தோசை உடையுதா? ரொட்டி கெட்டியாகிறதா? சிறுதானிய மாவில் இந்த ரகசியம் தெரியுமா?

இன்றைய சமையலறைகளில் பாரம்பரிய உணவான சிறுதானியங்களுக்கு மீண்டும் முக்கியத்துவம் கிடைத்திருக்கிறது. கம்பு, கேழ்வரகு, சோளம் போன்ற தானியங்களை அரைத்து மாவாக வைத்துக்கொண்டால், பலவிதமான உணவுகளைச் செய்யலாம்.

ஆனால் சிறுதானிய மாவுகளைப் பயன்படுத்தும்போது, உணவின் சுவை மட்டுமல்லாமல் அதன் பதத்தையும் கவனிக்க வேண்டும். எந்த மாவு எந்த உணவுக்கு நன்றாகப் பொருந்துகிறது என்பதைப் புரிந்துகொண்டால், அன்றாட சமையலில் சிறுதானியங்களைச் சேர்ப்பது மிகவும் எளிதாகிவிடும்.

கம்பு மாவு, கேழ்வரகு மாவு, சோள மாவு ஆகிய மூன்றுக்கும் தனித்தனி சுவையும், பதமும் இருக்கிறது. அதனால் உணவுக்கு ஏற்ற மாவைத் தேர்ந்தெடுத்தால் சுவையும் நன்றாக இருக்கும். அப்படி தேர்ந்தெடுப்பதில் சிலருக்கு குழப்பங்கள் ஏற்படும். எனவே எந்த மாவை எந்த உணவிற்கு தேர்ந்தெடுக்கலாம் என்பதை பற்றி இந்த பதிவில் பார்க்கலாம்.

கம்பில் உள்ள சத்துக்கள்

கம்பில் நார்ச்சத்து, புரதம், இரும்புச்சத்து, மெக்னீசியம், பாஸ்பரஸ் போன்ற முக்கிய ஊட்டச்சத்துக்கள் உள்ளன. குறிப்பாக நார்ச்சத்து நிறைந்ததால், வயிறு நிறைவாக இருக்கும் உணர்வைத் தரும். மேலும், கம்பு பலவகையான சிறுதானிய உணவுகளில் சேர்த்துக்கொள்ள ஏற்றது.

கம்பு மாவு – அடை, தோசைக்கு ஏற்றது!

கம்பு மாவுக்கு இயல்பாகவே நல்ல மணமும், சற்றே வலுவான சுவையும் இருக்கும். இதைக் கொண்டு கம்பு அடை, கம்பு தோசை, கம்பு ரொட்டி, கம்பு கூழ் போன்றவற்றைச் செய்யலாம்.

கம்பு மாவுடன் சிறிது அரிசி மாவு அல்லது கோதுமை மாவு சேர்த்தால் தோசை மொறுமொறுப்பாக வரும். வெங்காயம், பச்சை மிளகாய், கறிவேப்பிலை சேர்த்து கம்பு அடை செய்தால் மாலை நேர சிற்றுண்டியாகவும் பரிமாறலாம்.

குறிப்பு: கம்பு மாவை காற்றுப் புகாத டப்பாவில் வைத்து, ஈரப்பதம் இல்லாமல் பாதுகாப்பது அவசியம்.

கேழ்வரகில் உள்ள சத்துக்கள்

கேழ்வரகில் கால்சியம், நார்ச்சத்து, இரும்புச்சத்து, புரதம், பாஸ்பரஸ் போன்ற முக்கிய ஊட்டச்சத்துக்கள் உள்ளன. குறிப்பாக, மற்ற பல தானியங்களுடன் ஒப்பிடும்போது கேழ்வரகில் கால்சியம் அதிகமாகக் காணப்படுகிறது. கூழ், களி, அடை, தோசை போன்ற பல உணவுகளில் இதைச் சேர்த்துக்கொள்ளலாம்.

கேழ்வரகு மாவு – களி, கூழ் முதல் இனிப்பு வரை!

கேழ்வரகு மாவு என்றாலே பலருக்கும் முதலில் நினைவுக்கு வருவது கேழ்வரகு கூழ் மற்றும் களி தான். ஆனால் இதைக் கொண்டு தோசை, அடை, இடியாப்பம், புட்டு போன்றவற்றையும் செய்யலாம்.

கேழ்வரகு மாவில் சிறிது வெல்லம், தேங்காய் சேர்த்து கேழ்வரகு இனிப்பு அடை செய்யலாம். குழந்தைகளுக்குப் பிடிக்கும் வகையில் கேழ்வரகு மாவை கோதுமை மாவுடன் கலந்து சப்பாத்தியும் தயாரிக்கலாம்.

கேழ்வரகு மாவுக்கு தனித்துவமான மணமும் சுவையும் இருப்பதால், மற்ற மாவுகளுடன் கலந்து பயன்படுத்தும் போதும் நல்ல பலன் கிடைக்கும்.

சோள மாவில் உள்ள சத்துக்கள்

சோள மாவில் நார்ச்சத்து, புரதம், இரும்புச்சத்து, மெக்னீசியம், பாஸ்பரஸ் போன்ற ஊட்டச்சத்துக்கள் உள்ளன. நார்ச்சத்து நிறைந்த சோள மாவை ரொட்டி, அடை, தோசை போன்ற உணவுகளில் பயன்படுத்தலாம். மேலும், சோளத்தில் இயற்கையாகவே பல்வேறு தாதுச்சத்துக்களும் உள்ளன.

சோள மாவு – ரொட்டி, அடை, சிற்றுண்டிகளுக்கு!

சோள மாவு, குறிப்பாக பாரம்பரிய உணவுகளில் அதிகம் பயன்படுத்தப்படும் ஒரு மாவு. இதைக் கொண்டு சோள ரொட்டி, சோள அடை, சோள தோசை போன்றவற்றைச் செய்யலாம்.

சோள மாவில் நேரடியாக தண்ணீர் சேர்த்து பிசையும்போது மாவு சற்றுக் கெட்டியாகவும், உடையும் தன்மையுடனும் இருக்கலாம். எனவே வெதுவெதுப்பான தண்ணீரைப் பயன்படுத்தி மாவைப் பிசைந்தால் ரொட்டி செய்வது சுலபமாக இருக்கும்.

சோள மாவுடன் சிறிது கோதுமை மாவு சேர்த்தும் ரொட்டி செய்யலாம். இதனால் மாவு நன்றாகப் பிடித்து, ரொட்டி செய்வதும் எளிதாகும்.

இரண்டு அல்லது மூன்று சிறுதானிய மாவுகளையும் தேவைக்கேற்ப கலந்து தோசை, அடை போன்றவற்றைச் செய்யலாம். முதலில் ஒரு மாவின் அளவு அதிகமாகவும், மற்ற மாவுகளைச் சிறிதளவும் சேர்த்து பழகலாம்.

அரிசி உணவைத் தவிர்த்து  சிறுதானியங்களைச் சேர்ப்போம்!

அரிசி உணவை முற்றிலும் தவிர்க்க வேண்டும் என்பதில்லை. ஆனால், தினசரி உணவில் சிறுதானியங்களுக்கும் இடம் கொடுக்கலாம். கம்பு, கேழ்வரகு, சோளம் போன்றவற்றை மாற்றி மாற்றிப் பயன்படுத்துவதன் மூலம் ஒரே மாதிரியான உணவைச் சாப்பிடும் பழக்கத்திலிருந்து மாறலாம். தோசை, அடை, கூழ், ரொட்டி எனப் பலவிதமான உணவுகளைச் செய்து குடும்பத்தினர் அனைவரும் சுவைக்கலாம். உணவில் பல்வேறு தானியங்களைச் சேர்ப்பதும், அளவோடு சாப்பிடுவதும் ஆரோக்கியமான உணவுப் பழக்கத்துக்கு உதவும்.

சமையலில் நாம் செய்யும் சிறு மாற்றம். நமது குடும்பத்து உணவுப் பழக்கத்தில் நல்ல மாற்றத்துக்கும் ஆரோக்கியத்திற்கும் முதல் படியாக அமையும்! சரியான சிறுதானியத்தை அளவாக பயன்படுத்தி நல்ல உணவுகளை தயாரித்து குடும்ப ஆரோக்கியத்தை மேம்படுத்துவோம்.

எந்தச் சிறுதானிய மாவை எந்த உணவிற்குப் பயன்படுத்த வேண்டும், மாவு உடையாமல் மற்றும் கெட்டியாகாமல் இருக்க என்ன செய்ய வேண்டும் என்ற தெளிவைப் பெற்று, தினசரி சமையலில் ஆரோக்கியமான சிறுதானியங்களை எளிதாகச் சேர்க்கலாம்.