நவம்பர் 1 முதல் மாறும் வங்கி மற்றும் பணம் தொடர்பான விதிகள்! உங்கள் பாக்கெட் காலி?

நவம்பர் 1 முதல் இந்தியாவின் நிதி மற்றும் வங்கித் துறைகளில் பல முக்கிய மாற்றங்களும், காலக்கெடுகளும் நடைமுறைக்கு வருகின்றன. உங்கள் பாக்கெட் மற்றும் பண பரிவர்த்தனைகளைப் பாதிக்கக்கூடிய அந்த முக்கிய விதிகள் இதோ:

எல்பிஜி (LPG) சிலிண்டர் மற்றும் ஏடிஎஃப் (ATF) விலை மாற்றம்:

இந்தியாவில் இந்தியன் ஆயில் (IOCL), பாரத் பெட்ரோலியம் (BPCL), மற்றும் ஹிந்துஸ்தான் பெட்ரோலியம் (HPCL) ஆகிய பொதுத்துறை எண்ணெய் நிறுவனங்கள், சர்வதேச சந்தையில் நிலவும் கச்சா எண்ணெய் விலை மற்றும் அமெரிக்க டாலருக்கு எதிரான இந்திய ரூபாயின் மாற்று மதிப்பு ஆகியவற்றை அடிப்படையாகக் கொண்டு ஒவ்வொரு மாதமும் 1-ம் தேதி வணிக மற்றும் வீட்டு உபயோக சமையல் எரிவாயு (LPG) மற்றும் விமான எரிபொருள் (ATF) விலைகளை மாற்றி அமைக்கின்றன. சில மாதங்களில் விலையில் எந்தவித மாற்றமும் செய்யப்படாமல் அப்படியே தொடர்வதும் உண்டு.

அக்டோபர் 1-ம்தேதி 19 கிலோ எடை கொண்ட வணிக எல்பிஜி சிலிண்டரின் விலை ரூ.71.50 உயர்த்தப்பட்டது. அதேசமயம் வீட்டு உபயோக சிலிண்டர் விலையில் எந்த மாற்றமும் செய்யப்படவில்லை. விமான எரிபொருள் விலை லிட்டருக்கு ரூ.16 அதிகரித்து, ஒரு லிட்டர் ATF விலை ரூ.121-ல் இருந்து ரூ.137 ஆக உயர்ந்தது.

ஓய்வூதியதாரர்களுக்கான வாழ்நாள் சான்றிதழ் (Life Certificate):

எஸ்பிஐ (SBI) உள்ளிட்ட அனைத்து வங்கிகள், மாநில மற்றும் மத்திய அரசு மூலம் ஓய்வூதியம் (Pension) பெறும் நபர்கள், தங்களின் வருடாந்திர வாழ்நாள் சான்றிதழை (Jeevan Pramaan) நவம்பர் 1 முதல் நவம்பர் 30-க்குள் சமர்ப்பிக்க வேண்டும்.

80 வயதிற்கு மேற்பட்டவர்கள் அக்டோபர் மாதமே சமர்ப்பிக்கத் தொடங்கியிருந்தாலும், மற்ற அனைவரும் நவம்பர் மாதத்திற்குள் இதைச் சமர்ப்பிக்க வேண்டும். தவறினால் டிசம்பர் மாதம் முதல் ஓய்வூதியம் நிறுத்தப்படலாம். ஆதார் அடிப்படையிலான Jeevan Pramaan செயலி மூலம் வீட்டிலிருந்தபடியே முக அங்கீகாரம் (Face Authentication) செய்து இதை இலவசமாகச் சமர்ப்பிக்கலாம்.

வருமான வரித் தாக்கல் (ITR) நீட்டிக்கப்பட்ட காலக்கெடு:

கணக்குத் தணிக்கை (Tax Audit) செய்ய வேண்டிய வணிகர்கள் மற்றும் தொழில்முறை வல்லுநர்களுக்கான நிதியாண்டு 2025-26 (வரி ஆண்டு 2026-27)-க்கான வருமான வரித் தாக்கல் செய்வதற்கான காலக்கெடுவை மத்திய நேரடி வரிகள் வாரியம் (CBDT) நவம்பர் 21 வரை நீட்டித்துள்ளது. முன்னதாக அக்டோபர் 31 ஆக இருந்த இந்தக் காலக்கெடு, தணிக்கையாளர்கள் மற்றும் வரி செலுத்துவோரின் வசதிக்காக நீட்டிக்கப்பட்டுள்ளது குறிப்பிடத்தக்கது.

ஜிஎஸ்டி உள்ளீட்டு வரி வரவு (GST ITC) காலக்கெடு:

வணிகர்கள் மற்றும் நிறுவனங்கள், நிதியாண்டு 2025-26 தொடர்புடைய தங்களது கொள்முதல் இன்வாய்ஸ்கள் (Invoices) மற்றும் டெபிட் நோட்டுகள் மீதான விடுபட்ட ஜிஎஸ்டி உள்ளீட்டு வரி வரவைக் (ITC) கிளைம் செய்வதற்கு நவம்பர் 30 கடைசி நாளாகும். இந்தத் தேதிக்கு மேல் முந்தைய நிதியாண்டின் ஐடிசி-ஐ கோர முடியாது.

CGST சட்டம் பிரிவு 16(4)-ன் கீழ் இதுவே இறுதி சட்டப்பூர்வ வரம்பாகும். அதற்குள் வாங்குபவர்கள் தங்களின் GSTR-2B மற்றும் சப்ளையர் பதிவேடுகளை ஒப்பிட்டு சரிபார்த்து ITC-ஐப் பெற வேண்டும், இல்லையெனில் இந்த வரவு ரத்தாகிவிடும்.

புதிய GST மாதாந்திர ரிட்டன் படிவ மாற்றங்களுக்கான பொதுக் கருத்து (Feedback):

ஜிஎஸ்டி கவுன்சிலின் பரிந்துரையின்படி, மாதாந்திர ஜிஎஸ்டி ரிட்டன் படிவங்களில் செய்ய உத்தேசிக்கப்பட்டுள்ள மாற்றங்கள் குறித்து வணிகர்களிடமிருந்து கருத்துக்களைப் பெறும் நடைமுறையை மத்திய நிதியமைச்சகம் நவம்பர் 1-ம்தேதி முதல் தொடங்குகிறது.

உள்ளீட்டு வரி வரவு (ITC) மற்றும் வரிப் பொறுப்புகளில் ஏற்படும் முரண்பாடுகளைக் குறைத்து, தேவையற்ற நோட்டீஸ்கள் அனுப்பப்படுவதைத் தவிர்க்க இந்த புதிய படிவங்கள் மாற்றி அமைக்கப்படவுள்ளன.

வணிகம் சார்ந்த யுபிஐ பரிவர்த்தனைக்கு கட்டணம் அமல்:

அக்டோபர் 15 முதல், ரூ.2,000-க்கு மேற்பட்ட வணிகம் சார்ந்த யுபிஐ பரிவர்த்தனைகளுக்கு 0.4% வரை கட்டணம் (MDR) விதிக்கப்படும் என்றும் இக்கட்டணம் வர்த்தகர்களுக்கு மட்டுமே பொருந்தும், சாதாரண நுகர்வோருக்கு யுபிஐ சேவைகள் எப்போதும் போல இலவசமாகவே தொடரும் என்று இந்திய தேசிய கொடுப்பனவு கழகம் (NPCI) அறிவித்திருந்தது. கடைகளில் பொருட்​கள் வாங்​கு​வது, கியூஆர் கோடு ஸ்கேன் செய்து பணப் பரி​மாற்​றம் செய்​வது எனப் பொது​மக்​களுக்​கான எந்​தவொரு பரி​வர்த்​தனைக்​கும் எவ்​வித கட்​ட​ண​மும் வசூலிக்​கப்​படாது.

அதேபோன்​று, நண்​பர்​கள் / உறவினர்​களுக்​குப் பணம் அனுப்​புதல் உள்​ளிட்ட தனி​நபர்​களுக்கு இடையி​லான (பி2பி) பணப் பரி​மாற்​றங்​கள், சுய கணக்​குப் பரி​மாற்​றங்​கள் ஆகியவை எவ்​வித வரம்​புமின்றி எப்​போதும் போல இலவச​மாகவே இருக்​கும்.

இந்த MDR கட்டணம் அக்டோபர் 15 முதல் அமலுக்கு வரவிருந்த நிலையில், தீபாவளி முடிந்த பிறகு (நவம்பர் 8-க்குப் பின்) அறிவிக்கப்படும் என்று தேசிய கொடுப்பனவுக் கழகம் (NPCI) தெரிவித்துள்ளது. அதன்படி, தீபாவளி முடிந்த பிறகு இதுகுறித்த அறிவிப்பு வெளியாகும் என தெரிகிறது.

சொத்து ஆவணங்களுக்கு காகிதமற்ற பதிவு முறை கட்டாயம்:

தமிழ்நாட்டில் குடும்பச் சொத்துகள் தொடர்பான குறிப்பிட்ட 4 வகையான பத்திரப் பதிவுகளுக்கு நவம்பர் 2 முதல் காகிதமற்ற (Paperless) பதிவு முறை கட்டாயமாக்கப்பட்டுள்ளது. அதாவது, செட்டில்மெண்ட் பத்திரம் (Gift Settlement Deed), விடுதலைப் பத்திரம் (Release Deed), பாகப்பிரிவினைப் பத்திரம் (Partition Deed), செட்டில்மெண்ட் ரத்து பத்திரம் (Revocation/Cancellation of Settlement Deed) ஆகிய 4 வகையான பத்திரப் பதிவுகளுக்கு காகிதமற்ற பதிவு முறை கட்டாயமாக்கப்பட்டுள்ளது. வணிக வரிகள் மற்றும் பதிவுத்துறையின் நவீனமயமாக்கல் திட்டமான 'STAR 3.0' கீழ் இந்த முறை அமல்படுத்தப்படுகிறது.

சம்பந்தப்பட்ட ஆவணங்கள் மற்றும் அதற்குரிய ஆதாரங்களை ஆன்லைன் தளத்தில் உருவாக்கி பதிவேற்றம் செய்ய வேண்டும். பரிசீலனைக்குப் பின், டிஜிட்டல் முறையில் பதிவு செய்யப்படும் ஆவணம் விண்ணப்பதாரரின் ஆன்லைன் கணக்கிற்கு அனுப்பி வைக்கப்படும் மற்றும் STAR அமைப்பில் பாதுகாப்பாக சேமிக்கப்படும்.

ஆவணங்கள் ஆன்லைனில் சமர்ப்பிக்கப்பட்டாலும், அடையாள உறுதிப்படுத்தலுக்காகவும் (Aadhaar Authentication) ஒப்புதலுக்காகவும் சம்பந்தப்பட்ட தரப்பினர் சார்பதிவாளர் அலுவலகத்திற்கு நேரில் செல்ல வேண்டியிருக்கும்.

செல்போன் திரையில் அன்னிய நபர்களின் பெயர் கட்டாயம் :

இந்தியத் தொலைத்தொடர்பு ஒழுங்குமுறை ஆணையம் (TRAI) மற்றும் மத்திய தொலைத்தொடர்புத் துறை (DoT), நவம்பர் 1 முதல் அனைத்து உள்நாட்டு அழைப்புகளிலும் அழைப்பவரின் உண்மையான பெயரைச் செல்போன் திரையில் காட்டுவதை கட்டாயமாக்கியுள்ளது. இதற்காக CNAP (Calling Name Presentation) என்ற புதிய தொழில்நுட்பச் சேவை அறிமுகப்படுத்தப்படுகிறது. முதற்கட்டமாக இந்த சேவை 4G மற்றும் 5G நெட்வொர்க்குகளில் இயங்கும். (2G, 3G மற்றும் லேண்ட்லைன் சேவைகளுக்குப் பிறகு பரிசீலிக்கப்படும்). வெளிநாடுகளில் இருந்து வரும் அழைப்புகளுக்குப் பெயருக்குப் பதிலாக "International Call" என்ற வாசகம் திரையில் தோன்றும். வணிகம் மற்றும் விளம்பர அழைப்புகளை மேற்கொள்ளும் நிறுவனங்கள், தங்களது அதிகாரப்பூர்வ வர்த்தகப் பெயரை (Trade Name/GST Name) மட்டுமே பயன்படுத்த வேண்டும்.

ஆன்லைன் பண மோசடிகள், போலி அழைப்புகள் (Cyber Fraud/Digital Arrest) மற்றும் தேவையற்ற விளம்பர அழைப்புகளில் (Spam Calls) இருந்து பொதுமக்களைப் பாதுகாப்பதற்காக இந்த அதிரடி நடவடிக்கை எடுக்கப்பட்டுள்ளது.