மாடுகள் போலவே அசை போடும் அதிசயப் பறவை: ஹோயட்சின் (Hoatzin)!

இயற்கையின் படைப்பில் பறவை இனத்தைச் சேர்ந்ததாக இருந்தாலும், பாலூட்டிகளைப் போன்ற செரிமானப் பண்புகளைக்கொண்டு ஆராய்ச்சியாளர்களை வியப்பில் ஆழ்த்தும் ஒரு பறவைதான் ஹோயட்சின். தென் அமெரிக்காவின் அமேசான் காடுகளில் காணப்படும் இப்பறவை, மாடுகள் போலவே உணவை மீண்டும் வாய்க்கு கொண்டு வந்து மென்று தின்னும் (அசை போடும்) பழக்கம் கொண்ட ஒரே பறவை ஆகும். இதன் விசித்திரமான தோற்றம், செரிமான முறை மற்றும் குஞ்சுகளின் தனித்துவமான நகங்கள் ஆகியவை இதனை மற்ற பறவைகளிடமிருந்து முற்றிலும் வேறுபடுத்திக் காட்டுகின்றன.

சில சுவாரசியமான தகவல்கள்: இவை தென் அமெரிக்காவில் உள்ள அமேசான் மற்றும் ஒரினோகோ (Orinoco) நதிப் படுகைகளில் காணப்படுகின்றன. இதன் அறிவியல் பெயர் Opisthocomus hoazin. மற்ற பறவை களிடமிருந்து இது முற்றிலும் மாறுபட்டு இருப்பதால், இதனை “வாழும் தொல்லுயிர்” (Living Fossil) என்றும் ஆராய்ச்சியாளர்கள் கருதுகிறார்கள்.

அசை போடும் விசித்திரம் (Foregut Fermentation): பொதுவாகப் பறவைகள் பழங்கள் அல்லது பூச்சிகளை உண்ணும். ஆனால், ஹோயட்சின் பெரும்பாலும் இலைகளையே உணவாகக் கொள்கிறது. இலைகளில் உள்ள ‘செல்லுலோஸ்’ (Cellulose) செரிமானம் ஆவது கடினம். இதற்காக மாடுகளைப் போலவே இதன் உணவுக் குழாயின் ஒரு பகுதி (Crop) பெரிய பையாக உருவெடுத்துள்ளது. அங்குள்ள பாக்டீரியாக்கள் இலைகளைச் சிதைத்து நொதிக்க வைக்கின்றன.

இந்த நொதித்தல் செயல்முறையினால், இப்பறவையின் உடலில் இருந்து ஒருவிதமான மாட்டுச் சாண வாசனை அல்லது அழுகிய மணம் வீசும். இதனால் இதனை “நாற்றமடிக்கும் பறவை” (Stinkbird) என்றும் அழைப்பார்கள். இதனாலேயே வேட்டைக்காரர்கள் இதனை விரும்பி வேட்டையாடுவதில்லை.

உடல் அமைப்பு மற்றும் தோற்றம்: பார்ப்பதற்கு மிகவும் அழகாக இருக்கும். முகம் நீல நிறத்திலும், கண்கள் சிவப்பு நிறத்திலும், தலையில் நீண்ட இறகுகளால் ஆன ஒரு கிரீடம் போன்ற அமைப்பும் இருக்கும். இதன் செரிமானப் பை (Crop) மிகப் பெரியதாக இருப்பதால், மார்புத் தசைகள் வளர்வதற்கு இடமில்லாமல் போய்விட்டது. இதனால் இப்பறவையால் நீண்ட தூரம் பறக்க முடியாது; மிகக்குறைந்த தூரமே தட்டுத்தடுமாறிப் பறக்கும்.

குஞ்சுகளின் விசித்திர நகங்கள்: ஹோயட்சின் பறவையின் குஞ்சுகளுக்கு இறக்கைகளின் நுனியில் இரண்டு நகங்கள் இருக்கும். இவை மரக்கிளைகளில் ஏறுவதற்கு இந்த நகங்களைப் பயன்படுத்துகின்றன. எதிரிகளிடமிருந்து தப்பிக்க குஞ்சுகள் மரத்திலிருந்து நேராகக் கீழே உள்ள ஆற்று நீரில் குதித்துவிடும். பின்னர் ஆபத்து நீங்கியதும், இந்த நகங்களின் உதவியுடன் மீண்டும் மரத்தில் ஏறிவிடும். பறவை வளர்ந்தவுடன் இந்த நகங்கள் மறைந்துவிடும்.

சமூகம் மற்றும் இனப்பெருக்கம்: இவை கூட்டமாக வாழும் பழக்கம் கொண்டவை. ஒரு சுவாரசியமான விஷயம் என்னவென்றால், இப்பறவையின் கூட்டில் உள்ள முட்டைகளை அடைகாக்க அல்லது குஞ்சுகளைப் பராமரிக்க, முந்தைய பருவத்தில் பிறந்த “அண்ணன், அக்கா” பறவைகளும் உதவி செய்யும் (Cooperative Breeding). ஒருவிதமான கரகரப்பான சத்தத்தை (Wheezing sound) எழுப்பும்.

இதுபோன்ற ஒரு செரிமான மண்டலத்தைக் கொண்ட பறவை உலகில் வேறு எங்கும் கிடையாது என்பது குறிப்பிடத்தக்கது.

ஹோயட்சின் பறவைகள் பரிணாம வளர்ச்சியின் ஒரு முக்கிய அடையாளமாகவும் திகழ்கின்றன. அவற்றின் செரிமான மண்டலம் மற்றும் குஞ்சுகளின் நகங்கள் போன்றவை வரலாற்றுக்கு முந்தைய காலத்து பறவைகளை நமக்கு நினைவு படுத்துகின்றன.

காடுகள் அழிப்பு மற்றும் காலநிலை மாற்றத்தால் இத்தகைய அரிய வகை உயிரினங்கள் பாதிக்கப் படக்கூடும் என்பதால், அமேசான் போன்ற இயற்கைச் சூழலைப் பாதுகாப்பது ஹோயட்சின் போன்ற அதிசயப் பறவைகளின் வாழ்வாதாரத்திற்கு மிகவும் அவசியமாகும். இயற்கையின் இந்த “வாழும் தொல்லுயிர்” நமக்குப் பல்லுயிர் பெருக்கத்தின் முக்கியத்துவத்தை உணர்த்தும் ஒரு உன்னதப் படைப்பாகும்.