வங்கிக்கணக்கில் 10 லட்சம் டெபாசிட் செய்தால் ஐடி நோட்டீஸ் வருமா? வருமான வரித்துறையின் புதிய விதிகள்!

வங்கிக் கணக்கில் நாம் டெபாசிட் செய்யும் பணம் மற்றும் மேற்கொள்ளும் பணப்பரிவர்த்தனைகள் அனைத்தும் வருமான வரித்துறையின் கண்காணிப்பு வளையத்திற்குள் வரும். நிதியாண்டில் குறிப்பிட்ட வரம்பைத்தாண்டி ரொக்கமாக (Cash) டெபாசிட் செய்யும்போது, வங்கிகள் அந்தத் தகவலை வருமான வரித்துறைக்கு நிதிப் பரிவர்த்தனை அறிக்கையாக (Statement of Financial Transactions - SFT) (படிவம் 61A) அடுத்த ஆண்டு மே 31-க்குள் தாக்கல் செய்யும். அதன்படி வருமான வரித்துறை தனது நடவடிக்கைகளை மேற்கொள்ளும்.

எந்தெந்தப் பரிவர்த்தனைகள் வருமான வரித்துறைக்குச் செல்லும்?

வருமான வரிச் சட்டத்தின் கீழ், வங்கிகள் மற்றும் நிதி நிறுவனங்கள் வாடிக்கையாளர்களின் பெரிய அளவிலான பரிவர்த்தனை விவரங்களை வரித்துறைக்குக் கட்டாயம் தெரிவிக்க வேண்டும்.

சேமிப்புக் கணக்கு (Savings Account): ஒரு நிதியாண்டில் (ஏப்ரல் 1 முதல் மார்ச் 31 வரை) ஒருவரது சேமிப்புக் கணக்குகளில் (ஒன்று அல்லது அதற்கு மேற்பட்ட கணக்குகளைச் சேர்த்து) மொத்தமாக ₹10 லட்சம் அல்லது அதற்கு மேற்பட்ட தொகை ரொக்கமாக டெபாசிட் செய்யப்பட்டால் வங்கி அந்தத் தகவலைத் தெரிவிக்கும்.

நடப்புக் கணக்கு (Current Account): தொழில் அல்லது வியாபார நிமித்தமாகத் தொடங்கப்படும் நடப்புக் கணக்குகளில், ஒரு நிதியாண்டில் ₹50 லட்சம் அல்லது அதற்கு மேற்பட்ட தொகை ரொக்கமாக டெபாசிட் செய்யப்பட்டாலோ அல்லது எடுக்கப்பட்டாலோ (இரண்டையும் சேர்த்து) அது வரித்துறையின் கவனத்திற்குச் செல்லும்.

நிலையான வைப்பு நிதி (Fixed Deposit - FD): ஒரு நிதியாண்டில் அனைத்து நிலையான வைப்புகளையும் சேர்த்து ₹10 லட்சம் அல்லது அதற்கு மேற்பட்ட தொகையை எஃப்.டி-யில் (FD) முதலீடு செய்தால் (ரொக்கமாகவோ அல்லது காசோலை, ஆன்லைன் பரிமாற்றம் போன்ற ரொக்கமற்ற முறையிலோ) அந்த விவரமும் அறிக்கையிடப்படும். (பழைய எஃப்.டி-யைப் புதுப்பிப்பது இதில் சேராது.)

10 லட்சம் டெபாசிட் செய்தாலே நோட்டீஸ் வருமா?

பலருக்கும் இருக்கும் மிகப்பெரிய தவறான எண்ணம், "ரூ.10 லட்சம் டெபாசிட் செய்தாலே வருமான வரித்துறை நோட்டீஸ் அனுப்பிவிடும்" என்பதுதான்.

உண்மையில், 10 லட்சம் ரூபாய் டெபாசிட் செய்வது சட்டப்படி குற்றமோ அல்லது தடை செய்யப்பட்டதோ அல்ல.

வங்கிகள் வழங்கும் SFT அறிக்கையின் அடிப்படையில், இந்தப் பரிவர்த்தனை விவரங்கள் வருமான வரித்துறையின் ஆண்டுத் தகவல் அறிக்கையில் (Annual Information Statement - AIS) பதிவாகும். அதை ஆய்வு செய்து, வருமான வரித்துறை உங்கள் கணக்கைச் சரிபார்க்கும். நீங்கள் டெபாசிட் செய்த தொகைக்கான வருமான ஆதாரம் (Source of Income) உங்களிடம் தெளிவாக இருந்தால், பயப்படத் தேவையில்லை.

உதாரணத்திற்கு, நிலம் விற்பனை செய்த பணம், விவசாய வருமானம், முந்தைய சேமிப்பு அல்லது கடன் வாங்கிய தொகை போன்ற நியாயமான காரணங்கள் இருந்து, அதற்குரிய ஆவணங்கள் உங்களிடம் இருந்தால் எந்தப் பிரச்சினையும் இல்லை.

நோட்டீஸ் எப்போது அனுப்பப்படும்?

வருமான வரித்துறை எந்தச் சூழ்நிலைகளில் கேள்வி கேட்கும் அல்லது நோட்டீஸ் அனுப்பும்?

1. வருமானத்திற்கும் டெபாசிட்டிற்கும் உள்ள முரண்பாடு: நீங்கள் தாக்கல் செய்யும் வருமான வரி அறிக்கையில் (ITR) ஆண்டு வருமானம் ₹4 லட்சம் என்று காட்டிவிட்டு, வங்கிக் கணக்கில் ₹15 லட்சம் ரொக்கமாக டெபாசிட் செய்திருந்தால், இந்த முரண்பாடு கணினியால் கண்டறியப்பட்டு நோட்டீஸ் வரலாம்.

2. ITR தாக்கல் செய்யாதது: வங்கிக் கணக்கில் அதிக அளவில் ரொக்கப் பரிவர்த்தனைகள் நடந்து, ஆனால் நீங்கள் வருமான வரி அறிக்கையே தாக்கல் செய்யாமல் இருந்தால், வருமான ஆதாரத்தைக் கேட்டு வரித்துறை நோட்டீஸ் அனுப்பும்.

3. தகுந்த ஆதாரங்கள் இல்லாதது: டெபாசிட் செய்த பணத்திற்கான சரியான பில்கள், ஒப்பந்தப் பத்திரங்கள் அல்லது வரவு-செலவுக் கணக்குகள் உங்களிடம் இல்லை என்றால், அப்பணம் "விளக்கமளிக்கப்படாத வருமானம்" (Unexplained Income) எனக் கருதப்படலாம்.

TDS மற்றும் ரொக்கப் பரிவர்த்தனை விதிகள்

ரொக்கப் பரிவர்த்தனைகளைக் குறைக்கவும், கருப்புப் பணத்தைக் கட்டுப்படுத்தவும் வருமான வரிச் சட்டத்தில் பிரிவு 194N, பிரிவு 269ST ஆகிய முக்கிய விதிகள் அமலில் உள்ளன:

வங்கிக் கணக்கில் இருந்து பணம் எடுத்தல்: ஒரு நிதியாண்டில் ஒரு வங்கியில் உள்ள அனைத்துக் கணக்குகளிலிருந்தும் சேர்த்து ₹1 கோடிக்கு மேல் ரொக்கமாகப் பணம் எடுத்தால், அந்த வரம்புக்கு மேற்பட்ட தொகைக்கு 2% TDS பிடித்தம் செய்யப்படும்.

ITR தாக்கல் செய்யாதவர்களுக்கான விதி: ITR தாக்கல் செய்வதற்கான காலக்கெடு முடிந்த முந்தைய 3 ஆண்டுகளுக்கும் ஐடிஆர் தாக்கல் செய்யாதவர்கள் ஒரு நிதியாண்டில் ₹20 லட்சத்திற்கு மேல் ரொக்கமாகப் பணம் எடுத்தால் அதற்கு மேற்பட்ட தொகைக்கு 2% TDS-உம், ₹1 கோடிக்கு மேல் எடுத்தால் அதற்கு மேற்பட்ட தொகைக்கு 5% TDS-உம் பிடித்தம் செய்யப்படும். இந்த TDS இறுதி வரி அல்ல; ITR தாக்கலின்போது இதைக் கணக்கில் சரிசெய்துகொள்ளலாம்.

அதேபோல், ஒரே நாளில், ஒரே பரிவர்த்தனையில் அல்லது ஒரே நிகழ்வு தொடர்பாக ஒரு நபரிடம் இருந்து ₹2 லட்சம் அல்லது அதற்கு மேல் ரொக்கமாகப் பணம் பெறுவதும் வருமான வரிச் சட்டப் பிரிவு 269ST-ன் படி தடை செய்யப்பட்டுள்ளது. இதை மீறினால், பெற்ற தொகைக்கு இணையான அபராதம் (பிரிவு 271DA) பணம் பெற்றவருக்கு விதிக்கப்படும்.

கவனமாக இருக்கவேண்டிய நடைமுறைகள்

உங்கள் வங்கிப் பரிவர்த்தனைகள் வெளிப்படையாகவும் பாதுகாப்பாகவும் இருக்க சில வழிமுறைகளைப் பின்பற்றலாம்:

டிஜிட்டல் பரிவர்த்தனை: முடிந்தவரை ரொக்கப் பரிவர்த்தனைகளைத் தவிர்த்து UPI, NEFT, RTGS அல்லது காசோலை (Cheque) போன்ற டிஜிட்டல் அல்லது வங்கி வழி முறைகளைப் பயன்படுத்துவது நல்லது.

ஆவணங்களைப் பராமரித்தல்: பெரிய தொகைகளைக் கணக்கில் டெபாசிட் செய்யும்போது, அது நகை விற்ற பணமா, சொத்து விற்ற பணமா அல்லது தொழில் வரவா என்பதற்கான முறையான ஆதாரங்களை (Receipts/Agreements) பத்திரமாக வைத்துக்கொள்ள வேண்டும்.

வழக்கமான ITR தாக்கல்: உங்களின் மொத்த வருமானம் வரி விலக்கு வரம்பிற்குள் இருந்தாலும், பெரிய பரிவர்த்தனைகள் நடக்கும் பட்சத்தில் முறையான ITR தாக்கல் செய்வது எதிர்கால நோட்டீஸ்களில் இருந்து பாதுகாக்கும்.

உங்கள் வங்கிப் பரிவர்த்தனைகளுக்கான தகுந்த ஆதாரமும், சரியான வருமான வரித் தாக்கலும் இருக்கும் வரை, வங்கி கணக்கில் எவ்வளவு பணம் வந்தாலும் அச்சப்படத் தேவையில்லை.

பின்குறிப்புகள்:

1) 2026 ஏப்ரல் 1 முதல் புதிய வருமான வரிச் சட்டம், 2025 அமலுக்கு வந்துள்ளது. பிரிவு எண்கள் மாறியிருப்பதாகச் சில இணையதளங்கள் கூறுகின்றன (எ.கா., 269ST → பிரிவு 221).

2) இக்கட்டுரை கல்வி & / விழிப்புணர்வு நோக்கில் இணையத்தில் கிடைக்கும் தரவுகளின் அடிப்படையில் எழுதப்பட்டது. எனவே தகவல்களில் சிறு தவறுகள் ஏதேனும் இருக்கக்கூடும். நம்பகமான

தகவல்களுக்கு வருமான வரித்துறை அல்லது ஆடிட்டரிடம் உறுதிசெய்துகொள்ளவும்.

Reference: