நமது உடலின் மிகவும் இன்றியமையாத உறுப்பு கண். கண் இல்லாவிட்டால் நாம் உலகையே பார்க்க முடியாது; முக்கியமான வேலைகளையும் செய்ய முடியாது. ஊட்டச்சத்து குறைபாடு, முதுமை, மரபுவழி குறைபாடு காரணமாகக் கண்கள் பாதிக்கப்படுகின்றன.

1. பாதாம்: பாதாமில் வைட்டமின் ஈ அதிகமாக இருப்பதால் நோய் எதிர்ப்பு சக்தியை அதிகரிக்கச் செய்வதோடு கண் புரை உள்ளவர்களுக்கு பாதாம் செல் சேதத்தில் இருந்து பாதுகாக்கிறது. பாதாமில் உள்ள புரதம் திசுக்களை சரி செய்கிறது. மாங்கனிசு ஃப்ரீரேடிக்கல்களை எதிர்த்து கண்களில் ஏற்படும் வலியை குறைக்கிறது. பாஸ்பரஸ் நரம்பு ஆரோக்கியத்திற்கும் மங்கலான பார்வையை சரி செய்வதற்கும் உதவுகிறது.

2. கேரட்: கேரட்டில் உள்ள வைட்டமின் ஏ ஆரோக்கியமான பார்வைக்குத் தேவையான ஊட்டச்சத்துகளை அளிக்கிறது. கேரட்டில் உள்ள பீட்டா கரோட்டின் வைட்டமின் ஏ ஆக மாறி கண்களில் உள்ள மாகுலாவில் நிறமியின் அடர்த்தியை அதிகரிப்பதாகக் கண்டறியப்பட்டுள்ளது. இதனால் விழித்திரை சிறப்பாக பாதுகாக்கப்பட்டு, மாகுலர் சிதைவுக்கான ஆபத்தை குறைக்கிறது. கேரட்டை சமைத்து சாப்பிடுவதை விட பச்சையாய் சாப்பிடுவதே சிறந்தது. மேலும், இதை சாலட், ஜூஸாகவும் சாப்பிடலாம்.

3. பச்சை இலை காய்கறிகள்: பொதுவாக, பச்சை இலை காய்கறிகளில் வைட்டமின் ஏ, வைட்டமின் சி, லுடீன், நார்ச்சத்து, ஃபோலிக் அமிலம், வைட்டமின் கே, மெக்னீசியம், கால்சியம், இரும்பு மற்றும் பொட்டாசியம் போன்ற பல சத்துக்கள் நிறைந்துள்ளன. கண் சருமங்களில் உள்ள ஃப்ரீரேடிக்கல்களைத் தடுத்து செல் சேதத்திலிருந்து பாதுகாப்பதோடு கண்களில் ஏற்படும் சிதைவையும் தடுக்கிறது. கேல் கீரை, முட்டைக்கோஸ், கீரை, புரோக்கோலி ஆகியவை தவிர சீமை சுரைக்காய், மக்காச்சோளம், பட்டாணி போன்றவற்றையும் ஆரோக்கியமான கண் பார்வைக்கு எடுத்துக் கொள்ளலாம்.

4. சிட்ரஸ் பழங்கள்: சிட்ரஸ் பழங்களான ஆரஞ்சு, எலுமிச்சை, தக்காளி மற்றும் திராட்சைப் பழங்களில் கண்களுக்கு நன்மை பயக்கும் வைட்டமின் சி நிறைந்துள்ளது. இது நம் கண்களின் இரத்த நாளங்களுக்குள் இரத்த ஓட்டத்தை அதிகரிக்கச் செய்ய உதவும். அதேசமயம் தினசரி உணவில் சிட்ரஸ் பழங்களை சேர்த்துக் கொள்வதன் மூலம் பார்வையை உங்கள் வாழ்நாள் முழுவதும் தெளிவாகவும் ஆரோக்கியமாகவும் வைத்திருக்க முடியும். இது கண்ணில் ஏற்படும் அழற்சி, வீக்கம் உள்ளிட்ட பிரச்னைகளையும் சரி செய்கிறது.

5. முழு தானியங்கள்: முழு தானியங்களில் உள்ள வைட்டமின் ஈ, ஜிங்க் மற்றும் நியாசின், கண்புரை மற்றும் வயது தொடர்பான மாகுலர் டிஜெனரேஷன் அபாயத்தைக் குறைக்கிறது. முழு தானியங்கள் இரத்தத்தில் சர்க்கரை அளவு அதிகரிப்பதை குறைப்பதால் காலப்போக்கில் விழித்திரையை சேதமாவது தடுக்கப்படுகிறது. எனவே, குயினோவா, பழுப்பு அரிசி, ஓட்ஸ் மற்றும் முழு கோதுமை ரொட்டி போன்ற முழு தானியங்களை நாம் எடுத்துக் கொள்ளலாம்.

6. மீன்: குறைந்தபட்சம் வாரத்திற்கு இரண்டு முறை மீன் சாப்பிடுவது மிகவும் நல்லது. இது வயதாகும்போதுகூட உங்களுடைய கண்களில் உண்டாகும் பிரச்னைகளில் இருந்து காக்க உதவும். சிதைவைத் தடுக்க உதவுகிறது. டுனா, சால்மன், கானாங்கெளுத்தி, நெத்திலி, மத்தி போன்றவற்றை அதிகமாக எடுத்துக் கொள்ளலாம். ஒமேகா 3 கொழுப்பு அமிலங்களில் உள்ள இபிஏ மற்றும் டிஹெச்ஏ ஆகியவை உலர் கண்கள் தொடர்பான வீக்கத்தைக் கட்டுப்படுத்துவதில் மிகவும் முக்கியப் பங்கு வகிக்கிறது.

7. முட்டை: முட்டையிலுள்ள வைட்டமின் ஏ, லூடீன், ஜியாக்சாண்டின் மற்றும் ஜிங்க் சத்து ஆகியவை கண் ஆரோக்கியத்தைப் பாதுகாக்கின்றன. முட்டையின் வெள்ளைக் கருவில் உள்ள புரதத்தைப் போலவே மஞ்சள் கருவில் உள்ள கொலாஜன் கண்களுக்குக் கீழே உள்ள சுருக்கங்களைத் தடுக்க உதவுகிறது.