பல நூறு ஆண்டுகளாக உலக நாடுகளை ஏமாற்றும் வரலாற்றுப் பிரபலங்களின் சடலங்கள்!

வரலாறு, பல நேரங்களில் சுவாரஸ்யமான மர்மங்களை தன்னுள் ஒளித்து வைத்திருக்கும் ஒரு பெரிய பெட்டகமாகவே இருக்கிறது. நாம் பள்ளியில் படிக்கும்போது உலகையே தன் கட்டுப்பாட்டில் வைத்திருந்த பல மாமன்னர்களையும், வரலாற்றுப் புகழ் பெற்ற தலைவர்களையும் பற்றிப் படித்து வியந்திருப்போம். அவர்கள் வாழ்ந்ததற்கான சுவடுகள், அவர்கள் கட்டிய பிரம்மாண்டமான அரண்மனைகள், பயன்படுத்திய வாள்கள் என பல விஷயங்கள் இன்றும் உலகெங்கும் உள்ள அருங்காட்சியகத்தில் பத்திரமாக பாதுகாக்கப்பட்டு வருகின்றன. 

ஆனால், அப்படிப்பட்ட சிலரின் உடல்கள், கல்லறைகள் இன்று வரை எங்கே இருக்கிறது என்று கண்டுபிடிக்க முடியாத அளவுக்கு மாயமாகிப் போனதுதான் பெரும் ஆச்சரியம். தொழில்நுட்பம் இவ்வளவு தூரம் வளர்ந்த இந்த நவீன காலகட்டத்திலும் இது தொல்பொருள் ஆய்வாளர்களுக்கு ஒரு தீர்க்க முடியாத புதிராகவே தொடர்கிறது. அப்படிப்பட்ட சில முக்கிய வரலாற்றுப் பிரபலங்களைப் பற்றி இந்தப் பதிவில் பார்ப்போம்.

1. செங்கிஸ் கான்!

ஆசியாவின் பெரும்பகுதியைத் தன் குதிரைப்படையால் வென்று காட்டிய மங்கோலிய மாமன்னர் செங்கிஸ் கான் மரணம் இன்றும் ஒரு திகில் கதை போலத்தான் சொல்லப்படுகிறது. அவர் இறந்த பிறகு, அவரது உடல் எங்கே புதைக்கப்படுகிறது என்ற ரகசியம் வெளியே தெரிந்துவிடக் கூடாது என்பதற்காக அவரது விசுவாசிகள் விசித்திரமான ஒரு காரியத்தைச் செய்தார்கள். 

அவரது உடலை ரகசியமாகச் சுமந்து சென்ற வழியில் தென்பட்ட அத்தனை மனிதர்களையும் அவரது படையினரே ஈவிரக்கமின்றி கொன்றுவிட்டதாக வரலாறு கூறுகிறது. அதோடு மட்டுமில்லாமல், அவர் புதைக்கப்பட்ட இடத்தின் மீது ஆயிரக்கணக்கான குதிரைகளை ஓடவிட்டு, அந்த இடத்திற்கான அடையாளத்தையே தரைமட்டமாக்கி அழித்துவிட்டார்கள். இன்றுவரை பல நாட்டு ஆய்வாளர்கள் தேடியும் அவர் புதைக்கப்பட்ட இடம் ஒரு பெரிய மர்மமாகவே நீடிக்கிறது.

2. கிளியோபாட்ரா!

எகிப்து நாட்டை ஆண்ட பேரழகியான கிளியோபாட்ரா தனது காதலன் மார்க் ஆண்டனியுடன் சேர்ந்து தற்கொலை செய்துகொண்டதாக வரலாற்றுப் பதிவுகள் மிகத் தெளிவாகச் சொல்கின்றன. அவர்கள் இருவரையும் ஒன்றாகவே ஒரு பிரம்மாண்டமான கல்லறையில் அடக்கம் செய்ததாகக் கூறப்படுகிறது. அந்த அறை முழுவதும் தங்கம், வைரம் என பல அரிய வகை பொக்கிஷங்கள் வைக்கப்பட்டிருந்ததாம். 

ஆனால், அந்த இடம் எகிப்தில் எங்குள்ளது என்பது பல நூற்றாண்டுகளாகத் தேடப்பட்டு வரும் ஒரு சுவாரஸ்யமான விஷயம். ஒருவேளை நிலநடுக்கம் அல்லது கடல் சீற்றத்தால் அந்த இடம் முற்றிலுமாக கடலுக்கு அடியில் மூழ்கி அழிந்து போயிருக்கலாம் என்று சில ஆராய்ச்சியாளர்கள் கருதுகிறார்கள். எப்படிப் பார்த்தாலும் எகிப்தின் மிகப்பெரிய ரகசியங்களில் இதுவும் முன்னணியில் இருக்கிறது.

3. மாமன்னர் அலெக்ஸாண்டர்!

 தனது 32-வது வயதிலேயே உலகின் பாதி நாட்டை வென்ற அலெக்ஸாண்டர், பாபிலோனில் மிகவும் மர்மமான முறையில் இறந்து போனார். அவரது உடல் தேனில் பதப்படுத்தப்பட்டு, தங்கத்தால் ஆன ஒரு சவப்பெட்டியில் வைக்கப்பட்டு எகிப்தில் உள்ள அலெக்ஸாண்ட்ரியா நகரில் பல நூறு ஆண்டுகள் மக்களின் பார்வைக்காக வைக்கப்பட்டிருந்தது. 

ரோமானிய மன்னர்கள் கூட நேரில் வந்து அந்த உடலைப் பார்த்து வியந்துள்ளார்கள். ஆனால், காலப்போக்கில் நடந்த பல்வேறு போர்கள் மற்றும் இயற்கை சீற்றங்களால் அவரது கல்லறை எங்கே போனது என்றே தெரியாமல் போய்விட்டது. இவ்வளவு பெரிய சாம்ராஜ்யத்தை உருவாக்கிய ஒருவரின் உடல் இன்று எங்குள்ளது என்பதற்கான எந்த ஒரு சுவடும் இல்லை என்பது கேட்பதற்கே கொஞ்சம் வித்தியாசமாகத்தான் இருக்கிறது.

4. நேதாஜி சுபாஷ் சந்திர போஸ்!

இந்திய சுதந்திரப் போராட்டத்தில் பெரும் பங்காற்றிய நேதாஜியின் மரணம் இன்றும் இந்திய வரலாற்றில் விடைதெரியாத ஒரு பக்கமாகவே உள்ளது. தைவானில் நடந்த ஒரு விமான விபத்தில் அவர் இறந்துவிட்டதாக அதிகாரப்பூர்வமாக அறிவிக்கப்பட்டாலும், அவரது உடல் இன்றுவரை கண்டுபிடிக்கப்படவில்லை.

அவர் அந்த விபத்தில் இறக்கவில்லை என்றும், ரகசியமாக ரஷ்யாவிற்குத் தப்பிச் சென்றுவிட்டார் என்றும் பல தியரிகள் இன்றும் மக்களிடையே உலவி வருகின்றன. அரசால் அமைக்கப்பட்ட பல்வேறு விசாரணை கமிஷன்களும் தெளிவான ஒரு முடிவைச் சொல்லாததால் இது இன்றும் மர்மமாகவே தொடர்கிறது.

பல்லாயிரம் மக்களை ஆட்சி செய்தவர்கள், உலக வரலாற்றையே தன் பக்கம் திருப்பியவர்கள் என இவ்வளவு பெரிய ஆளுமைகளின் உடல்களே இன்று எங்குள்ளது என்று தெரியாமல் இருப்பது காலத்தின் ஒரு விசித்திரமான விளையாட்டுதான். உலகமே இன்றும் அவர்களைப் பற்றித் தொடர்ந்து பேசிக் கொண்டிருந்தாலும், இந்த பூமி அவர்களைத் தன் மடியில் யாருக்கும் தெரியாமல் மிகவும் ரகசியமாக ஒளித்து வைத்துக் கொண்டது.