கமகமக்கும் சுவையான வாழைக்காய்ப் புட்டு... இத செஞ்சா தட்டுல ஒரு பருக்கை கூட மிஞ்சாது!

வாழைக்காய் என்றாலே பஜ்ஜி, வறுவல் அல்லது பொரியல் தான் நம் நினைவுக்கு வரும். ஆனால், வாழைக்காயை வைத்து சுவையான 'வாழைக்காய் புட்டு' செய்ய முடியும் என்றால் நம்புவீர்களா? கல்யாண வீடுகளிலும், விசேஷ நாட்களிலும் பரிமாறப்படும் இந்த வாழைக்காய் புட்டு, தயிர் சாதம், ரசம் மற்றும் சாம்பார் சாதத்திற்கு மிகச் சிறந்த காம்பினேஷனாக இருக்கும். 

வாழைக்காய் சாப்பிட அடம்பிடிக்கும் குழந்தைகள் கூட, இது என்ன காய்கறி என்றே கண்டுபிடிக்க முடியாமல் விரும்பிச் சாப்பிடுவார்கள். உதிரி உதிரியாக, கொஞ்சம் கூட குழைந்து போகாமல் சரியான பக்குவத்தில் இந்த வாழைக்காய் புட்டை எப்படிச் செய்வது என்று இப்போது பார்ப்போம்.

தேவையான பொருட்கள்:

• வாழைக்காய் - 2

• மஞ்சள் தூள் - 1/4 டீஸ்பூன்

• சின்ன வெங்காயம் - 15 அல்லது பெரிய வெங்காயம் - 1

• பச்சை மிளகாய் - 2 

• இஞ்சி - 1/2 அங்குலத் துண்டு 

• பூண்டு - 4 பற்கள் 

• துருவிய தேங்காய் - 4 டேபிள் ஸ்பூன்

• கடுகு - 1/2 டீஸ்பூன்

• உளுத்தம் பருப்பு, கடலைப் பருப்பு - தலா 1 டீஸ்பூன்

• கறிவேப்பிலை, கொத்தமல்லி தழை - சிறிதளவு

• சமையல் எண்ணெய் - 2 டேபிள் ஸ்பூன்

• உப்பு - தேவையான அளவு

செய்முறை!

முதலில், வாழைக்காயின் காம்புப் பகுதியை நறுக்கிவிட்டு, தோலுடன் அப்படியே இரண்டாக வெட்டிக்கொள்ளுங்கள். ஒரு பாத்திரத்தில் தண்ணீர் வைத்து, அதில் சிறிது உப்பு மற்றும் மஞ்சள் தூள் சேர்த்து, வெட்டி வைத்துள்ள வாழைக்காயைப் போட்டு 8 முதல் 10 நிமிடங்கள் மிதமான தீயில் வேகவைக்க வேண்டும். 

வாழைக்காய் குழைந்துவிடக் கூடாது; முட்கரண்டியால் குத்தினால் உள்ளே இறங்கும் அளவுக்கு வெந்திருந்தால் போதும். வெந்த வாழைக்காயை எடுத்து ஆறவைத்தால், அதன் தோல் சுலபமாகக் கழண்டு வந்துவிடும். தோலை உரித்த பிறகு, ஒரு கேரட் துருவியால் வாழைக்காயை உதிரி உதிரியாகத் துருவித் தனியாக வைத்துக் கொள்ளுங்கள்.

இப்போது அடுப்பில் ஒரு அகலமான கடாயை வைத்து 2 ஸ்பூன் எண்ணெய் ஊற்றுங்கள். தேங்காய் எண்ணெயில் தாளித்தால் இதன் சுவை இன்னும் பிரமாதமாக இருக்கும். எண்ணெய் காய்ந்ததும் கடுகு, உளுத்தம் பருப்பு, கடலைப் பருப்பு சேர்த்துப் பொன்னிறமாக வறுக்கவும். 

பருப்பு வறுபட்டதும் பொடியாக நறுக்கிய இஞ்சி, தட்டி வைத்துள்ள பூண்டு, பச்சை மிளகாய் மற்றும் கறிவேப்பிலை சேர்த்து வதக்க வேண்டும். பூண்டின் வாசம் எண்ணெயில் இறங்கியதும், பொடியாக நறுக்கிய வெங்காயத்தைச் சேர்த்துப் பொன்னிறமாக வதக்கிக் கொள்ளுங்கள்.

வெங்காயம் நன்றாக வதங்கியவுடன், நாம் ஏற்கனவே துருவி வைத்துள்ள வாழைக்காயை இதில் சேர்க்க வேண்டும். வாழைக்காயை வேகவைக்கும்போதே உப்பு சேர்த்திருப்பதால், இப்போது வெங்காயத்திற்குத் தேவையான அளவிற்குக் கொஞ்சமாக உப்பு சேர்த்தால் போதும். அடுப்பை முற்றிலும் மிதமான தீயில் வைத்துவிட்டு, மசாலாக்கள் எல்லாம் வாழைக்காயோடு ஒன்றிணையும்படி மெதுவாகப் பிரட்டி விடுங்கள். 

அழுத்திப் பிசைந்தால் புட்டு குழைந்துவிடும். இரண்டு நிமிடங்கள் வதக்கிய பிறகு, துருவி வைத்துள்ள தேங்காயைச் சேர்த்து லேசாகக் கிளறி, நறுக்கிய கொத்தமல்லி இலைகளைத் தூவி அடுப்பை அணைத்துவிடுங்கள்.

கமகமக்கும் கல்யாண வீட்டு ஸ்டைல் 'வாழைக்காய் புட்டு' தயார். இந்த வித்தியாசமான ரெசிபியை இந்த வார இறுதியில் உங்கள் வீட்டில் செய்து அனைவரையும் அசத்துங்கள்.