வீட்டில் உள்ள தோசைக்கல் போதும்... இந்த 5 அட்டகாசமான வெஜ் உணவுகளை நிமிடங்களில் செஞ்சு அசத்தலாம்!

சமையல் செய்வது பலருக்கும் மிகவும் பிடித்தமான விஷயம் என்றாலும், சமைத்து முடித்த பிறகு மலையாகக் குவியும் பாத்திரங்களை கழுவுவது பெரும்பாடாக இருக்கும். இதற்காகவே பலரும் சுலபமாக, அதே நேரம் சுவையாக சமைக்க ஏதாவது குறுக்கு வழிகள் இருக்கிறதா எனத் தேடுவார்கள். 

அப்படிப்பட்டவர்களுக்கு நமது வீட்டில் இருக்கும் சாதாரண தோசைக்கல் அதாவது தவா ஒரு சிறந்த வரப்பிரசாதம். தோசை மற்றும் சப்பாத்தி சுட மட்டுமில்லாமல் பல அட்டகாசமான வெஜ் உணவுகளையும் இதில் அசத்தலாக செய்ய முடியும். 

1. தவா பனீர் டிக்கா!

பெரிய பெரிய ஹோட்டல்களில் அதிக விலை கொடுத்து வாங்கும் பனீர் டிக்காவை நமது வீட்டிலேயே செய்யலாம். பனீர் துண்டுகளுடன் கெட்டித்தயிர், இஞ்சி பூண்டு பேஸ்ட் மற்றும் கொஞ்சம் கரம் மசாலா கலந்து ஒரு அரை மணி நேரம் ஊறவிட வேண்டும். பின்னர் தவாவில் கொஞ்சம் வெண்ணெய் அல்லது எண்ணெய் தடவி இந்த துண்டுகளை இருபுறமும் சிவக்க வறுத்து எடுத்தால் சூப்பரான பனீர் டிக்கா ரெடி.

2. மும்பை தவா புலாவ்!

மதிய நேரங்களில் மீந்து போன சாதம் இருந்தால் இந்த ரெசிபியை நீங்கள் தாராளமாக ட்ரை பண்ணலாம். தவாவில் வெண்ணெய் சேர்த்து வெங்காயம், தக்காளி மற்றும் முன்கூட்டியே வேகவைத்த காய்கறிகளை நன்றாக வதக்கிக்கொள்ள வேண்டும். இதனுடன் கொஞ்சம் பாவ்பாஜி மசாலா சேர்த்து கிளறி, கடைசியாக சாதத்தை கொட்டி நன்றாக பிரட்டி எடுத்தால் காரசாரமான மும்பை ஸ்டைல் தவா புலாவ் சுடச்சுட தயாராகிவிடும்.

3. காளான் தவா மசாலா!

சப்பாத்தி மற்றும் நாண் வகைகளுக்கு இது ஒரு அட்டகாசமான சைடிஷ் ஆகும். நறுக்கிய காளான்களை தவாவில் போட்டு லேசாக வதக்கி தனியாக ஒரு தட்டில் எடுத்து வைத்துக்கொள்ள வேண்டும். அதே தவாவில் வெங்காயம், தக்காளி விழுது சேர்த்து நன்றாக வதக்கி வழக்கமான மசாலாப் பொருட்களைப் போட்டு லேசாக தண்ணீர் தெளித்து கொதிக்க விடவும். பின்னர் வதக்கிய காளான்களை அதோடு சேர்த்து சுருள கிளறினால் சுவையான காளான் தவா மசாலா தயார்.

4. ரோட்டுக்கடை தவா சாண்ட்விச்!

மாலை நேர ஸ்நாக்ஸ் ஆக சாப்பிட இந்த சாண்ட்விச் பெஸ்ட். பிரெட் துண்டுகளுக்கு நடுவே பொடியாக நறுக்கிய வெங்காயம், தக்காளி, குடைமிளகாய் மற்றும் கொஞ்சம் சீஸ் துருவி வைத்துக்கொள்ள வேண்டும். தவாவில் தாராளமாக வெண்ணெய் தடவி இந்த பிரெட்டை வைத்து இரண்டு பக்கமும் பொன்னிறமாக டோஸ்ட் செய்து எடுத்தால் மொறுமொறுப்பான சாண்ட்விச் நொடிகளில் ரெடியாகிவிடும்.

5. தவா ஆலு டிக்கி!

உருளைக்கிழங்கை வைத்து செய்யப்படும் இந்த அருமையான நார்த் இந்தியன் ரெசிபி குழந்தைகள் முதல் பெரியவர்கள் வரை அனைவருக்கும் பிடிக்கும். வேகவைத்த உருளைக்கிழங்கை நன்றாக மசித்து அதனுடன் உப்பு, மிளகாய்த்தூள் மற்றும் கொத்தமல்லி சேர்த்து தட்டையான வடைகள் போல தட்டிக்கொள்ள வேண்டும். இதை தவாவில் போட்டு சிறிதளவு எண்ணெய் விட்டு இரண்டு பக்கமும் நன்றாக சிவக்க வறுத்து எடுத்தால் கிரிஸ்பியான ஆலு டிக்கி தயார்.

பெரிய பெரிய பாத்திரங்களை தேடி எடுத்து சமைப்பதை விட இப்படி ஒரே ஒரு தவாவை வைத்துக்கொண்டு இவ்வளவு வெரைட்டியான உணவுகளை நாமே நமது சமையலறையில் செய்துவிடலாம். இனிமேல் உங்கள் வீட்டில் தோசைக்கல்லை வெறும் தோசை ஊற்ற மட்டும் பயன்படுத்தாமல் இந்த மாதிரி புதுப்புது உணவுகளை செஞ்சு வீட்ல இருக்குறவங்களை ஆச்சரியப்படுத்துங்க.