3 மாசத்துக்கு ஒருமுறை மெத்தையை இப்படி திருப்பி போட்டால் புதுசு போல இருக்கும்!

நிம்மதியான தூக்கத்திற்கு நாம் தூங்கும் படுக்கை சுத்தமாக இருக்க வேண்டியது மிக மிக முக்கியம். போர்வை மற்றும் தலையணை உறைகளை மட்டும் வாரந்தோறும் துவைத்துவிட்டு படுக்கையை நாம் பெரும்பாலும் கண்டுகொள்வதே இல்லை. இதனால் கண்ணுக்கு தெரியாத பல நோய்த்தொற்றுகள் ஏற்பட அதிக வாய்ப்புள்ளது.

இதைத் தடுக்க குறைந்தது 3 மாதங்களுக்கு ஒருமுறையாவது சில பிரத்யேகமான மெத்தை பராமரிப்பு வேலைகளை நாம் கட்டாயம் செய்ய வேண்டும். அப்போது தான் நாம் பயன்படுத்தும் படுக்கை நீண்ட காலம் உழைக்கும்.

கண்ணுக்கு தெரியாத அழுக்குகள்! 

நாம் தூங்கும்போது நமது உடலில் இருந்து இயற்கையாகவே உதிரும் இறந்த தோல் செல்கள் மற்றும் முடிகள் படுக்கையின் மேற்பரப்பில் அப்படியே படிந்துவிடும். இவற்றை வெறும் துணியை வைத்து தட்டி சுத்தப்படுத்தவே முடியாது.

ஒரு தரமான வேக்யூம் கிளீனர் கருவியை பயன்படுத்தி படுக்கையின் மூலை முடுக்குகள், மடிப்புகளில் உள்ள கண்ணுக்கு தெரியாத அழுக்குகளை முழுமையாக உறிஞ்சி எடுக்க வேண்டும். இப்படி தொடர்ந்து சுத்தப்படுத்துவதால் தூசுப் பூச்சிகள் எனப்படும் ஒட்டுண்ணிகள் உருவாவது அடியோடு தடுக்கப்பட்டு நமது சருமம் எப்போதுமே பாதுகாப்பாக இருக்கும்.

துர்நாற்றத்தை போக்கும் டிப்ஸ்! 

பொதுவாக இரவு நேரங்களில் நமது உடலில் இருந்து வெளியேறும் வியர்வை மற்றும் ஈரப்பதம் காரணமாக படுக்கையில் நாள்பட ஒருவிதமான கெட்ட வாடை வீச தொடங்கும். இந்த தொல்லையை முற்றிலும் சரிசெய்ய நமது சமையலறையில் இருக்கும் பேக்கிங் சோடா மிகச்சிறப்பாக உதவும். 

படுக்கையின் மேற்பரப்பு முழுவதும் இந்த சோடாவை நன்கு பரவலாக தூவி குறைந்தது 2 மணி நேரம் வரை அப்படியே விட்டுவிட வேண்டும். அதன் பின்னர் வேக்கம் கிளீனர் கொண்டு அதனை முழுமையாக அகற்றிவிட்டால் துர்நாற்றம் நீங்கி படுக்கை மிகவும் பிரெஷ்ஷாக மாறிவிடும்.

கறைகளை துடைத்து எடுக்கும் முறை! 

சில நேரங்களில் படுக்கையில் நாம் குடிக்கும் தேநீர் அல்லது காபி தவறி கொட்டி கறையாக மாறிவிடும். இதுபோன்ற கறைகளை போக்க லேசான பாத்திரம் கழுவும் திரவத்தை சிறிதளவு குளிர்ந்த நீரில் கலந்து ஒரு மென்மையான துணியால் அந்த இடத்தை மட்டும் லேசாக துடைத்து எடுக்க வேண்டும். 

உள்ளே தண்ணீர் செல்லாமல் பார்த்துக்கொள்வது அவசியம். மேலும் Mattress Protector என்ற பாதுகாப்பு உறையை பயன்படுத்துபவர்கள் 3 மாதங்களுக்கு ஒருமுறை அதனை வாஷிங் மெஷினில் போட்டு நன்றாக துவைத்து காயவைப்பது படுக்கைக்கு கூடுதல் பாதுகாப்பை தரும்.

ஆயுட்காலத்தை அதிகரிக்கும் டிப்ஸ்! 

ஒரே இடத்தில் தொடர்ந்து படுத்து உறங்குவதால் படுக்கையின் ஒரு பகுதி மட்டும் சீக்கிரமாக பள்ளமாக மாறி நம் உடலுக்கு அசௌகரியத்தை கொடுக்கும். இதனை தவிர்க்க 3 மாதங்களுக்கு ஒருமுறை படுக்கையை சுமார் 180 டிகிரி கோணத்தில் திருப்பி போட வேண்டும். அதாவது தலைப்பகுதியை கால்பகுதிக்கு வருமாறு மாற்றி அமைக்க வேண்டும். 

உங்களின் படுக்கை இரண்டு பக்கமும் பயன்படுத்தக்கூடிய மாடலாக இருந்தால் அதனை முழுமையாக தலைகீழாகவும் திருப்பி போடலாம். இது படுக்கையின் பஞ்சு ஒரே பக்கமாக அழுந்துவதை தடுத்து அதன் வடிவத்தை சீராக வைத்துக்கொள்ள பெரிதும் உதவும்.

இந்த சுத்தம் செய்யும் வேலைகளை முடித்த பிறகு அறையின் ஜன்னல்களை நன்றாக திறந்து நல்ல காற்றோட்டம், மிதமான சூரிய வெளிச்சம் படுக்கையில் படுமாறு செய்ய வேண்டும். இயற்கையான சூரிய ஒளி அதிலுள்ள எஞ்சிய பாக்டீரியாக்களை முழுமையாக அழித்துவிடும். நமது உடல் நலனுக்கு எப்படி சுத்தமான உணவு தேவையோ அதேபோல சிறப்பான உறக்கத்திற்கு முறையான மெத்தை பராமரிப்பு என்பது ஈடு இணையற்ற ஒரு முக்கிய அங்கமாகும். 

இந்த எளிய பழக்கங்களை நமது வாழ்வில் தொடர்ந்து கடைப்பிடித்தால் நிம்மதியான தூக்கமும் நல்ல ஆரோக்கியமும் நமக்கு என்றென்றும் நிரந்தரமாக கிடைக்கும்.