தினமும் பால்கனி அல்லது மொட்டை மாடியில் உணவு வைக்கும்போது, அதைக் கவனித்துத் தொடர்ந்து வரும் காகங்கள் சில நாட்களுக்குப் பிறகு ஏதேனும் ஒரு பரிசு கொண்டு வரும். ஒரு நாள் காலையில் காலியான தட்டின் அருகே ஒரு சிறிய கூழாங்கல், பளபளப்பான பாட்டில் மூடி அல்லது பட்டன் கிடப்பதைப் பலர் பார்த்திருப்பார்கள். தனக்கு உணவு போட்டதற்கு நன்றிக்கடனாகக் காகம் பரிசு அளிப்பதாகவே பலருக்கும் தோன்றும்.
உலகெங்கும் உள்ள நகரங்களிலும் நாடுகளிலும் நடக்கும் இந்தச் செயல் வித்தியாசமாக தெரிந்தாலும், இதன் பின்னால் காகங்களின் அசாதாரண அறிவுத்திறன் இருப்பதாக விஞ்ஞானிகள் கூறுகின்றனர்.
காகங்களின் நினைவாற்றல்!
காகங்கள் 'கார்விட்' (Corvid) குடும்பத்தைச் சேர்ந்த மிகவும் புத்திசாலியான பறவைகள். இவற்றால் புதிர்களைத் தீர்க்கவும், கருவிகளைப் பயன்படுத்தவும், எதிர்காலத்திற்குத் திட்டமிடவும், சிக்கலான சமூகத் தகவல்களை நினைவில் கொள்ளவும் முடியும். 'ப்ரோசீடிங்ஸ் ஆஃப் தி நேஷனல் அகாடமி ஆஃப் சயின்சஸ்' (Proceedings of the National Academy of Sciences) இதழில் வெளியான ஆய்வு ஒன்று, அமெரிக்கக் காகங்கள் தனிப்பட்ட மனித முகங்களை அடையாளம் கண்டு பல ஆண்டுகள் நினைவில் வைத்திருக்கும் என்பதை நிரூபித்துள்ளது.
இந்த ஆய்வில், குறிப்பிட்ட முகமூடிகளை அணிந்து காகங்களைக் கையாண்ட ஆய்வாளர்களை, நீண்ட காலம் கழித்து அதே முகமூடியுடன் பார்த்தபோதும் காகங்கள் கடுமையாக எதிர்வினையாற்றின. அன்பான மனிதர்களையும், அச்சுறுத்தும் மனிதர்களையும் அவை வேறுபடுத்திப் பார்க்கின்றன. இந்த நீண்ட கால நினைவாற்றலே, தங்களுக்குத் தொடர்ந்து உணவளிக்கும் மனிதர்களிடம் அவை வித்தியாசமாக நடந்துகொள்ளக் காரணமாகிறது.
இது உண்மையில் நன்றி உணர்வா?
இதனைப் 'பரிசு' என்று அழைப்பதில் விஞ்ஞானிகள் கவனமாக உள்ளனர். மனிதர்களைப் போல காகங்கள் நன்றி உணர்வை உணர்கின்றன என்பதற்கு நேரடி ஆதாரம் இல்லை. இதனைக் 'கற்றுக்கொண்ட பரிமாற்றம்' என்றே விலங்கு நடத்தை ஆய்வாளர்கள் விளக்குகின்றனர்.
பளபளப்பான, வித்தியாசமான எளிதில் தூக்கிச் செல்லக்கூடிய பொருட்களைச் சேகரிப்பது காகங்களின் இயல்பு. அத்தகைய பொருளை வாயில் கவ்வியபடி வழக்கமான உணவு இடத்திற்கு வரும்போது, அதனை அங்கே போட்டுவிடும்.
அதன்பின் உணவு கிடைத்தாலோ அல்லது மனிதர்கள் அமைதியாக எதிர்வினையாற்றினாலோ, அந்தச் செயலை மீண்டும் மீண்டும் செய்யத் தொடங்கும். மேலும், ஒரு காகம் செய்வதைப் பார்த்து மற்ற காகங்களும் கற்றுக்கொண்டு, அந்தப் பழக்கம் ஒரு குழுவாகவே பரவ வாய்ப்புள்ளதாக நடத்தை ஆய்வாளர்கள் குறிப்பிடுகின்றனர்.
குறிப்பிட்ட பொருட்களை மட்டும் தேர்ந்தெடுப்பது ஏன்?
காகங்கள் கொண்டு வந்து போடும் கூழாங்கற்கள், உலோகத் துண்டுகள், பாட்டில் மூடிகள் மற்றும் வளையங்கள் எதுவுமே தற்செயலானவை அல்ல. அவை உறுதியானவை, எளிதில் தூக்கிச் செல்லக்கூடியவை மற்றும் பார்வைக்குப் பளபளப்பாகத் தெரிபவை. எளிதில் எடுத்து, போட்டு, மீண்டும் அடையாளம் காண முடியும் என்பதாலேயே இவற்றைத் தேர்ந்தெடுக்கின்றன.
இதனை நன்றி என்று அழைக்காவிட்டாலும், நகரங்களில் நம்முடன் வாழும் காகங்கள் தனிப்பட்ட மனிதர்களைக் கவனித்து, கடந்த கால அனுபவங்களை நினைவில் வைத்துத் தங்கள் நடத்தையை மாற்றிக்கொள்கின்றன என்பது உண்மையிலேயே வியப்பானது. இவ்வாறு காகம் பரிசு போல பொருட்களை வைத்துச் செல்வது நினைவாற்றல், ஆர்வம் மற்றும் நம்பிக்கையின் வெளிப்பாடு எனலாம்.
அறிவு என்பது மனிதர்களுக்கு மட்டுமே சொந்தமானதல்ல என்பதையும், சிறிய அன்பு கூட பிற உயிரினங்களின் நடத்தையில் மாற்றத்தை ஏற்படுத்தும் என்பதையும் இந்த நிகழ்வு மூலம் நாம் புரிந்து கொள்ள முடிகிறது.