நாளை ஓட்டு போட செல்லும் மக்களின் கவனத்திற்கு... சுட்டெரிக்கும் வெயிலில் இருந்து தப்பிக்க சில டிப்ஸ்!

தமிழ்நாட்டின் அடுத்த முதலமைச்சர் யார் என்பதை தீர்மானிக்கும் மாபெரும் ஜனநாயக திருவிழா நாளை கோலாகலமாக நடைபெற உள்ளது. ஓட்டு போடுவது நமது தலையாய கடமை என்றாலும், வெளியே சுட்டெரிக்கும் வெயிலை நினைத்தால் கொஞ்சம் பயமாகத்தான் இருக்கிறது. கோடை காலம் உச்சத்தை தொட்டிருக்கும் இந்த வேளையில், வாக்குச்சாவடிகளில் நீண்ட வரிசையில் வெயிலில் நிற்பது பெரும் சவால்தான். 

அதற்காக ஜனநாயக கடமையை ஆற்றாமல் வீட்டிலேயே முடங்கி கிடக்க முடியாது. கொளுத்தும் இந்த கோடை வெயிலில் இருந்து நமது சருமத்தை எப்படி பாதுகாப்பது, மேலும் எந்த மாதிரியான உடைகளை அணிந்து சென்றால் சௌகரியமாக ஓட்டு போட்டுவிட்டு வரலாம் என்பதை பற்றி இப்போது பார்க்கலாம்.

அத்தியாவசிய சருமப் பராமரிப்பு!

ஆண்களாக இருந்தாலும் சரி, பெண்களாக இருந்தாலும் சரி வெயிலில் இறங்குவதற்கு முன் சன்ஸ்கிரீன் தடவுவது மிக மிக அவசியமான ஒன்றாகும். வெளியே செல்வதற்கு இருபது நிமிடங்களுக்கு முன்பாகவே முகம், கழுத்து மற்றும் கைகளில் எஸ்பிஎப் ஐம்பது அளவுள்ள ஒரு நல்ல சன்ஸ்கிரீனை கட்டாயம் தடவிக்கொள்ளுங்கள். 

இது சூரியனின் கொடூரமான புற ஊதா கதிர்களில் இருந்து உங்கள் சருமத்தை கருகாமல் ஒரு கவசம் போல காப்பாற்றும். பெண்கள் அதிகப்படியான மேக்கப் போடுவதைத் தவிர்ப்பது நல்லது. வெயிலில் வியர்க்கும் போது மேக்கப் கலைந்து முகத்தில் அரிப்பு மற்றும் எரிச்சலை உண்டாக்கும். அதற்கு பதிலாக லேசான மாய்ஸ்சரைசர் மற்றும் உதடுகளுக்கு லிப் பாம் மட்டும் பயன்படுத்தினால் போதுமானது. 

ஆண்களும் முகத்தை நல்ல குளிர்ந்த நீரில் கழுவிவிட்டு கற்றாழை ஜெல் போன்றவற்றை தடவிச் செல்வது முகத்தை நீண்ட நேரம் பிரெஷ்ஷாக வைக்கும். கைகளில் வழியும் வியர்வையை துடைக்க வெட் வைப்ஸ் வைத்துக்கொள்வது ரொம்பவே உதவும்.

பெண்களுக்கான ஆடைகள்!

வெயிலுக்கு மிகவும் இதமான உடை என்றால் அது பருத்தி ஆடைகள் தான். பெண்கள் இறுக்கமான உடைகளை தவிர்த்துவிட்டு, தளர்வான காட்டன் சுடிதார்கள் அல்லது காட்டன் புடவைகளை அணிந்து செல்வது மிகச்சிறந்த சாய்ஸ். கருப்பு மற்றும் அடர்ந்த நிறங்களை முற்றிலும் தவிர்த்துவிட்டு, வெளிர் நீலம், வெள்ளை, சந்தன நிறம் போன்ற மென்மையான நிறங்களை தேர்ந்தெடுங்கள். 

இந்த வெளிர் நிறங்கள் வெப்பத்தை உள்வாங்காமல் வெளியேற்றும் தன்மை கொண்டவை. அதோடு கால்களுக்கு அதிக வேலை கொடுக்கும் ஹை ஹீல்ஸ் அணிவதை விட்டுவிட்டு, சௌகரியமான பிளாட் செருப்புகளை அணிந்து சென்றால் வரிசையில் மணிக்கணக்கில் நிற்க வசதியாக இருக்கும். கைகளில் ஒரு சிறிய குடையை எடுத்து செல்வது கூடுதல் பாதுகாப்பை தரும்.

ஆண்களுக்கான ஆடைகள்!

ஆண்கள் ஜீன்ஸ் மற்றும் டைட்டான டி சர்ட்டுகளை நாளைக்கு ஒரு நாள் பீரோவிலேயே ஓரம் கட்டிவிடுங்கள். தளர்வான லினன் சட்டைகள் மற்றும் மெல்லிய காட்டன் பேண்ட்கள் உங்களுக்கு நல்ல காற்றோட்டத்தை கொடுக்கும். 

பாரம்பரியத்தை விரும்பும் ஆண்கள் சுத்தமான வெள்ளை நிற கதர் வேட்டி சட்டை அணிந்து செல்வது பார்ப்பதற்கும் கெத்தாக இருக்கும், வெயிலுக்கும் இதமாக இருக்கும். தலையை பாதுகாக்க ஒரு நல்ல தொப்பி அல்லது கண்களுக்கு கூலிங் கிளாஸ் அணிந்து செல்வது உங்களை வெப்ப அலைகளில் இருந்து பாதுகாக்கும்.

தேர்தல் நமக்கான ஒரு முக்கியமான உரிமை, அதை வெயிலை காரணம் காட்டி ஒருபோதும் தவறவிடக் கூடாது. வீட்டை விட்டு கிளம்பும் போது ஒரு வாட்டர் பாட்டில் நிறைய தண்ணீர் அல்லது மோர் குடித்துவிட்டு கிளம்புங்கள். கைகளில் ஒரு பாட்டில் தண்ணீர் எடுத்துச் செல்ல மறக்காதீர்கள். வரிசையில் நிற்கும் போது அவ்வப்போது தண்ணீர் குடித்துக்கொண்டே இருப்பது உங்களை சோர்வடையாமல் சுறுசுறுப்பாக பார்த்துக்கொள்ளும். 

வெயிலில் உங்கள் சருமத்தையும் உடலையும் பாதுகாப்பாக வைத்துக்கொண்டு உங்கள் பொன்னான வாக்கை பதிவு செய்துவிட்டு வாருங்கள். சிறப்பான தலைவரை தேர்ந்தெடுப்போம், அதே சமயம் வெயிலையும் மிக சுலபமாக சமாளிப்போம்.