கோடை வெயிலுக்கு இந்த 5 மாம்பழ உணவுகளை உடனே ட்ரை பண்ணுங்க.. சுவை சும்மா அள்ளும்!

நமது ஊரில் கோடைக்காலம் வந்துவிட்டாலே வெயில் எந்த அளவுக்கு வாட்டி எடுக்கிறதோ, அதே அளவுக்கு மாம்பழங்களின் சீசனும் களைகட்டிவிடும். பழங்களின் ராஜா என்று அன்பாக அழைக்கப்படும் இந்த மாம்பழத்தை வெறும் வாயில் அப்படியே கடித்துச் சாப்பிடுவது ஒரு அலாதியான சுகம் தான். 

ஆனால், அதை வைத்து இன்னும் கொஞ்சம் வித்தியாசமாக, அதுவும் எந்த ஒரு விலங்கு பொருட்களான பால், நெய் போன்றவை சேர்க்காத வீகன் முறையில் பல அட்டகாசமான உணவுகளை சமைக்க முடியும். உங்களின் நாவுக்குப் புதுவிதமான சுவையை விருந்தளிக்கும் வகையிலும், அதேசமயம் உடலுக்கு அதிகப்படியான ஆரோக்கியம் தரும் வகையிலும் அமைந்த 5 அசத்தலான மாம்பழ ரெசிபிகளைப் பார்க்கலாம் வாங்க.

சுட்ட மாம்பழம்!

இதுவரை மாம்பழத்தைப் பச்சையாகவோ அல்லது ஜூஸ் போட்டோ மட்டுமே சாப்பிட்டவர்களுக்கு இந்த ஐடியா புதுசாக இருக்கும். நல்ல பழுத்த மாம்பழங்களை பெரிய சதுர வடிவில் வெட்டி ஒரு மரக் கம்பியில் கோர்த்துக்கொள்ளுங்கள். அதனை மிதமான நெருப்பில் லேசாக கருகும் வரை வாட்டி எடுக்க வேண்டும். நெருப்பின் அதீத சூட்டில் மாம்பழத்தில் உள்ள இயற்கையான சர்க்கரை உருகி, ஒருவிதமான ஸ்மோக்கி பிளேவரோடு சாப்பிடுவதற்கு அட்டகாசமாக இருக்கும்.

மேங்கோ ஸ்மூத்தி!

காலையில் அவசரமாக வேலைக்கு செல்பவர்களுக்கு இந்த ஸ்மூத்தி ஒரு பெரிய வரப்பிரசாதம். பழுத்த மாம்பழம், ஒரு வாழைப்பழம் மற்றும் கொஞ்சம் திக்கான தேங்காய்ப்பால் ஆகிய மூன்றையும் மிக்ஸியில் போட்டு நன்றாக அரைத்துக்கொள்ளுங்கள். இதோடு சர்க்கரை எதுவும் சேர்க்க வேண்டிய அவசியமே இல்லை, ஏனென்றால் பழங்களின் இயற்கையான இனிப்பே போதுமானது. மேலே கொஞ்சம் புதினா இலைகளோ அல்லது துருவிய தேங்காயோ தூவி குடித்தால் வயிறும் முழுமையாக நிறைந்துவிடும், மனதும் குளிர்ந்துவிடும்.

மாம்பழ சாலட்!

எந்த ஒரு பெரிய உணவையும் தொடங்குவதற்கு முன்பாக ஒரு நல்ல சாலட் சாப்பிடுவது உடலுக்கு ரொம்பவே நல்லது. நன்கு பழுத்த மாம்பழங்களை சின்னச் சின்ன துண்டுகளாக முதலில் வெட்டிக்கொள்ளுங்கள். அதோடு கொஞ்சம் அவகாடோ பழத்தையும் நறுக்கிப் போட்டு, மேலே பிரெஷ்ஷான எலுமிச்சை சாறு மற்றும் பொடியாக நறுக்கிய கொத்தமல்லியைத் தூவி, கொஞ்சமாக உப்பு சேர்த்து கிளறினால் சூப்பரான சாலட் ரெடி. மாலை நேரங்களில் தேவையில்லாத நொறுக்குத்தீனி சாப்பிடுவதற்குப் பதிலாக இந்த சாலட்டை ருசிக்கலாம்.

மேங்கோ புட்டிங்!

இனிப்பு பிரியர்களுக்கு, அதுவும் பால் பொருட்கள் கொஞ்சம் கூட சேர்க்காத ஒரு ஹெல்தியான டெசர்ட் சாப்பிட வேண்டும் என்றால் இதை நீங்கள் தாராளமாக ட்ரை பண்ணலாம். முதல் நாள் இரவே சியா விதைகளை பாதாம் பாலில் கலந்து பிரிட்ஜில் வைத்துவிட வேண்டும். மறுநாள் காலையில் அது நன்றாக ஊறி ஒரு ஜெல்லி போல மாறியிருக்கும். அதன் மேலே கெட்டியான மாம்பழக் கூழை ஊற்றி, உங்களுக்கு பிடித்த நட்ஸ் வகைகளைத் தூவி ஜில்லென்று சாப்பிட்டால் இதன் ருசியை உங்கள் வாழ்நாளில் மறக்கவே மாட்டீர்கள்.

க்வினோவா (Quinoa)  பௌல்!

மதிய வேளைக்கு வயிறு நிறைய கொஞ்சம் காரசாரமாக சாப்பிட நினைப்பவர்களுக்கு இந்த ரெசிபி ஒரு செம சாய்ஸ். முதலில் க்வினோவாவை நன்றாக வேகவைத்து ஒரு கிண்ணத்தில் எடுத்துக்கொள்ளுங்கள். அதன் மேலே கொஞ்சம் மாம்பழத் துண்டுகள், வேகவைத்த கருப்பு பீன்ஸ், ஸ்வீட் கார்ன் மற்றும் அவகாடோ துண்டுகளை அழகாக அடுக்கி வையுங்கள். இதனுடன் எலுமிச்சை சாறு மற்றும் காரத்திற்காகச் சில்லி பிளேக்ஸ் சேர்த்து சாப்பிட்டால், இனிப்பும் காரமும் கலந்த ஒரு வேற லெவல் சுவை உங்களுக்கு கட்டாயம் கிடைக்கும்.

இந்த கோடை விடுமுறையை உங்கள் குடும்பத்தினரோடு கொண்டாடும் போது இந்த ஆரோக்கியமான உணவுகள் உங்களின் டைனிங் டேபிளை முழுமையாக அலங்கரிக்கட்டும். உடனே மார்க்கெட்டுக்கு சென்று நல்ல பழங்களை வாங்கி வந்து சமைக்கத் தொடங்குங்கள்.