கீரை சாப்பிடாத குழந்தைகள் விரும்பி கேட்கும் மொறுமொறு முசுமுசுக்கை தோசை!

"சார்... எங்க வீட்டுல குழந்தைகளுக்கு கீரைன்னாலே பிடிக்காது. ஆனால் முசுமுசுக்கை கீரையை தோசை மாவுல கலந்து தோசை சுட்டு கொடுத்தா, நல்லா சாப்பிடுறாங்க!” என்று என் நண்பர் நாட்டுப்புறப் பாடகர் சிவக்குமார் சொன்னபோது, எனக்கும் ஆச்சரியமாக இருந்தது.

“கீரையைப் பார்த்தாலே ஓடி ஒளிந்து கொள்கிற குழந்தைகள்... கீரை கலந்த தோசையை மட்டும் எப்படி விரும்பிச் சாப்பிடுறாங்க?”

இதற்குப் பின்னால் இருப்பது ஒரு சின்ன சமையல் தந்திரம்தான் மக்களே!

நம் குழந்தைகளுக்குப் பிடிக்காத உணவை வற்புறுத்திக் கொடுப்பதைவிட, அவர்கள் விரும்பிச் சாப்பிடும் உணவுடன் சத்தான கீரையை இணைத்துக் கொடுத்தால், உணவின் மீதான அவர்களுடைய எதிர்ப்பைக் குறைக்கலாம். தோசை அதற்கு மிகவும் பொருத்தமான உணவு.

மொறுமொறுப்பான ஓரம்... மென்மையான நடுப்பகுதி... சாம்பாரில் தொட்டு சாப்பிடும் சுவை...

அதற்குள் முசுமுசுக்கை கீரை! அடடா என்ன மணம்! என்ன ஒரு இதமான தித்திப்பு!

சுவை மாறாமல், உணவின் ஊட்டச்சத்தை குழந்தைகளுக்கும் பெரியவர்களுக்கும் எப்படி செய்து கொடுப்பது...?

வாங்க... முசுமுசுக்கை தோசை செய்வோம்!

தேவையான பொருட்கள்:

தோசை மாவு – 2 கப்

முசுமுசுக்கை கீரை – 1 கப்

துருவிய கேரட் – 2 டீஸ்பூன்

நறுக்கிய வெங்காயம் – ½ கப்

பச்சை மிளகாய் – 1 டீஸ்பூன்

துருவிய இஞ்சி – ½ டீஸ்பூன்

சீரகம் – ½ டீஸ்பூன்

உப்பு – தேவையான அளவு

எண்ணெய் – தேவையான அளவு

செய்முறை:

முசுமுசுக்கை கீரையை நன்றாகக் கழுவி, சிறிதளவு எண்ணெயில் சீரகம், வெங்காயம், பச்சை மிளகாய், இஞ்சி ஆகியவற்றுடன் லேசாக வதக்கவும்.

கீரை சற்றுத் தளர்ந்ததும் அடுப்பை அணைத்து, ஆறவிடவும்.

பின்னர் அதை மிக்சியில் சிறிதளவு தண்ணீர் சேர்த்து அரைத்துக் கொள்ளவும்.

இந்தக் கீரைக் கலவையை தோசை மாவுடன் சேர்த்து நன்றாகக் கலக்கவும். அதில் துருவிய கேரட், தேவையான உப்பு ஆகியவற்றையும் சேர்க்கவும்.

தோசைக்கல்லை சூடாக்கி, மாவை ஊற்றி மெல்லியதாகத் தேய்த்து, சுற்றிலும் சிறிது எண்ணெய் ஊற்றவும்.

ஓரங்கள் பொன்னிறமாக மாறி, தோசை மொறுமொறுப்பாக வந்ததும் எடுத்துப் பரிமாறலாம்.

சூடான முசுமுசுக்கை தோசை தயார்!

சாம்பார் அல்லது தேங்காய் சட்னியுடன் பரிமாறிப் பாருங்கள்.

கீரையைப் பார்த்தாலே ஓடும் குழந்தைகூட,

“அம்மா... இன்னொரு தோசை!”

என்று கேட்டால் ஆச்சரியப்படாதீர்கள்!

தோசை மாவுடன் முசுமுசுக்கை கீரையைச் சேர்க்கும்போது, வழக்கமான தோசைக்கு கீரையின் தாவரச் சேர்மங்களும் கூடுகின்றன.

கேரட் சேர்த்தால் கரோட்டினாய்டுகள் போன்ற தாவரச் சேர்மங்கள் கிடைக்கும்.

வெங்காயம், இஞ்சி, பச்சை மிளகாய், சீரகம் ஆகியவை சுவையை உயர்த்துவதோடு, பல்வேறு தாவர வேதிப்பொருள்களை உணவில் சேர்க்கின்றன.

தோசையுடன் சாம்பார் சேர்த்தால் பருப்பு மற்றும் காய்கறிகளின் ஊட்டச்சத்தும் கிடைக்கும்.

அதாவது...

தோசை + கீரை + காய்கறி + பருப்பு = சுவையான, பல்வகை ஊட்டச்சத்து கொண்ட காலை உணவு!

குழந்தைகளுக்கு மட்டும் அல்ல... பெரியவர்களுக்கும்!

கீரை சாப்பிட மறுக்கும் குழந்தைகளுக்கு மட்டும் இந்தத் தோசை அல்ல.

அவசரமாக காலை உணவை முடிக்க வேண்டிய பெரியவர்களுக்கும் இது ஒரு நல்ல மாற்றமாக இருக்கலாம்.

முசுமுசுக்கையில் என்ன இருக்கிறது?

முசுமுசுக்கை எனப்படும் கார்டியோஸ்பெர்ம்மம் காளிகாகேபம் நம் நாட்டில் பாரம்பரியமாகப் பயன்படுத்தப்பட்டு வரும் கொடி வகைத் தாவரம்.

நவீன ஆய்வுகளில், முசுமுசுக்கையின் பல்வேறு பகுதிகளில் பூக்கும் தாவர நிறமி வகை வேதிப்பொருள்கள், பீனால் கூட்டுப் பொருள்கள், தாவரக் கொழுப்பு ஆல்கஹால் வகைப் பொருள்கள் போன்ற உயிரியல் செயல்பாடு கொண்ட தாவரச் சேர்மங்கள் இருப்பது கண்டறியப்பட்டுள்ளது. மேலும் குளோரோஜெனிக் அமிலம், காஃபிக் அமிலம், ரூட்டின், அபிஜெனின் போன்ற சேர்மங்களும் ஆய்வுகளில் அடையாளம் காணப்பட்டுள்ளன.

இத்தகைய தாவர வேதிப்பொருள்களுக்கு ஆக்ஸிஜனேற்ற எதிர்ப்பு மற்றும் அழற்சி எதிர்ப்பு செயல்பாடுகள் இருப்பதாக ஆய்வுகள் தெரிவிக்கின்றன. ஆரோக்கியமான உணவு என்றாலே சுவையற்ற உணவு என்று நினைக்க வேண்டியதில்லை.

சுவையான உணவுக்குள் சத்தான பொருட்களைச் சேர்ப்பதுதான் நல்ல சமையல் யுக்தி.

முசுமுசுக்கையை மருந்தாக மாற்ற வேண்டாம்.

அதை உணவாக மாற்றுவோம்...

உணவை ஆரோக்கியமான பழக்கமாக மாற்றுவோம்!

Reference