பைக் பிரியர்களுக்கு குட் நியூஸ்: ‘Bajaj Dominar 400’-ல் அதிரடி மாற்றங்கள்!

இந்தியாவின் புனேவை தலைமையிடமாகக் கொண்டு செயல்படும் பஜாஜ் ஆட்டோ (Bajaj Auto) நிறுவனம், உலகின் மூன்றாவது பெரிய மோட்டார் சைக்கிள் மற்றும் மிகப்பெரிய மூன்று சக்கர வாகன உற்பத்தியாளர் ஆகும். பஜாஜ் குழுமத்தின் முதன்மை நிறுவனமான இது, பல்பசர் (Pulsar), சேடக் (Chetak) மின்சார ஸ்கூட்டர்கள் மற்றும் கம்யூட்டர் பைக்குகளுக்குப் பெயர் பெற்றது. 70-க்கும் மேற்பட்ட நாடுகளில் ஏற்றுமதி செய்யும் இது, உலகிலேயே அதிக சந்தை மதிப்புள்ள இரு சக்கர வாகன நிறுவனமாக விளங்குகிறது.

இந்நிலையில் பஜாஜ் ஆட்டோ நிறுவனம், புதிய டோமினார் 400 மோட்டார்(Dominar 400) சைக்கிளை இந்திய சந்தையில் அறிமுகம் செய்துள்ளது. இந்த நிறுவனம் சமீபத்தில் 349 சிசி வரிசையில் புதிய மாடல்களை அறிமுகம் செய்ததையடுத்து, வரி அமைப்பில் ஏற்பட்ட மாற்றத்தை கருத்தில் கொண்டு இந்த புதிய மாடல் உருவாக்கப்பட்டுள்ளது.

இதில் செய்யப்பட்டுள்ள மிக முக்கியமான மாற்றம், முந்தைய எஞ்சினிலிருந்து 373cc-லிருந்து 349.13cc சிங்கிள் சிலிண்டர் லிக்விட் கூல்டு திறன்கொண்ட எஞ்சினுக்கு மாறியிருப்பதே ஆகும்.போர் அளவை 89mm-ல் மாற்றாமல் வைத்துக்கொண்டு, ஸ்ட்ரோக் நீளத்தை 60mm-லிருந்து 56.1mm-ஆகக் குறைப்பதன் மூலம் இது சாத்தியமாகியுள்ளது.

இந்த நடவடிக்கை, மோட்டார்சைக்கிளின் நீண்ட தூரப் பயணங்களுக்கான (touring) சிறப்பம்சங்களைத் தக்கவைத்துக்கொண்டே, அதன் பராமரிப்புச் செலவைக் குறைக்கிறது; இதன் மூலம், பரந்த அளவிலான வாடிக்கையாளர்களுக்கு இந்த வாகனம் மேலும் எளிதில் எட்டக்கூடியதாக அமைகிறது.

பைக்கின் தொழில்நுட்ப அம்சங்களைப் பொறுத்தவரை, இந்த என்ஜின் அதிகபட்சமாக 9 ஆயிரம் ஆர்.பி.எம்.மில் 40 எச்.பி.பவரையும், 7,500 ஆர்.பி.எம்.மில் 33.2 என்.எம். டார்க்கையும் வெளிப்படுத்தும் திறன் கொண்டது.

முந்தைய 400 சிசி மாடலை ஒப்பிடுகையில் 50 சிசி குறைவாக இருப்பதால் பவர் 0.6 எச்பி மற்றும் டார்க் 1.8 என்எம் அளவில் குறைந்துள்ளது. மற்ற பெரும்பாலான அம்சங்களில் இந்த மோட்டார் சைக்கிள் அப்படியே உள்ளது.

13 லிட்டர் எரிபொருள் டேங்க் கொள்ளளவு மற்றும் 800 மிமீ இருக்கை உயரத்தைக் கொண்ட இந்த புதிய Dominar 400 பைக்கில், 43 மிமீ USD முன்பக்க ஃபோர்க்குகள் (forks), அத்துடன் 320 மிமீ முன்பக்க மற்றும் 230 மிமீ பின்பக்க டிஸ்க் பிரேக்குகள் ஆகியவை இடம்பெற்றுள்ளன. மேலும், இந்த பைக்கில் 'டூயல்-சேனல் ABS' வசதியும் வழங்கப்பட்டுள்ளது.

இந்த பைக்கின் மொத்த எடை 3 கிலோ குறைந்து, தற்போது 190 கிலோவாக உள்ளது.

சிறப்பம்சங்களைப் பொறுத்தவரை, இதில் USB சார்ஜிங் வசதி, வண்ணமயமான டிஜிட்டல் LCD திரை, LED முகப்பு மற்றும் பின் விளக்குகள், மற்றும் செல்ஃப்-ஸ்டார்ட் (self-start) வசதி ஆகியவை இடம்பெற்றுள்ளன.

என்ஜின் மாற்றத்திற்குப் பிறகும், இந்த மோட்டார்சைக்கிள் அதே அடிப்படை செயல்திறனையும், நீண்ட தூரப்பயணங்களுக்கு (Touring) ஏற்ற தன்மையையும் தொடர்ந்து வழங்குவதாக பஜாஜ் நிறுவனம் தெரிவிக்கிறது.

பஜாஜ் டோமினார் 400 தற்போது 'Charcoal Black' மற்றும் 'Aurora Green' ஆகிய இரண்டு அற்புதமான வண்ணத்தேர்வுகளில் தொடர்ந்து விற்பனை செய்யப்படுகிறது.

தினசரிப் பயணங்கள் மட்டுமின்றி, நீண்ட தூரப் பயணங்களையும் எளிதாகக் கையாளக்கூடிய ஒரு இருசக்கர வாகனமாகவே 'Dominar' எப்போதும் முன்னிறுத்தப்பட்டு வந்துள்ளது; அந்த நிலைப்பாடு இப்போதும் மாறாமல் அப்படியே தொடர்கிறது. அதேசமயம் இந்த மோட்டார் சைக்கிள் பயன்படுத்தப்பட வேண்டிய விதத்தில் எவ்விதப் பெரிய மாற்றங்களும் செய்யப்படவில்லை. பல்வேறு வகையான பயன் பாடுகளுக்கும் ஒரே ஒரு வாகனத்தையே விரும்பும் ஓட்டுநர்களுக்கு, இது ஒரு 'All-rounder' வாகனமாகவே தொடர்ந்து திகழ்கிறது.

இந்த மோட்டார் சைக்கிளின் ஷோரூம் விலை சுமார் ரூ.2.04 லட்சமாக நிர்ணயிக்கப்பட்டுள்ளது. ஏற்கனவே இருந்த 400 சிசி மாடலுடன் ஒப்பிடுகையில் இது சுமார் ரூ.37 ஆயிரம் வரை குறைந்த விலையில் வழங்கப்படுவது குறிப்பிடத்தக்கது.