ஹாலிவுட் டூ கோலிவுட்: இத்தனை வருஷமா சினிமா நம்மகிட்ட சொன்ன சுவாரசியமான பொய்கள்!

ஒரு திரைப்படம் நம்மை வேறொரு உலகத்திற்கு அழைத்துச் சென்று ரசிக்க வைக்கிறது. ஆனால், கதையின் விறுவிறுப்புக்காகவும், காட்சிகளின் பிரம்மாண்டத்திற்காகவும் ஹாலிவுட் முதல் கோலிவுட் வரை அனைத்து சினிமாக்கள் சில பொய்களை நம்மிடம் கூறி வருகின்றன. நாமும் அவற்றை எந்தக் கேள்வியும் கேட்காமல் அப்படியே உண்மை என்று நம்பி விடுகிறோம். அந்த வகையில், திரையில் தோன்றும், நாம் உண்மை என்று நம்பும் சில சினிமா கட்டுக்கதைகள் பற்றி இந்தப் பதிவில் தெரிந்துகொள்ளலாம்.

சத்தமில்லாத துப்பாக்கிகள்: 

சினிமாவில் கொலையாளிகள் துப்பாக்கியில் 'சைலன்சர்' மாட்டி சுடும்போது, அது வெறும் 'புஸ்' என்ற சிறிய சத்தத்தோடு, தூரத்தில் இருப்பவரைக் கூடக் கொன்றுவிடும். ஆனால் நிஜத்தில், சைலன்சர்கள் துப்பாக்கிச் சத்தத்தை லேசாகக் குறைக்குமே தவிர, முழுமையாக மறைக்காது. அதன் சத்தம் ஒரு கார் டயர் வெடிப்பது போலவோ அல்லது பலத்த பட்டாசு சத்தம் போலவோதான் இருக்கும். 

ஒளிரும் லேசர்கள்:

படங்களில் காட்டப்படும் பாதுகாப்பு லேசர்கள் (Lasers) காற்றில் சிவப்பு நிறக் கோடுகளாக ஜொலிப்பதைக் கண்டிருப்போம். ஆனால், உண்மையில், காற்றில் தூசியோ அல்லது அடர்ந்த புகையோ இல்லாதவரை லேசர்கள் நம் கண்களுக்குத் தெரியவே தெரியாது.

புதைமணல்: 

ஹீரோக்கள் புதைமணலில் (Quicksand) சிக்கி, மெதுவாக உள்ளே இழுக்கப்பட்டு முழுமையாக மூழ்குவது போன்ற காட்சிகள் உங்களை பதற வைத்திருக்கும். ஆனால், இயற்பியல் விதிப்படி மனித உடலின் அடர்த்தி புதைமணலை விடக் குறைவு. எனவே நீங்கள் அதில் மிதக்கலாமே தவிர, சினிமாவில் காட்டுவது போல அது உங்களை முழுமையாக விழுங்கிவிடாது. 

வெடிக்கும் கார்கள்: 

மற்றொரு பிரபலமான காட்சி, கார் லேசாக மோதியவுடன் வானளவு உயரத்திற்கு தீப்பிடித்து வெடிப்பது. நிஜ வாழ்க்கையில் கார்கள் அவ்வளவு எளிதில் வெடிப்பதில்லை; எரிபொருள் தொட்டி சேதமடைந்தாலும் கூட, திரைப்படங்களில் காட்டப்படும் மாபெரும் வெடிவிபத்துகள் நிஜத்தில் அரிதினும் அரிதானவை.

10 வினாடி ஹேக்கிங்: 

திரையில் ஒரு ஹேக்கர் கீபோர்டை அசுர வேகத்தில் தட்ட, கணினித் திரையில் ஏதேதோ எண்கள் ஓடி, பத்தே வினாடிகளில் உலகின் மிகப்பெரிய வங்கியின் ரகசியக் குறியீட்டை உடைத்துவிடுவார். ஆனால், நிஜ உலகில் ஹேக்கிங் என்பது மிகவும் பொறுமையான, மெதுவான ஒரு செயல்முறையாகும். இது அதிரடி ஆக்ஷன் படம் போல இருக்காது, ஒரு கணக்கு புதிரை விடுவிப்பது போல இருக்கும். 

வென்டிலேஷன் குழாய்கள்:

சில ஆக்ஷன் படங்களில் ஹீரோ ஏர் கண்டிஷனர் வென்டிலேஷன் குழாய்களுக்குள் லாவகமாகத் தவழ்ந்து செல்வதைப் பார்த்திருப்போம். உண்மையில், அந்த மெல்லிய தகரக் குழாய்கள் ஒரு பூனையின் எடையைத் தாங்குவதே கடினம், அதில் ஒரு மனிதன் ஏறினால் அது உடனே உடைந்து கீழே விழுந்துவிடும்.

மயக்கம்: 

ஒருவரை தலையில் அடித்து மயக்கமடையச் செய்தால், அவர் சில மணிநேரங்கள் நிம்மதியாகத் தூங்கிவிட்டு எழுவது போல் காட்டுகிறார்கள். ஆனால் மருத்துவ ரீதியாக, ஒரு நபர் சில நிமிடங்களுக்கு மேல் மயக்க நிலையில் இருந்தால், அது தீவிர மூளைக் காயம் அல்லது கோமா நிலைக்கு வழிவகுக்கும்.

இதயத் துடிப்பை மீட்கும் கருவி:

துடிப்பு நின்ற இதயத்தை 'டிஃபிபிரிலேட்டர்' (Defibrillator) எனப்படும் மின்சாரக் கருவி மூலம் 'ஷாக்' கொடுத்து மீண்டும் துடிக்க வைப்பதாகக் காட்டுவது உண்மையல்ல. இந்தக் கருவி தாறுமாறாகத் துடிக்கும் இதயத்தின் ஒழுங்கற்ற தாளத்தை சீரமைக்க மட்டுமே பயன்படும். முற்றிலும் நின்ற இதயத்தை இதனால் இயக்க முடியாது.

துப்பாக்கிக் குண்டுகள் நிஜமும் கார் கதவுகளின் பலவீனமும்:

துப்பாக்கியால் ஒருமுறை சுடப்பட்ட உடனே மனிதர்கள் அப்படியே பின்னோக்கி விழுந்து இறந்துவிடுவது சினிமா வழக்கம். ஆனால், பல நேரங்களில் குண்டடிபட்ட பிறகும் மனிதர்கள் சில நிமிடங்கள் சுயநினைவோடு இருக்கவும், நடக்கவும் முடியும் என்பதுதான் கசப்பான உண்மை. 

மேலும், துப்பாக்கிச் சண்டை நடக்கும்போது ஹீரோக்கள் கார் கதவுகளுக்குப் பின்னால் மறைந்து கொள்வார்கள், குண்டுகளும் காரைத் துளைக்காமல் தெறித்து ஓடும். நிஜத்தில், காரின் கதவுகள் மிக மெல்லிய இரும்புத் தகடுகளால் ஆனவை. சாதாரணத் துப்பாக்கிக் குண்டுகள் கூட காரின் கதவை மிக எளிதாகத் துளைத்துக் கொண்டு மறுபுறம் வந்துவிடும்.

கேமரா ஜூம் ரகசியம்: 

குற்றவாளிகளைக் கண்டுபிடிக்க சிசிடிவி காட்சிகளை 'எண்ஹான்ஸ்' செய்து, மங்கலான முகங்களை தெளிவோடு மாற்றுவது போன்ற காட்சிகள் துப்பறியும் படங்களில் பிரசித்தி பெற்றவை. ஆனால், இல்லாத பிக்சல்களை எந்தவொரு மென்பொருளாலும் உருவாக்க முடியாது; எவ்வளவு ஜூம் செய்தாலும் மங்கலான படம் மங்கலாகவேதான் இருக்கும். 

சிகரெட் நெருப்பு:

பெட்ரோல் ஊற்றப்பட்ட இடத்தில் எரியும் சிகரெட்டைத் தூக்கிப் போட்டதும் பெரிய தீ விபத்து ஏற்படுவது போலக் காட்டுவார்கள். பெட்ரோல் எளிதில் தீப்பற்றக்கூடியது என்றாலும், எரியும் சிகரெட் துண்டின் வெப்பம் திரவ பெட்ரோலை நேரடியாகத் தீப்பற்ற வைக்கும் அளவுக்குப் போதாது என்பது அறிவியல் பூர்வமான உண்மை.

கண்ணாடி ஜன்னல்கள்:

சினிமாவில், ஹீரோக்கள் கண்ணாடி ஜன்னல்களை உடைத்துக் கொண்டு காயம் ஏதுமின்றி வெளியே குதிப்பார்கள். சினிமாவில் அது 'சர்க்கரை கண்ணாடி' (Sugar Glass) என்பதால் ஆபத்தில்லை. ஆனால் சாதாரணக் கண்ணாடி மிகவும் கூர்மையானது மற்றும் கனமானது, அதில் குதித்தால் உயிருக்கே ஆபத்து ஏற்படும். 

திரைப்படங்கள் என்பவை நமது கற்பனைத் திறனை வளர்க்கும் ஒரு பொழுதுபோக்கு ஊடகம். எனவே, திரையில் தோன்றும் சினிமா மேஜிக்குகளை வெறும் சுவாரசியத்திற்காக மட்டும் ரசித்துவிட்டு, நிஜ வாழ்க்கையின் உண்மைகளை சரியாகப் புரிந்து கொள்வதே புத்திசாலித்தனமாகும்.