பிடிவாதமான குழந்தையை மென்மையாக மாற்றும் 5 ஜப்பானிய ரகசியங்கள்!

குழந்தையின் பிடிவாதம் என்பது ஒவ்வொரு பெற்றோரும் சந்திக்கும் இயல்பான வளர்ச்சி நிலையிலான ஒரு பகுதியே. ஆனால், அதை சரியாக கையாளவில்லை என்றால் அது கோபம், எதிர்ப்பு, பேசாமல் இருப்பது போன்ற பழக்கங்களாக மாறுகிறது. ஜப்பான் உலகில் மிகவும் அமைதியான, கட்டுப்பாடான, இசைவான குழந்தைகளை உருவாக்கும் நாடு என அறியப்படுகிறது. அவர்களின் பெற்றோர் முறைகளில் தண்டனையோ, கூச்சலோ இல்லாமல் ‘மென்மையான ஒழுக்கத்தை’ மையமாகக் கொண்ட ஆழமான கலாசாரம் உள்ளது. இந்தக் கட்டுரையில், குழந்தையின் பிடிவாதத்தைக் குறைத்து, பொறுமையும் நல்ல பழக்கங்களையும் வளர்க்க உதவும் ஜப்பானிய பெற்றோரின் 5 முக்கிய ரகசியங்களை உங்கள் வீட்டிலேயே நடைமுறைப்படுத்தக்கூடிய விதத்தில் பார்க்கலாம்.

1. ஒமொய்யாரி (Omoiyari) – பிறரின் உணர்ச்சியை உணரச் செய்தல்: ஜப்பானியர்கள் குழந்தைக்கு ‘நீ இப்படிச் செய்தால் மற்றவருக்கு எப்படி இருக்கும்?’ என்று கேட்டு உணர வைத்து வளர்ப்பதால் பிடிவாதம் குறையும், குழந்தை தனது செயலின் விளைவை கவனிக்க கற்றுக்கொள்ளும். உதாரணமாக, ‘நீ சத்தமாக பேசினால் தம்பி பயப்படுவான் இல்லையா?’ என்பது போன்றவை.

2. ஷிட்ஸுக்கே (Shitsuke) – மென்மையான ஒழுக்கம்: இந்த முறை ‘தண்டனையில்லா ஒழுக்கம்’ போன்றது. சத்தமாகப் பேசாமல், அடிக்காமல், அமைதியாகக் கட்டுப்பாட்டை கற்பிக்கும் முறை. ஜப்பான் பள்ளிகளிலும் வீட்டிலும் இதையே பயன்படுத்துகிறார்கள்.

வழிமுறை: விதிகளைத் தெளிவாக சொல்லுதல், முடிவுகளை மெதுவாக விளக்குதல், ஒரே விதியை தினமும் தொடர்ச்சியாகக் கடைப்பிடித்தல்.

3. கமன் (Gaman) – பொறுமையை கற்றுக்கொடுப்பது: குழந்தைக்கு எல்லாம் உடனே கிடைக்காது என்பதை ஜப்பானியர்கள் சிறு வயதிலிருந்து கற்பிக்கிறார்கள். இது பிடிவாதம், கோபக்குறையை குறைக்கும் சக்தி வாய்ந்த பயிற்சி.

எளிய பயிற்சிகள்: ‘ஐந்து நிமிடம் காத்திருந்து பிறகு விளையாடலாம், இது முடிந்த பிறகு உனக்கு நேரம் கொடுக்கிறேன்’ என்பது போன்றவை.

4. மின்னா டே (Minna de) – குழுவாக செய்யும் பொறுப்பு: ஜப்பான் குழந்தைகள் வீட்டில், பள்ளியில் குழுவாகச் செய்யும் பழக்கம் மிக வலுவாக இருக்கும். குழுவில் நடந்துகொள்வது பிடிவாதத்தை இயல்பாகக் குறைக்கும்.

செயல்கள்: ஒன்றாக மேசையை ஒழுங்குபடுத்துதல், விளையாட்டு மைதானத்தை சுத்தம் செய்தல், குடும்ப வேலைகளில் சிறு பங்கு கொடுத்தல்.

5. ஐமை (Aimai) – அமைதியாகப் பேசும் கலாசாரம்: ஜப்பான் பெற்றோர் குழந்தைக்குக் கோபப்படும் முறையைத் தவிர்க்கிறார்கள். அவர்கள் மெதுவாக, குறைந்த சொற்களில் பேசிவிட்டு குழந்தைக்கு சிந்திக்க நேரம் கொடுக்கிறார்கள்.

உதாரணம்: ‘இது சரியா? மீண்டும் யோசிச்சுப் பாரு,’ (சத்தமில்லாமல் சொல்வதால் குழந்தை சுயமாக திருத்திக்கொள்ளும்.)

ஜப்பானிய பெற்றோர் முறையின் அடிப்படை: இரக்கம், பொறுமை, அமைதி, தொடர்ந்து ஒரு விதி, குழுவாக நடக்கக் கற்றல். இதில் அடக்கமும் தண்டனையும் இல்லை, ஆனால், மென்மையான ஒழுக்கமும் மனித நேயமும் உள்ளது. அதனால் பிடிவாதக் குழந்தைகளிடம் நிதானம், சுயக் கட்டுப்பாடு அதிகரிக்கும்.

குழந்தைகள் மாற்றப்பட வேண்டியவர் அல்ல; சரியான வழிகாட்டுதல் தேவைப்படும் ஒரு மலர்ந்த மனம் கொண்ட மனிதர். ஜப்பானிய பெற்றோர் முறைகள் நமக்கு ஒரு உண்மையை காட்டுகின்றன. அமைதி, பொறுமை, சீரான ஒழுக்கம், மற்றவரின் உணர்ச்சியைப் புரிந்துகொள்ளும் திறமை ஆகியவற்றை வளர்த்தால் எந்த குழந்தையையும் மென்மையாகவும் பொறுப்புடனும் மாற்ற முடியும். பிடிவாதம் குறைவதும் ஒரு நாளில் நிகழ்வதில்லை; ஆனால் இந்த 5 ரகசிய முறைகளை நாள்தோறும் நிதானமாகப் பயன்படுத்தினால், உங்கள் குழந்தையின் நடத்தையில் மிகப்பெரிய நேர்மறை மாற்றத்தை நிச்சயம் காணலாம்.