கல்யாண பந்தியில் மணக்கும் பிராமின் ஸ்டைல் சாம்பார் ரகசியம் இதுதான்!

தமிழகத்தின் ஒவ்வொரு வீதியிலும், ஒவ்வொரு குடும்பத்திலும் சாம்பார் பல விதங்களில் செய்யப்பட்டாலும், கல்யாண வீடுகளில் பரிமாறப்படும் அந்த பிரத்யேக சுவைக்கு ஈடு இணையே இல்லை. குறிப்பாக, எந்தவிதமான ரெடிமேட் சாம்பார் பொடியும் பயன்படுத்தாமல், மசாலாப் பொருட்களை உடனுக்குடன் வறுத்து அரைத்துச் செய்யப்படும் பிராமின் ஸ்டைல் அரைத்துவிட்ட சாம்பார் அதன் நறுமணத்தாலேயே பசியைத் தூண்டக்கூடியது. 

வீடுகளில் நாம் என்னதான் முயற்சி செய்தாலும், உணவகங்களிலும் சுப நிகழ்ச்சிகளிலும் கிடைக்கும் அந்த அசல் ருசி வருவதில்லை என்ற குறை பலருக்கும் இருக்கும். ஆனால், சரியான அளவுகளில் பொருட்களை வறுத்து அரைத்தால், அதே கல்யாண வீட்டுப் பாரம்பரிய சுவையை நமது சமையலறையிலும் எளிதாக உருவாக்க முடியும்.

தேவையான பொருட்கள்:

• துவரம் பருப்பு - 1 கப்

• புளி - ஒரு சிறிய எலுமிச்சை அளவ

• சின்ன வெங்காயம் - 10

• முருங்கைக்காய், கேரட், மஞ்சள் பூசணி - 1 கப் 

• தக்காளி - 1 

• மஞ்சள் தூள் - 1/2 ஸ்பூன்

• உப்பு - தேவையான அளவு

• மல்லித்தழை - சிறிது

வறுத்து அரைக்க:

• மல்லி - 2 ஸ்பூன்

• கடலைப்பருப்பு - 1 ஸ்பூன்

• காய்ந்த மிளகாய் - 5 முதல் 6 வரை

• வெந்தயம் - 1/4 ஸ்பூன்

• புதிதாகத் துருவிய தேங்காய் - 4 ஸ்பூன்

• கட்டிப் பெருங்காயம் - ஒரு சிறிய துண்டு

• சமையல் எண்ணெய் - 1 ஸ்பூன்

தாளிக்க:

• நெய் அல்லது நல்லெண்ணெய் - 2 ஸ்பூன்

• கடுகு - 1 ஸ்பூன்

• சீரகம் - 1/2 ஸ்பூன்

• கறிவேப்பிலை - 2 கொத்துகள்

செய்முறை: 

இந்தச் சுவையான உணவைத் தயாரிக்க, முதலில் துவரம் பருப்பை மஞ்சள் தூள் மற்றும் சிறிது எண்ணெய் சேர்த்து நன்கு குழைய வேகவைத்துத் தனியாக எடுத்து வைத்துக் கொள்ளவும். அதன் பிறகு, அடுப்பில் ஒரு வாணலியை வைத்துச் சிறிதளவு எண்ணெய் ஊற்றி, தனியா, கடலைப்பருப்பு, காய்ந்த மிளகாய், வெந்தயம் மற்றும் கட்டிப் பெருங்காயம் ஆகியவற்றை பொன்னிறமாக வறுக்க வேண்டும். 

இறுதியில் துருவிய தேங்காயைச் சேர்த்து லேசாகப் பிரட்டி அடுப்பை அணைத்துவிடலாம். இவை நன்கு ஆறியவுடன், மிக்ஸியில் சிறிது தண்ணீர் சேர்த்து மைய அரைத்துக்கொள்ள வேண்டும். இதுவே இந்த அரைத்துவிட்ட சாம்பார் சுவையின் முக்கிய ரகசியம்.

அடுத்ததாக, ஒரு அகலமான பாத்திரத்தில் நல்லெண்ணெய் ஊற்றி, சின்ன வெங்காயம் மற்றும் தக்காளியைச் சேர்த்து நன்கு வதக்க வேண்டும். இதனுடன் நறுக்கி வைத்துள்ள காய்கறிகளையும் சேர்த்து வதக்கிய பின், கரைத்து வைத்துள்ள புளித்தண்ணீரை ஊற்றி, தேவையான அளவு உப்பு சேர்த்துக் கொதிக்க விட வேண்டும். 

காய்கறிகள் புளிக்கரைசலில் வெந்தவுடன், நாம் அரைத்து வைத்துள்ள மசாலா விழுதை அதனுடன் சேர்த்துக் கிளறவும். மசாலாவின் பச்சை வாசனை மாறியதும், வேகவைத்துள்ள துவரம் பருப்பைச் சேர்த்து நன்றாகக் கொதிக்க விட வேண்டும்.

சாம்பார் நன்கு கொதித்து, ஒரு அருமையான பதத்திற்கு வந்தவுடன், வேறொரு சிறிய தாளிப்புப் கரண்டியில் நெய் ஊற்றி கடுகு, சீரகம், கறிவேப்பிலை ஆகியவற்றைத் தாளித்துக் கொட்ட வேண்டும். இறுதியாக, பொடியாக நறுக்கிய மல்லித்தழையைத் தூவி அடுப்பை அணைத்துவிட்டால், வீடு முழுவதும் மணக்கும் சுவையான பிராமின் ஸ்டைல் அரைத்துவிட்ட சாம்பார் தயார். 

சுடச்சுட சாதத்தில் சிறிது நெய் விட்டு, இந்த சாம்பாரை ஊற்றிச் சாப்பிட்டால் அதன் சுவைக்கு நிகர் வேறெதுவும் இல்லை. இட்லி, தோசை போன்ற சிற்றுண்டிகளுக்கும் இது ஒரு அட்டகாசமான காம்பினேஷனாக அமையும்.