நெட்ஃபிளிக்ஸில் படம் தேடி அலுத்துவிட்டதா? இதோ உங்களுக்கான ரகசிய 'கோட்ஸ்'!

இன்றைய டிஜிட்டல் உலகில், வார இறுதி நாட்களிலோ அல்லது வேலை முடிந்த பிறகோ நெட்ஃபிளிக்ஸ் (Netflix) தளத்தில் திரைப்படத்தைப் பார்ப்பது பலரது வழக்கமாகிவிட்டது. ஆனால், நெட்ஃபிளிக்ஸ் செயலியைத் திறந்தவுடன் 'என்ன படம் பார்ப்பது?' என்று தேடுவதிலேயே அரை மணி நேரத்திற்கும் மேலாகிவிடுகிறது. நெட்ஃபிளிக்ஸ் நமக்கு வழக்கமாகக் காட்டும் சில பொதுவான திரைப்படங்களின் பரிந்துரைகளைத் தாண்டி, அதனுள் ஒளிந்திருக்கும் ஆயிரக்கணக்கான சிறந்த தமிழ் மற்றும் உலகத் திரைப்படங்களைக் கண்டறிய சில எளிய 'ஹேக்ஸ்' மற்றும் ரகசிய வழிகள் உள்ளன. அவற்றைப் பற்றி இந்தக் கட்டுரையில் விரிவாகப் பார்ப்போம்.

நெட்ஃபிளிக்ஸ் ரகசிய குறியீடுகள்

நெட்ஃபிளிக்ஸ் தளத்தில் உள்ள மிகப்பெரிய ரகசியம் அதன் 'சீக்ரெட் கோட்ஸ்' ஆகும். நாம் திரையில் பார்க்கும் பொதுவான வகைகளைத் தாண்டி, குறிப்பிட்ட பிரிவுகளில் உள்ள படங்களை மட்டும் பிரித்தெடுக்க இந்த எண்கள் உதவுகின்றன.

லேப்டாப் அல்லது மொபைல் பிரவுசரில் https://www.netflix-codes.com/ என்ற முகவரியை உள்ளிட்டால், பல்வேறு வகையான (Genres) திரைப்படங்களின் குறியீடுகள் அதில் தோன்றும். அவற்றுள் உங்களுக்குப் பிடித்த திரைப்பட வகைகளுக்கான குறியீட்டைத் கிளிக் செய்து விருப்பமான திரைப்படங்களைப் பார்க்கலாம். அல்லது இந்த எண்களை copy செய்து நேரடியாக நெட்ஃபிளிக்ஸ் தேடல் பட்டியில் (Search Bar) உள்ளிட்டாலும், அந்த வகைப்பாட்டிற்குரிய திரைப்படப் பட்டியலை உங்களால் பெற முடியும்.

தமிழ் திரைப்படங்களை காண

தமிழ்த் திரைப்படங்களை மட்டும் பிரத்யேகமாகத் தேட விரும்பினால், தேடல் பட்டியில் வெறும் 'Tamil' என்று டைப் செய்வதற்குப் பதிலாக, சில குறிப்பிட்ட உத்திகளைக் கையாளலாம். நெட்ஃபிளிக்ஸ் தேடல் பட்டியில் Tamil-language Movies அல்லது Audio in Tamil என்று டைப் செய்தால் மிகவும் துல்லியமான திரைப்படங்களின் பட்டியலைக் காண்பிக்கும்.

இது தமிழில் உள்ள மாற்று மொழித் திரைப்படங்களையும், தமிழ்ப் படங்களையும் வரிசைப்படுத்தும். அதேபோல், உங்களுக்குத் தமிழ் வசனங்களுடன் (Subtitles) பிற நாட்டுப் படங்களைப் பார்க்க வேண்டுமெனில், Subtitles in Tamil என்று தேடுவதன் மூலம் மாற்று மொழித் திரைப்படங்களை கண்டறியலாம்.

'மை லிஸ்ட்' மற்றும் அல்காரிதத்தை மாற்றுவது

நெட்ஃபிளிக்ஸ் (Netflix) நாம் முன்பு பார்த்த படங்களின் அடிப்படையிலேயே புதிய பரிந்துரைகளைக் காட்டும். எனவே, பல நல்ல திரைப்படங்கள் நமக்குத் தெரியாமலேயே போய்விடுகின்றன.

இதனைத் தவிர்க்க, நீங்கள் பார்க்க விரும்பும் நல்ல தமிழ்ப் படங்களை உடனுக்குடன் 'My List'-ல் சேர்க்க வேண்டும். இதன் மூலம் அல்காரிதம் உங்கள் ரசனையைப் புரிந்துகொண்டு அதுபோன்ற தரமான படங்களை உங்களுக்கு அதிகம் காட்டத் தொடங்கும். ஒருவேளை நீங்கள் தவறுதலாக ஏதேனும் உங்களுக்குப் பிடிக்காத படத்தைப் பார்த்து, அதுபோன்ற பரிந்துரைகளே தொடர்ந்து வந்தால், உங்கள் Account Settings-க்கு சென்று 'Viewing Activity'-ல் அந்தப் படத்தின் வரலாற்றை நீக்கிவிடுவதன் மூலம் உங்கள் முகப்புப் பக்கத்தை மாற்றியமைக்கலாம்.

ஆடியோ மற்றும் சப்-டைட்டில் அமைப்புகள் (Audio Hub)

நெட்ஃபிளிக்ஸ் பிரவுசரின் கீழ் பகுதியில் 'Audio and Subtitles' என்ற தனிப் பிரிவு இருக்கும், இது பலருக்கும் தெரியாத ஒரு சிறந்த அம்சமாகும். அங்குச் சென்று 'Audio' என்பதைத் தேர்ந்தெடுத்து, மொழியில் 'Tamil' என்பதைத் தேர்வு செய்தால், தமிழில் டப் செய்யப்பட்ட ஹாலிவுட், கொரியன் மற்றும் பிற இந்திய மொழித் திரைப்படங்களின் முழுப் பட்டியலும் உங்களுக்குக் கிடைக்கும்.

இதன் மூலம் உலகப் புகழ்பெற்ற ஆங்கில மற்றும் பிற மொழிப் படைப்புகளைத் தமிழில் கண்டு மகிழலாம். ஆனால், இது டிவைஸ் பொறுத்து மாறுபடலாம். குறிப்பாக, லேப்டாப் மற்றும் ஸ்மார்ட் டிவிகளில் நெட்ஃபிளிக்ஸ் முகப்பின் மிகக் கீழே 'Audio and Subtitles' என்ற பிரத்யேக ஆப்ஷன் இருக்கும். ஆனால், மொபைல் செயலியில் இந்த ஆப்ஷன் முகப்புப் பக்கத்தில் இருக்காது. மொபைல் பயனர்கள் தேடல் பட்டியில் Tamil Audio என்று தேடியே இதை அடைய முடியும்.

பிற தளங்களின் மதிப்பீடுகளைப் பயன்படுத்துதல்

நெட்ஃபிளிக்ஸ் தளத்தில் படங்களின் பெயர்கள் மட்டுமே இருக்கும். அவற்றின் தரம் எப்படி என்று நமக்குத் தெரியாது. இதனால் பல நேரங்களில் தவறான படங்களைத் தேர்வு செய்துவிடுகிறோம். இதற்குத் தீர்வாக, 'Trim' அல்லது 'Netflix Ratings' போன்ற குரோம் எக்ஸ்டென்ஷன்களைப் பயன்படுத்தலாம். ஏனெனில், நெட்ஃபிளிக்ஸ் தளத்திற்குள் நேரடியாக IMDb ரேட்டிங் இருக்காது.

இறுதியாக, நெட்ஃபிளிக்ஸில் திரைப்படம் தேடுவது என்பது கடலில் முத்து தேடுவது போன்றது. மேலே குறிப்பிட்டுள்ள எளிய வழிகளையும் குறியீடுகளையும் பயன்படுத்தி தேடினால், உங்களுக்குப் பிடித்தமான சிறந்த தமிழ்ப் படங்களையும் உலகத் தரத்திலான டப்பிங் படங்களையும் எளிதாகக் கண்டறிந்து உங்கள் பொழுதுபோக்கைச் சிறப்பானதாக்கலாம்.