ஈவ்னிங் ஸ்நாக்ஸ்க்கு செம காம்போ… உருளை பாசிப்பருப்பு சீஸ் பால்ஸ்!

மழை பெய்யும் மாலை நேரங்களில், வழக்கமாகச் செய்யும் பஜ்ஜி, போண்டாக்களைத் தவிர்த்து, சற்று வித்தியாசமாக நாவிற்கு விருந்தளிக்கும் வகையில் ஒரு ஸ்னாக்ஸ் செய்தால் எப்படி இருக்கும்? 

உள்ளே மென்மையாக உருகி வரும் சீஸும், வெளிப்புறம் மொறுமொறுப்பான சுவையும் கொண்ட ஸ்நாக்ஸ் வகைகள் அனைவரையும் சுண்டி இழுக்கும் ஒரு அற்புத உணவாகும். அதிலும், ஆரோக்கியமான பாசிப்பருப்பு மற்றும் உடலுக்கு ஆற்றல் தரும் உருளைக்கிழங்கு சேர்த்துச் செய்யப்படும் சீஸ் பால்ஸ், கடைகளில் விற்கும் பண்டங்களை விட பல மடங்கு சுவையாக இருக்கும். 

குழந்தைகள் முதல் பெரியவர்கள் வரை அனைவரும் கேட்டு வாங்கி உண்ணக்கூடிய இந்த அட்டகாசமான சீஸ் பால்ஸ் உணவை, வீட்டில் உள்ள பொருட்களைக் கொண்டு எப்படி எளிதாக தயாரிக்கலாம் என்று பார்க்கலாம் வாங்க.

தேவையான பொருட்கள்:

• வேகவைத்து மசித்த உருளைக்கிழங்கு - 2

• பாசிப்பருப்பு - 1/2 கப்

• மொஸரெல்லா சீஸ் - சிறு துண்டுகளாக நறுக்கியது

• பெரிய வெங்காயம் - 1

• பச்சை மிளகாய் - 2

• இஞ்சி விழுது - 1/2 தேக்கரண்டி

• கரம் மசாலா - 1/2 தேக்கரண்டி

• சாட் மசாலா - 1/2 தேக்கரண்டி

• பிரெட் தூள் - 1/2 கப்

• சோள மாவு - 2 மேஜைக்கரண்டி

• கொத்தமல்லி இலைகள் - சிறிதளவு

• உப்பு மற்றும் சமையல் எண்ணெய் - தேவையான அளவு

செய்முறை: இந்தச் சிற்றுண்டிக்கு மாவு பிசையும் பக்குவம் மிகவும் முக்கியமானது. முதலில் பாசிப்பருப்பை ஒரு மணி நேரம் தண்ணீரில் ஊறவைத்து, பின்னர் குக்கரில் குழையாமல் உதிரியாக வேகவைத்துத் தண்ணீரை முழுமையாக வடிகட்டிக் கொள்ள வேண்டும். 

ஒரு அகலமான பாத்திரத்தில், கட்டியில்லாமல் மசித்து வைத்துள்ள உருளைக்கிழங்கு மற்றும் வேகவைத்த பாசிப்பருப்பு ஆகிய இரண்டையும் ஒன்றாகச் சேர்க்க வேண்டும். இதனுடன் பொடியாக நறுக்கிய வெங்காயம், பச்சை மிளகாய், இஞ்சி விழுது, கரம் மசாலா, சாட் மசாலா, தேவையான அளவு உப்பு மற்றும் கொத்தமல்லி இலைகளைச் சேர்த்துச் சப்பாத்தி மாவு பதத்திற்கு நன்றாகப் பிசைய வேண்டும். 

மாவு சற்று தளர்வாகக் காணப்பட்டால், அதனுடன் இரண்டு மேஜைக்கரண்டி பிரெட் தூள் சேர்த்துப் பிசைந்துகொள்ளுங்கள். அப்போதுதான் எண்ணெயில் பொரிக்கும்போது விரிசல் வராமல் இருக்கும்.

பிசைந்து வைத்துள்ள மாவில் இருந்து சிறிய எலுமிச்சை அளவு எடுத்து, உள்ளங்கையில் வைத்துத் தட்டையாகத் தட்டிக்கொள்ள வேண்டும். இதன் மையத்தில் ஒரு சீஸ் துண்டை வைத்து, எந்த இடத்திலும் விரிசல் இல்லாதவாறு, சீஸ் வெளியே தெரியாமல் உருண்டையாகப் பிடித்துக் கொள்ளுங்கள். 

இவ்வாறு தயார் செய்த உருண்டைகளைச் சோள மாவு கரைசலில் லேசாக முக்கி எடுத்து, பிரெட் தூளில் நான்கு பக்கமும் ஒட்டும்படி பிரட்டிக் கொள்ள வேண்டும். மிதமான தீயில் எண்ணெயைச் சூடாக்கி, இந்த உருண்டைகளைப் பொன்னிறமாகப் பொரித்து எடுக்க வேண்டும்.

எண்ணெய் சரியான சூட்டில் இருந்தால் மட்டுமே வெளிப்புறம் நல்ல மொறுமொறுப்பாகச் சிவந்து வரும். சுடச்சுட இருக்கும் போதே இரண்டாகப் பிரித்தால், உள்ளே இருந்து உருகி வரும் சீஸ் பார்ப்பதற்கே மிகவும் அழகாக இருக்கும். மாலை நேரங்களில் உங்கள் குடும்பத்தினருக்கு இந்த சூப்பரான சீஸ் பால்ஸ் செய்து கொடுத்து அனைவரின் பாராட்டுகளையும் பெறுங்கள். 

இதனைத் தக்காளி கெட்சப் அல்லது காரமான புதினா சட்னியுடன் சேர்த்துப் பரிமாறினால் இதன் சுவைக்கு ஈடே இருக்காது. சத்துக்களும் சுவையும் நிறைந்த இந்த அற்புதமான சீஸ் பால்ஸ் ரெசிபியை நிச்சயம் உங்கள் சமையலறையில் முயற்சி செய்து பாருங்கள்.