின் நிலத்தட்டையும் ஐரோப்பிய கண்டத்தின் நிலத்தட்டையும் இணைக்கும் காரகோரம் மலைத்தொடரில் அமைந்துள்ள மிகப்பெரிய மிக நீளமான பனியாறு ஓடும் பகுதியாகும். நீண்ட காலமாக எல்லைத் தகறாறு நடக்கும்‌‌ பகுதி என்பதால் நம் இராணுவம் இங்கே அரணாய் நிறுத்தப்பட்டுள்ளது. இங்கே ‌பணிபுரிவது சாதாரண காரியம் இல்லை என்பதைச் ‌சொல்ல வேண்டுமா ‌என்ன? சியாச்சின் பகுதியில் பணியில் உள்ள நமது இராணுவ வீரர்களுக்கு வேண்டியவைகளை எடுத்துச் செல்லும்  இராணுவ கான்வாய்களை (convoy) வரும் வழியில் நிறையவே பார்க்கலாம். 

டுர்டுக் என்ற இந்தியாவின் கடைசி கிராமத்துக்கும் இந்த கணவாய் வழி தான் போக வேண்டும். 1999ல் நடந்த கார்கில் போரினை நாம் யாரும் மறந்திருக்க மாட்டோம். கார்கில் பகுதிக்கு நம் இராணுவ வீரர்கள் இந்த கார்துங்லா பாஸ் வழியாகத்தான் சென்றார்கள். இங்கிருந்து 250கிமீ தொலைவில்தான் பாகிஸ்தானுக்கு எதிராக இந்திய இராணுவம் நிகழ்த்திய Operation Vijay வெற்றிப்போர் நடந்த கார்கில் இருக்கிறது. 

இந்த கார்துங்லா பாஸ் பகுதியில் இறங்கியதும் சிலருக்குத் தலைசுற்றல், வயிறு வலி, வாந்தி, மூச்சுத்திணறல் ஏற்படலாம். நல்ல குளிர் நிலவும் பகுதி என்பதாலும் குறைந்த அளவு ஆக்சிஜன் உள்ள பகுதி என்பதாலும் ஐந்து நிமிடங்களுக்கு மேல் இங்கே நிற்க வேண்டாம் என்று எச்சரிக்கை பலகை வைத்திருக்கிறார்கள். நாம் வந்த வண்டியின் ஓட்டுநரும் ஐந்து நிமிடத்துக்கு மேல் நம்மை நிற்க விடக்கூடாது என்பதில் குறியாய்த்தான் இருப்பார். கறுத்துக் கிடக்கும் கார்துங்லா என்ற இமயத்தின் பனி மூடிய சிகரத்தைத் தரிசிக்கும் அந்த நொடி இயற்கையின் பிரம்மாண்டத்தின் முன்னால் மனித சக்தியெல்லாம் வெறும் தூசு தான் என்ற எண்ணத்தை நிச்சயமாகத் தோன்றவைத்துவிடுகிறது.

'Welcome to the top of the world' என்ற எல்லைச் சாலைகள் அமைப்பினர் வைத்துள்ள பலகை முன்னும், கார்துங்லா இமயச்சிகரத்தின் முன்னும், கணவாய்ச் சாலையிலும், சில புகைப்படங்களைச் சட்டென்று கிளுக்கிக் கொள்ள வேண்டியதுதான். “உங்களுக்கு இங்கே வந்திருப்பது ஒரு வாழ்நாள் சாகசம். ஆனால் எங்களுக்கு இதுவே அன்றாடம்..” என்ற நம் ராணுவத்தினரின் பலகை ஒன்றும் கண்ணைக் கவர்கிறது. நம்மையும் அறியாமல் கை சல்யூட் வைக்கிறது. 

சட்டென்று புகைப்படங்கள் எடுத்துக்கொண்டு கிளம்பிவிடவேண்டியது தான். வழியில் இமயத்து யாக் வகை மாடுகளைப் பார்த்தபடியே சர்சர் என்று கீழே இறங்கிவிட்டால் வழியில் மதிய உணவினை‌ முடித்துக்கொள்ள ஷயோக் நதிக்கரையில் நிறைய ஹோட்டல்கள் உள்ளன. சில ஹோட்டல்கள் River Rafting சாகச விளையாட்டும் தருகிறார்கள். Raftingல் பயிற்சி உள்ள நபர் நீங்கள் என்றால் கட்டுக்கடங்காமல் பாய்ந்தோடும் ஷயோக் நதி தீரத்தில் படகுடன் இறங்கி ஒரு கை பார்க்கலாம். Raftingஉம் பழக்கமில்லை நீச்சலும் தெரியாது என்றால் கரையோடு நின்று ரசித்துவிட்டு நகர்ந்துவிடுங்கள்.

அடுத்த இடம் திஸ்கித் புத்தவிகாரம். 180அடி பிரும்மாண்டமான மைத்ரேயர் சிலை இங்குள்ளது. திஸ்கித் கிராமத்தைப் பாதுகாக்கவும் போரில்லா உலகம் செய்யவும் இவ்விடம் அமர்ந்திருக்கிறார் இந்த வருங்கால புத்தர். 

அவரைத் தரிசித்துவிட்டுப் பயணம் தொடர்ந்து ஹண்டர் மணற்குன்றுகளை அடையலாம். ஹண்டர் கிராம மக்களின் வாழ்வாதாரமே இரட்டைத் திமில் கொண்ட புஸு புஸு ஒட்டகங்களை வளர்ப்பது தான். ஹண்டர் பள்ளத்தாக்கில் பாலைவனம் ஒன்று உள்ளது. இங்கே வெள்ளியைப் பொடியாக்கியது போல் காட்சிதரும் மணற்குன்றுகள் அத்தனை அழகு. இந்த Silver Sand Dunesல் ஒட்டகச் சவாரி செய்யலாம். தடவைக்குப் பத்து ஒட்டகங்களை ஒன்றுடன் ஒன்று கட்டி10 பேர்களை ஏற்றி அனுப்பிவிடுகிறார்கள். அது சுமார் ஒரு கிலோ மீட்டர் ஒய்யாரமாய் நம்மைச் சவாரி அழைத்துச்சென்று திரும்பிக் கொண்டு வந்துவிடுகிறது. அது‌ போக அம்பெறிதல், துப்பாக்கி சுடுதல் போன்ற நம்மூர் கண்காட்சி விளையாட்டுகளும்  வைத்திருக்கிறார்கள். இங்கே வந்து சேரும்போது ‌சூரிய அஸ்தமன நேரம் வந்துவிடும்.

சுற்றியுள்ள பலவண்ண இமயங்கள், அதன் ஊடே வீழும் சூரியன், அதனால் ஏற்பட்ட செவ்வானம், வெள்ளி மணல், இடையில் ஓடும் ஷயோக் நதியின்‌ சிறு கால்வாய் என்று இயற்கை அரசாட்சி செய்கிறது இங்கே. நேரம் போவதே தெரியாமல் ரசிக்கலாம். குளிரும் பாலைவன மணலில் அமர்ந்து கதைகள் பேசிக் களிக்கலாம்‌‌. ஒட்டகங்களோடு‌ selfie எடுக்கலாம். இருளத் துவங்கும் முன்பே புறப்பட்டு அடுத்த அரை மணியில் நூப்ரா பள்ளத்தாக்கினை அடையலாம். மூன்றாம் நாள் நூப்ரா பள்ளத்தாக்கிலேயே தங்கிக்கொள்ள வேண்டியது தான். 

உலகின் உயரமான Motorable Pointஆன கார்துங்லா பாஸ், ஷயோக் நதி, திஸ்கித் புத்த‌விகாரம், ஹண்டர் பாலைவனம் என்று மூன்றாம் நாள் ரோலர் கோஸ்டர் பயணமாக இருந்ததல்லவா...

தொடர்ந்து பயணிப்போம்...