2026 நவராத்திரி நிறங்கள் குழப்பமா? எந்த கிழமை என்ன நிறம் அணியவேண்டும் என்ற முழு லிஸ்ட்!

இந்த ஆண்டு (2026) நவராத்திரி விழா அக்டோபர் 11 முதல் அக்டோபர் 20 வரை கொண்டாடப்படுகிறது. நவராத்திரி விரதம் இருப்பவர்கள் இந்த ஓன்பது நாட்களும் விரதம் இருந்து சக்தியை வழிபாடு செய்யலாம்.

நவராத்திரி ஒன்பது நாட்களின் வழிபாடு:

முதல் 3 நாட்கள் (துர்க்கை வழிபாடு): தீமைகளை அழிக்கவும், மனஉறுதி பெறவும் துர்கா தேவி வழிபடப்படுகிறாள்.

நடு 3 நாட்கள் (லட்சுமி வழிபாடு): செல்வம், வளம் மற்றும் அமைதி வேண்டி மகாலட்சுமி வழிபடப்படுகிறாள்.

கடைசி 3 நாட்கள் (சரஸ்வதி வழிபாடு): கல்வி, ஞானம் மற்றும் கலைகளில் சிறக்க சரஸ்வதி தேவி வழிபடப்படுகிறாள்.

விஜயதசமி (10-ஆம் நாள்): கல்வி மற்றும் கலைகளைத் தொடங்கவும், புதிய முயற்சிகளுக்கு விதை போடவும் இந்த நாள் உகந்ததாகக் கருதப்படுகிறது.

நவராத்திரி 9 நாட்களுக்கான வண்ணங்கள் மற்றும் தேதிகள்:

நவராத்திரியின் பண்டிகையின் ஒன்பது நாட்களிலும் ஒவ்வொரு நாளுக்கும் ஒரு குறிப்பிட்ட நிறம் ஒதுக்கப் பட்டுள்ளது; பக்தர்கள் அந்தந்த நாளுக்குரிய தேவியை வழிபடும்போது அந்த நிறத்திலான ஆடைகளை அணிந்து வழிபாடு செய்கிறார்கள்.

நவராத்திரியின் முதல் நாள் எந்தக் கிழமையில் வருகிறதோ, அதற்கேற்ப இந்த நிறங்களின் வரிசைத் தொடக்கம் அமைகிறது. ஒவ்வொரு நவராத்திரிக்கும் முன்பாக பஞ்சாங்கங்கள் மற்றும் நாட்காட்டிகளில் வெளியிடப்படும் நிலையான பட்டியலில் இந்த ஒன்பது நிறங்களும் இடம்பெறுகின்றன. நவராத்திரி தொடங்கும் நாளைப் பொறுத்து சில ஆண்டுகளில் இவற்றில் ஒரு நிறத்திற்குப் பதிலாக இளஞ்சிவப்பு நிறம் இடம்பெறலாம்; இருப்பினும், அடிப்படை நிறங்களின் தொகுப்பு மாறாமல் அப்படியே இருக்கும்.

நவராத்திரியின் ஒன்பது வண்ணங்களும் ஒவ்வொரு ஆண்டும் வெவ்வேறு வரிசையில் வருகின்றன. இந்திய ஜோதிடத்தின்படி, வாரத்தின் ஒவ்வொரு நாளுக்கும் ஒரு குறிப்பிட்ட கிரகம் அதிபதியாக உள்ளது; அந்தந்த கிரகத்துடன் தொடர்புடைய ஒரு பாரம்பரிய வண்ணமும் அந்த நாளுக்கு உண்டு.

எனவே, நவராத்திரி தொடங்கும் கிழமையைக் கண்டறிந்து, அந்த நாளுக்கான நிறத்தில் தொடங்கி, பட்டியலின்படி அடுத்தடுத்த நிறங்களைப் பின்பற்ற வேண்டும். ஒவ்வொரு ஆண்டும் தொடக்க நாள் மாறுபடுவதால், பழைய அட்டவணையை மீண்டும் பயன்படுத்துவதற்குப் பதிலாக, அந்தந்த ஆண்டிற்கான நிற வரிசையைச் சரிபார்ப்பது அவசியம். 2026-ஆம் ஆண்டிற்கான நிற வரிசை முறை கீழே கொடுக்கப் பட்டுள்ளது.

2026-ஆம் ஆண்டின் நவராத்திரி வண்ணங்கள், தேதிகள் மற்றும் கிழமைகள்:

நவராத்திரி (Navratri) முதல் நாள் ஞாயிற்றுக்கிழமையாக அமைவதால், 2026-ஆம் ஆண்டிற்கான வண்ண வரிசை 'ஆரஞ்சு' நிறத்துடன் தொடங்குகிறது.

அக்டோபர் 11-ம்தேதி, ஞாயிற்றுக்கிழமை (நாள் 1) - ஆரஞ்சு

அக்டோபர் 12-ம்தேதி, திங்கட்கிழமை (நாள் 2) - வெள்ளை

அக்டோபர் 13-ம்தேதி, செவ்வாய் கிழமை (நாள் 3) - சிவப்பு

அக்டோபர் 14-ம்தேதி, புதன் கிழமை (நாள் 4) - அடர் நீலம் (Royal blue)

அக்டோபர் 15-ம்தேதி, வியாழன் கிழமை (நாள் 5) - மஞ்சள்

அக்டோபர் 16-ம்தேதி, வெள்ளிக்கிழமை (நாள் 6) - பச்சை

அக்டோபர் 17-ம்தேதி, சனிக்கிழமை (நாள் 7) - சாம்பல்

அக்டோபர் 18-ம்தேதி, ஞாயிற்றுக்கிழமை (நாள் 8) - ஊதா

அக்டோபர் 19-ம்தேதி, திங்கட்கிழமை (நாள் 9) - மயில் பச்சை

நவராத்திரியின் ஒவ்வொரு நிறமும் உணர்த்தும் கருத்துகள்:

நவராத்திரி திருவிழாவின் ஒன்பது நாட்களும் ஒன்பது குறிப்பிட்ட நிறங்களை அணிவது, அந்தந்த நாளுக்குரிய தேவியின் அருளையும் நேர்மறை ஆற்றலையும் ஈர்க்கும் ஒரு வழியாகக் கருதப்படுகிறது. ஒவ்வொரு நிறமும் ஒரு தனித்துவமான உணர்வையும் பண்பையும் நமக்குக் கொண்டு சேர்க்கிறது.

ஒவ்வொரு நிறமும் ஏன் விரும்பப்படுகிறது மற்றும் அது எத்தகைய ஆற்றலை உணர்த்துகிறது என்பதன் விரிவான விளக்கம் இதோ:

ஆரஞ்சு:

ஆரஞ்சு நிறம் பக்தி, ஆற்றல் மற்றும் பிரகாசத்தைக் குறிக்கிறது. இது நேர்மறை ஆற்றலையும், மகிழ்ச்சி யையும், ஆன்மீகத் தேடலையும், அறிவையும், உள்மனதில் இருக்கும் தெய்வீக ஒளியையும் குறிக்கிறது. இந்த நிறம் நம் நாளுக்குள் புத்துணர்ச்சியையும் சுறுசுறுப்பையும் ஈர்க்கிறது.

வெள்ளை:

வெள்ளை நிறம் தூய்மை, அமைதி மற்றும் எளிமையின் அடையாளமாகும். அமைதி, பக்குவம் மற்றும் தூய்மையான பக்தியைக் குறிக்கும் இந்நாளில், இந்த நிற ஆடையை அணிவது ஆன்மீக விழிப்புணர்வையும், மனதிற்கு அமைதியையும் நிம்மதியையும், அக ஒளியையும் நம்முள் பெருக்குவதாக நம்பப்படுகிறது.

சிவப்பு:

சிவப்பு நிறம் ஆர்வம், சக்தி, அன்பு மற்றும் வலிமையைக் குறிக்கிறது. இது தேவிக்குச் சாற்றப்படும் புடவையின் நிறமாகவும் இருப்பதால், நவராத்திரியின் மிகவும் மங்களகரமான நிறங்களில் ஒன்றாகக் கருதப்படுகிறது. மேலும் அன்னை பராசக்தியின் மிக உன்னதமான நிறம் என்பதால், எல்லையற்ற ஆற்றல், துணிச்சல் மற்றும் தீமைகளை அழிக்கும் ஆக்ரோஷத்தை உணர்த்துகிறது.

ராயல் ப்ளூ (Royal blue):

ராயல் ப்ளூ நிறம் கம்பீரம், செழுமை மற்றும் தெய்வீக அமைதியை உணர்த்துகிறது. இது தேவியின் எல்லையற்ற ஆற்றலைப் பிரதிபலிக்கும் ஒரு கம்பீரமான நிறமாகும். இது தெய்வீக சக்தியின் கம்பீரத்தையும், நம் மனதில் இருக்கவேண்டிய ஆழமான அமைதியையும், தன்னம்பிக்கையையும் நமக்குக் கற்றுக்கொடுக்கிறது.

மஞ்சள்:

மஞ்சள் நிறம் மகிழ்ச்சி, அறிவு, நேர்மறை எண்ணங்கள் மற்றும் பிரகாசத்தைக் குறிக்கிறது. மஞ்சள் நிறம் என்பது எப்போதும் மங்களகரமான ஒன்றாகவும், பிரகாசத்தைக் கொடுப்பதாகவும் கருதப்படுகிறது. கதகதப்பும் உற்சாகமும் கொண்ட இந்த நிறம் மனநிலையை மேம்படுத்துவதோடு, கல்வி, ஞானம் மற்றும் நேர்மறையான சிந்தனைகளையும் ஈர்க்கும் ஆற்றல் கொண்டது.

பச்சை:

பச்சை நிறம் வளர்ச்சி, இயற்கை மற்றும் புதிய தொடக்கங்களைக் குறிக்கிறது. இது வளம் மற்றும் புதுப்பித்தலின் நிறமாக இருப்பதால், புதிய முயற்சிகளுக்கும் நம்பிக்கைக்கும் மிகவும் ஏற்றது. மேலும் வாழ்வில் வளம், அமைதி, வளர்ச்சி மற்றும் ஆரோக்கியத்தைக் கொண்டுவரும் ஆற்றல் கொண்டது.

சாம்பல்:

சாம்பல் நிறம் அமைதியான வலிமையையும், மாற்றங்களின் போதும் நிலையாக இருக்கும் திறனையும் உணர்த்துகிறது. மேலும் தீமைகளை அழிக்கும் போது தேவி காட்டும் உக்கிரத்தையும், அதேநேரத்தில் பக்தர்களுக்கு அவள் வழங்கும் பாதுகாப்பையும் சமநிலையில் பிரதிபலிக்கிறது.

ஊதா:

ஊதா நிறம் லட்சியம், கண்ணியம் மற்றும் ஆன்மீக நிறைவைக் குறிக்கிறது. செழுமையான மற்றும் கம்பீரமான இந்த நிறம், வளமை, மன ஒருமைப்பாடு, உயர்ந்த நோக்கம், ஞானம் மற்றும் பிரபஞ்ச சக்தியோடு ஒன்றிணையும் ஆற்றலை நமக்கு வழங்குகிறது.

மயில் பச்சை:

மயில் பச்சை நிறம் தனித்துவம், இரக்கம், புத்துணர்ச்சி, பேரழகு மற்றும் கருணைமிக்க, திறந்த மனப்பான்மையைக் குறிக்கிறது. இது தெய்வீக கருணையையும், பக்தர்களின் கோரிக்கைகளுக்கு அன்னை இரங்கி அருள்வதையும் உணர்த்தும் ஒரு சக்திவாய்ந்த நிறமாகும்.

தவிர்க்க வேண்டியவை:

வண்ணங்களின் சிறப்பைத் தக்கவைக்க சில எளிய விஷயங்களைக் கவனத்தில் கொண்டால் போதும். நவராத்திரி என்பது மகிழ்ச்சி, பக்தி மற்றும் கொண்டாட்டத்திற்கான திருவிழா. அதில் நிறங்கள் (ஆடை) என்பவை நம் பக்தி மற்றும் ஒற்றுமையையும், நேர்மறை ஆற்றலையும் வெளிப்படுத்தும் அடையாளமே தவிர, மன அழுத்தத்தை ஏற்படுத்தும் கட்டாய விதிமுறைகள் அல்ல.

நீங்கள் அணியும் ஆடையின் வண்ணத்தின் துல்லியமான சாயலைப் (shade) பற்றி கவலைப்பட வேண்டாம். அந்த வண்ணத்தோடு ஒத்துப்போகும் சாயல் இருந்தாலே போதுமானது.

உதாரணமாக, அன்று 'பச்சை' நிறம் என்றால், அது அடர் பச்சையாகத்தான் இருக்கவேண்டும் என்ற அவசியம் இல்லை. உங்களிடம் இருக்கும் மாம்பழப் பச்சை, கிளிப்பச்சை அல்லது கடல் பச்சை (Sea green) போன்ற எந்தவொரு சாயல் (shade) இருந்தாலும் போதுமானது.

புதிய ஆடைதான் வாங்கவேண்டும் என்பதில்லை. வீட்டில் இருக்கும் பழைய ஆடைகள் அல்லது எளிமையான உடைகள் கூட அந்த நிறத்தில் இருந்தால் போதுமானது.

ஒருவேளை அந்த குறிப்பிட்ட நிறத்தில் ஆடை இல்லை என்றால், அந்த நிறத்தில் ஒரு துப்பட்டா, ஸ்கார்ஃப் அல்லது சிறிய நகைகளை அணிந்து கூட அந்த வண்ணத்தை நம் தோற்றத்தில் கொண்டு வரலாம்.

இறுதியாக, நம் மனதின் தூய்மையும், வழிபாட்டின் மீதான பக்தியும்தான் முக்கியமே தவிர, உடைகளின் நிறம் அல்ல. இந்த புரிதலோடு கொண்டாடும்போது நவராத்திரி இன்னும் அர்த்தமுள்ளதாக மாறும்!