ஹோட்டல் ரகசியம் கசிந்தது… இப்படி மாவு பிசைந்தால் பட்டுரே பலூன் போல உப்பி வரும்!

பொதுவாக சமூக வலைதளங்களில் பார்க்கும் வட இந்திய உணவுகளைச் சுவைக்க வேண்டும் என்ற ஆசை நம்மில் பலருக்கும் தோன்றுவதுண்டு. அதில் அனைவராலும் பெரிதும் விரும்பப்படும் ஒரு உணவுதான் சோலே பட்டுரே. ஆனால், உணவகங்களில் சாப்பிடும் போது கிடைக்கும் அந்த மெதுமெதுப்பான, பலூன் போல உப்பிய பட்டுரே, நாம் வீட்டில் செய்யும் போது மட்டும் ஏன் சரியாக வருவதில்லை என்ற ஏக்கம் பலருக்கும் இருக்கும். 

சில நேரங்களில் அது அப்பளம் போல தட்டையாகிவிடும் அல்லது மிகவும் கடினமாக மாறிவிடும். இதற்கு முக்கிய காரணம், நாம் மாவு பிசையும் முறையில் செய்யும் சிறிய தவறுகள்தான். சரியான பதத்தில் மாவை பிசைந்தால், வீட்டிலும் கடைகளை மிஞ்சும் சுவையில் பெர்ஃபெக்ட்டான உப்பிய பட்டுரே தயார் செய்யலாம். அந்த ரகசிய முறையை இப்போது பார்க்கலாம் வாங்க.

தேவையான பொருட்கள்:

• மைதா மாவு - 2 கப்

• ரவை - 2 ஸ்பூன்

• கெட்டியான புளித்த தயிர் - 3 ஸ்பூன்

• சர்க்கரை - 1 ஸ்பூன்

• பேக்கிங் சோடா - 1/4 ஸ்பூன்

• பேக்கிங் பவுடர் - 1/2 ஸ்பூன்

• உப்பு - தேவையான அளவு

• சமையல் எண்ணெய் - 2 ஸ்பூன்

• வெதுவெதுப்பான நீர் - மாவு பிசைய தேவையான அளவு

செய்முறை!

ஒரு அகலமான பாத்திரத்தில் மைதா மாவை சலித்து எடுத்துக்கொள்ளுங்கள். இதனுடன் ரவை, உப்பு, சர்க்கரை, பேக்கிங் சோடா மற்றும் பேக்கிங் பவுடர் ஆகியவற்றைச் சேர்த்து நன்றாகக் கலந்து கொள்ளுங்கள். இதில் சர்க்கரை சேர்ப்பதால் பட்டுரே எண்ணெயில் பொரியும் போது அருமையான பொன்னிறம் கிடைக்கும். 

அதேபோல, ரவை சேர்ப்பதால் பட்டுரே நீண்ட நேரத்திற்கு சுருங்கிப் போகாமல் அப்படியே உப்பியே இருக்கும். இப்போது இந்த கலவையில் புளித்த தயிர் மற்றும் சிறிதளவு எண்ணெய் சேர்த்து, கைகளால் மென்மையாகக் கலக்க வேண்டும். தயிர் சேர்ப்பதால் மாவில் உள்ள ஈஸ்ட் தன்மை தூண்டப்படும்.

இதன் பிறகு, வெதுவெதுப்பான நீரைச் சிறிது சிறிதாகச் சேர்த்து மாவை பிசையத் தொடங்குங்கள். மாவு அதிக கெட்டியாகவும் இருக்கக் கூடாது, அதே சமயம் அதிக தளர்வாகவும் ஒட்டக்கூடிய வகையிலும் இருக்கக் கூடாது. சப்பாத்தி மாவை விட சற்று கூடுதல் மென்மையாக இருக்க வேண்டும். 

மாவை குறைந்தது 5 முதல் 8 நிமிடங்களுக்கு நன்றாக அடித்து பிசைய வேண்டும். அப்போதுதான் மாவில் Gluten சரியாக உருவாகி, உப்பிய பட்டுரே மிகவும் மென்மையாக வரும். பிசைந்த மாவில் சிறிதளவு எண்ணெய் தடவி, ஒரு ஈரமான பருத்தித் துணியால் மூடி, குறைந்தது இரண்டு மணி நேரம் வெதுவெதுப்பான இடத்தில் ஊற வைக்க வேண்டும். மாவு எந்த அளவிற்கு நேரம் ஊறுகிறதோ, அந்த அளவிற்குப் பட்டுரே சிறப்பாக வரும்.

மாவு நன்கு ஊறிய பிறகு, அதிலிருந்து எலுமிச்சை அளவு சிறிய உருண்டைகளை எடுத்து, சற்று தடிமனாகத் தேய்த்துக் கொள்ளவும். வாணலியில் எண்ணெய் நன்றாகச் சூடானதும், தேய்த்த மாவை உள்ளே போட்டு, ஒரு கரண்டியால் லேசாக அதன் மேல் அழுத்தி விடுங்கள். சூடான எண்ணெய் மாவின் மேல் படும்போது, அது அழகாக பலூன் போல உப்பி வரும். இருபுறமும் திருப்பிப் போட்டு பொன்னிறமாக வெந்ததும் எடுத்தால், சுவையான மற்றும் பெர்ஃபெக்ட்டான உப்பிய பட்டுரே தயார். 

இனிமேல் இந்த உணவிற்காக நீங்கள் எந்த உணவகங்களையும் தேடிச் செல்ல வேண்டியதில்லை. இந்த எளிய குறிப்புகளைப் பின்பற்றி, சூடான சென்னா மசாலாவுடன் சேர்த்து உங்கள் குடும்பத்தினருக்குப் பரிமாறி அசத்துங்கள்.