மரணமே இல்லாத மெக்சிகோவின் சிரிக்கும் மீன்: இதயத்தையும் மூளையையும் மீண்டும் வளர்க்கும் மர்மம்!

இயற்கை அன்னை படைத்த உயிரினங்களில் மிகவும் விந்தையான ஒன்றுதான் ஆக்சலோட்டல். பார்ப்பதற்கு எப்போதும் சிரித்துக்கொண்டே இருக்கும் ஒரு பொம்மை போலத் தோன்றும் இந்த உயிரினம், உண்மையில் ஒரு வகை 'சலமண்டர்' (Salamander) எனப்படும் நீர்வாழ் நிலநீர்வாழி (Aquatic Amphibian) ஆகும். இதைப் பற்றிய சுவாரஸ்யமான தகவல்களை இக்கட்டுரையில் காண்போம்.

1. மெக்சிகோவின் சிரிக்கும் மீன்

ஆக்சலோட்டல்கள் 'மெக்சிகன் நடக்கும் மீன்' (Mexican Walking Fish) என்று அழைக்கப்பட்டாலும், உண்மையில் இவை மீன்கள் அல்ல. இவை தவளைகளைப் போன்ற நிலநீர்வாழிகள். மெக்சிகோ நாட்டில் உள்ள சோச்சிமில்கோ ஏரிகளில் மட்டுமே இவை இயற்கையாக வாழ்கின்றன. இவற்றின் முக அமைப்பு இவை எப்போதும் புன்னகைப்பது போன்றே இருக்கும்.

வண்ணங்கள்: இவை இயற்கையில் கருப்பு அல்லது பழுப்பு நிறத்தில் இருக்கும். ஆனால் வளர்ப்புப் பிராணிகளாக இளஞ்சிவப்பு மற்றும் வெள்ளை நிறங்களில் கிடைக்கின்றன.

உணவு: இவை சிறிய புழுக்கள், பூச்சிகள் மற்றும் சிறிய மீன்களை உணவாகக் கொள்கின்றன.

எச்சரிக்கை: இவற்றின் தோல் மிகவும் மென்மையானது என்பதால், இவற்றை வெறும் கைகளால் தொடக்கூடாது

2. 'நியோடெனி' (Neoteny):

பொதுவாகத் தவளைகள் தங்களின் இளமைப் பருவத்தில் (தலைப்பிரட்டை) செவுள்களைக் கொண்டிருக்கும். வளர்ந்ததும் அவை மறைந்து நிலத்தில் வாழத் தொடங்கும். ஆனால், ஆக்சலோட்டல்கள் ஒரு விசித்திரமான பண்பைக் கொண்டுள்ளன. இவை வளர்ந்த பிறகும் தங்களின் இளமைக்கால அடையாளங்களான செவுள்கள் மற்றும் வாலை இழப்பதில்லை. இவை எப்போதும் தண்ணீருக்குள்ளேயே வாழ்கின்றன. இதனை அறிவியலில் 'நியோடெனி' (Neoteny) என்பார்கள்.

3. அதிசயமான உடல் ஆற்றல்:

ஆக்சலோட்டல்களுக்கு ஒரு 'சூப்பர் பவர்' உண்டு. ஒரு விபத்திலோ அல்லது சண்டையிலோ அதன் கால், வால், இதயம் அல்லது மூளையின் ஒரு பகுதி சேதமடைந்தால், அது சில வாரங்களில் மீண்டும் வளர்ந்துவிடும்! மற்ற விலங்குகளுக்குத் தழும்பு ஏற்படுவது போல இல்லாமல், இவை புதிய உறுப்பையே உருவாக்கிவிடும். இந்த அதிசய ஆற்றல் காரணமாகவே மருத்துவ ஆராய்ச்சியாளர்கள் இவற்றைத் தீவிரமாக ஆய்வு செய்கின்றனர்.

4. அழகான கிரீடம்/ செவுள்கள்:

இதன் தலையின் இருபுறமும் இளஞ்சிவப்பு நிறத்தில் இறகுகள் போலத் தெரிவது அதன் செவுள்கள் (Gills). இவை தண்ணீருக்கு அடியில் சுவாசிக்க உதவுகின்றன. பார்ப்பதற்கு தலையில் ஒரு அழகான கிரீடம் அணிந்தது போல இவை காட்சியளிக்கும்.

5. அழியும் நிலையில் உள்ள அதிசயம்:

இவ்வளவு சிறப்புகள் கொண்ட ஆக்சலோட்டல்கள் இன்று இயற்கையில் அழியும் நிலையில் உள்ளன. ஏரிகளில் ஏற்படும் நீர் மாசுபாடு மற்றும் பிற ஆக்கிரமிப்பு மீன்களின் பெருக்கத்தால் இவற்றின் எண்ணிக்கை குறைந்து வருகிறது. தற்போது உலகெங்கிலும் உள்ள ஆய்வகங்களிலும், வீடுகளில் வளர்ப்புப் பிராணிகளாகவும் இவை அதிகம் பாதுகாக்கப்படுகின்றன.

6. இன்றைய தலைமுறையின் பிரபலம்

இன்றைய பள்ளி மாணவர்கள் மத்தியில் ஆக்சலோட்டல்கள் மிகவும் பிரபலம். இதற்குக் காரணம் செல்போன் மற்றும் கணிணியில் மாணவர்களால் விளையாடப்படும் புகழ்பெற்ற 'Minecraft' (மைன்கிராஃப்ட்) விளையாட்டு. அந்த விளையாட்டில் ஒரு முக்கியக் கதாபாத்திரமாக ஆக்சலோட்டல் வருவதால், உலகெங்கிலும் உள்ள சிறுவர்கள் இதனைத் தெரிந்து வைத்துள்ளனர்.

இயற்கையின் விந்தையான படைப்பான ஆக்சலோட்டல்களைப் பாதுகாப்பது நம் கடமையாகும். நீர் நிலைகளைத் தூய்மையாக வைத்திருப்பதன் மூலமே இதுபோன்ற அரிய உயிரினங்களை நாம் அழியாமல் காக்க முடியும்.