சுடச்சுட ஹோட்டல் ஸ்டைல் வெண்பொங்கல் மற்றும் கொத்சு: 30 நிமிடத்தில் ரெடி!

காலையில் அவசரமாக வேலைக்குக் கிளம்பும் நேரத்தில், பல வீடுகளில் அதிகம் செய்யப்படுவது பொங்கல்தான். ஆனால் நாம் வீட்டில் செய்யும் பொங்கல் மட்டும் ஹோட்டலில் கொடுப்பது போல அந்த அளவுக்குக் குழைவாகவும், மணமாகவும் வருவதில்லையே என்று பலமுறை நீங்கள் யோசித்திருப்பீர்கள். 

ஹோட்டலில் சாப்பிடும் அந்த நெய் வாசனையும், கரண்டியில் எடுக்கும்போது வரும் குழைவான பதமும் நம் வீட்டில் பெரும்பாலும் அமைவதில்லை. அதே சுவையையும் குழைவான பதத்தையும் நம் வீட்டுக் கிச்சனிலேயே கொண்டு வர முடியும். இந்த பதிவை கடைசி வரை படிக்கவும் அப்போதுதான் அந்த ரகசியம் உங்களுக்கு தெரியும். 

பொங்கல் செய்ய தேவையான பொருட்கள்:

• பச்சரிசி - 1 கப்

• பாசிப்பருப்பு - அரை கப்

• நெய் - 3 ஸ்பூன்

• சீரகம் - 1 ஸ்பூன்

• மிளகு - 1 ஸ்பூன்

• முந்திரி - 10 பருப்புகள்

• இஞ்சி - 1 சிறிய துண்டு

• பச்சை மிளகாய் - 2

• கறிவேப்பிலை - 1 கொத்து

• உப்பு - தேவையான அளவு

• தண்ணீர் - 4 அரை கப்

கத்தரிக்காய் கொத்சு செய்ய தேவையான பொருட்கள்:

• கத்தரிக்காய் - 3

• தக்காளி - 2

• பெரிய வெங்காயம் - 1

• புளி - சிறிய நெல்லிக்காய் அளவு

• சாம்பார் பொடி - 1 ஸ்பூன்

• மஞ்சள் தூள் - அரை ஸ்பூன்

• கடுகு, உளுத்தம் பருப்பு - தலா அரை ஸ்பூன்

• எண்ணெய் - 2 ஸ்பூன்

வெண்பொங்கல் செய்முறை!

முதலில் பச்சரிசியையும் பாசிப்பருப்பையும் நன்றாகக் கழுவி, குக்கரில் சேர்க்கவும். அதோடு 4 கப் தண்ணீர், தேவையான அளவு உப்பு மற்றும் 1 ஸ்பூன்நெய் சேர்த்து, குக்கரை மூடி 4 விசில் விட்டு இறக்கவும்.

குக்கர் பிரஷர் அடங்கியதும் மூடியைத் திறந்து, சூடாக இருக்கும்போதே கரண்டியால் நன்றாக மசித்து விடவும். இப்போது ஒரு சிறிய கடாயில் மீதமுள்ள நெய்யை ஊற்றிச் சூடாக்கவும். நெய் சூடானதும் சீரகம், மிளகு சேர்த்து வெடிக்க விடவும்.

அதோடு நறுக்கிய இஞ்சி, பச்சை மிளகாய், முந்திரி மற்றும் கறிவேப்பிலை சேர்த்துப் பொன்னிறமாக வறுக்கவும். இந்தக் கலவையை மசித்து வைத்துள்ள பொங்கலில் கொட்டி நன்றாகக் கிளறினால், கமகமக்கும் ஹோட்டல் பொங்கல் தயார்.

கொத்சு செய்முறை!  

கத்தரிக்காய் மற்றும் தக்காளியைப் பொடியாக நறுக்கிக் கொள்ளவும். அடுத்ததாக புளியைக் கெட்டியாகக் கரைத்து வைக்கவும். இப்போது ஒரு பாத்திரத்தில் எண்ணெய் விட்டு கடுகு, உளுத்தம் பருப்பு தாளிக்கவும். 

பின்னர் நறுக்கிய வெங்காயம், தக்காளி, கத்தரிக்காய் சேர்த்து நன்றாக வதக்கவும். கத்தரிக்காய் முக்கால் பதம் வெந்ததும் மஞ்சள் தூள், சாம்பார் பொடி மற்றும் உப்பு சேர்த்து ஒரு நிமிடம் வதக்கவும்.

இப்போது புளிக்கரைசலை ஊற்றி, தேவையான அளவு தண்ணீர் சேர்த்து நன்றாகக் கொதிக்க விடவும். காய் நன்றாக வெந்து, கொத்சு கெட்டியான பதத்திற்கு வந்ததும் அடுப்பை அணைக்கவும்.

ருசியைக் கூட்டும் 4 டிப்ஸ்!

1. பச்சரிசிக்குப் பதிலாகச் சீரகச் சம்பா அரிசியைப் பயன்படுத்தினால் பொங்கல் இன்னும் அபாரமான மணத்துடன் இருக்கும்.

2. பொங்கலில் சேர்க்கும் தண்ணீரின் அளவு மிகவும் முக்கியம். 1 கப் அரிசிக்கு 3 கப் தண்ணீர் என்ற கணக்கில் சேர்த்தால்தான் குழைவான பதம் கிடைக்கும்.

3. முந்திரி, மிளகு, சீரகம் தாளிக்கும்போது எண்ணெய்க்குப் பதிலாக முழுமையாக நெய்யைப் பயன்படுத்தினால் ஹோட்டல் சுவை அப்படியே கிடைக்கும்.

4. கொத்சு செய்யும்போது கடைசியாகச் சிறிது வெல்லம் சேர்த்தால் அதன் சுவை தூக்கலாக இருக்கும்.

இனி வீக் எண்டில் எந்த ஹோட்டலுக்கும் போக வேண்டாம். இந்த முறையைப் பின்பற்றி நீங்களே சுவையான பொங்கலைச் செய்து வீட்டில் உள்ள அனைவரையும் அசத்துங்கள்.