ஹாட் பாக்ஸில் உணவு எப்படி சூடாக இருக்கிறது? வியக்க வைக்கும் அறிவியல் ரகசியம்!

ஹாட் பாக்ஸ் முதல் முதலாக அறிமுகப்படுத்தப்பட்ட பிறகு எந்த வீட்டில் எந்த விசேஷம் நடந்தாலும் இதை பரிசாக கொடுப்பதை அனைவரும் விரும்பி செய்தனர். பின்னர் இதன் உபயோகம் எல்லோருக்கும் பொருந்திவர ஹாட் பாக்ஸ் இல்லாத வீடே இல்லை என்ற அளவுக்கு இதன் செல்வாக்கு பெருக ஆரம்பித்தது.

இன்று அனைத்து பெண்மணிகளும் சமையலை முடித்ததும் உணவுப்பொருளை ஹாட் பாக்ஸில் மாற்றிவிட்டுத்தான் வேறு வேலையே பார்ப்பார்கள். அந்த அளவுக்கு உதவிகரமாக இருக்கிறது ஹாட் பாக்ஸ். கூடவே இதில் உணவை அடைத்து செல்லும் இடமெல்லாம் எடுத்து செல்வதற்கும் பயன்படுத்தி வருகிறோம்.

இவ்வாறு பயன்படுத்தப்படும் ஹாட்பாக்ஸ் (Hotbox அல்லது Casserole) உணவுப் பொருட்களை நீண்ட நேரம் சூடாக வைத்திருப்பதற்குப் பின்னால் இயங்கும் முக்கிய அறிவியல் தத்துவம் வெப்பக் கடத்துதலைத் தடுத்தல் (Prevention of Heat Transfer) ஆகும்.

அறிவியல் ரீதியாக வெப்பம் மூன்று வழிகளில் பரவுகிறது: வெப்பக் கடத்துதல் (Conduction), வெப்பச் சலனம் (Convection), மற்றும் வெப்பக் கதிர்வீச்சு (Radiation). ஹாட்பாக்ஸ் இந்த மூன்றிலிருந்தும் உணவைப் பாதுகாக்கப் பின்வரும் தொழில்நுட்பத்தைப் பயன்படுத்துகிறது. அதைப் பற்றி தெரிந்துகொள்வோம் வாருங்கள்!

இரட்டைச் சுவர்கள் மற்றும் வெற்றிடத் தொழில்நுட்பம்:

பெரும்பாலான தரமான ஹாட்பாக்ஸ்களின் உள் மற்றும் வெளிப் பகுதிகள் இரண்டு அடுக்குகளாக (Double-walled) வடிவமைக்கப்பட்டிருக்கிறது.இந்த இரண்டு சுவர்களுக்கு இடையில் காற்று அடைக்கப்பட்ட இடைவெளியோ அல்லது வெற்றிடமோ (Vacuum) இருக்கும். காற்று வெப்பத்தை மிக மெதுவாகவே கடத்தும் (Poor conductor of heat) என்பதால், உள்ளே இருக்கும் உணவின் சூடு வெளிப்பகுதிக்குக் கடத்தப்படுவதை இது தடுத்து நிறுத்துகிறது.

பாலியூரிதீன் ஃபோம் இன்சுலேஷன்:

வீடுகளின் சுவர்களில் பயன்படுத்தப்படும் தெர்மாகோல் போன்ற பாதுகாப்பு அமைப்பை இந்த ஹாட் பாக்ஸுக்கு வழங்குவது எது வென்றால், பாலியூரிதீன் ஃபோம் இன்சுலேஷன் என்ற பொருள்தான். ஹாட் பாக்சின் உள் மற்றும் வெளிச்சுவர்களுக்கு இடைப்பட்ட பகுதியில் PUF (Polyurethane Foam) எனப்படும் அடர்த்தியான இன்சுலேஷன் பொருள் நிரப்பப்பட்டிருக்கிறது.

இந்த இன்சுலேஷன்தான் ஒரு சிறந்த வெப்பத் தடுப்பானாகச் (Thermal Insulator) செயல்பட்டு, பாத்திரத்திற்குள்ளேயே வெப்பம் சுழன்று வெளியேறாமல் இருக்க ஒரு தடையை ஏற்படுத்துகிறது. இந்தத் தடை தான் உணவுப் பொருட்கள் நீண்ட நேரம் சூடாக இருப்பதற்கு காரணமாகிறது.

ஸ்டெயின்லெஸ் ஸ்டீல் உட்பகுதி:

ஹாட்பாக்ஸின் உட்பகுதி துருப்பிடிக்காத எஃகு (Stainless Steel) மூலம் செய்யப்பட்டிருக்கிறது.ஸ்டீல் என்பது வெப்பத்தைத் தாங்கும் தன்மைகொண்டதுடன், உணவில் உள்ள வெப்பத்தைத் தன் குளிர்ந்த வெளிப்பகுதிக்கு எளிதில் கடத்தாமல் உள்ளேயே தக்கவைத்துக்கொள்ளும் தன்மை கொண்டதாக இருப்பதும் உணவு நீண்ட நேரம் சூடாக இருப்பதற்கு ஒரு காரணமாகும்.

காற்றுப்புகா மூடி மற்றும் பூட்டு அமைப்பு:

உணவு நீண்ட நேரம் சூடாக இருப்பதற்கு மிக முக்கியமான காரணம் ,ஹாட்பாக்ஸின் மூடி காற்றுப்புகாதவாறு (Airtight) மிக இறுக்கமாகப் பொருந்தும்படி வடிவமைக்கப்பட்டிருப்பதை கண்கூடாக காண்கிறோம் .இது உள்ளே இருக்கும் சூடான நீராவியும் காற்றும் வெளியேறுவதைத் தடுக்கிறது.

இந்த 'வெப்பச் சலனம்' (Convection) மூலம் வெப்பம் வெளியேறுவது முழுமையாகத் தடுக்கப்படுகிறது. இதனாலும் ஹாட் பாக்ஸின் உட்பகுதியில் உள்ள உணவு சூடாக இருக்கிறது.

சுருக்கமாகச் சொன்னால்: ஹாட்பாக்ஸ் என்பது வெப்பத்தை உருவாக்கும் சாதனம் அல்ல; மாறாக, உணவில் உள்ள இயற்கையான சூட்டை வெளியேற விடாமல் வெப்பப் பாதுகாப்புக் கவசமாகக் (Thermal Blanket) செயல்பட்டு நீண்ட நேரம் உணவின் சூட்டை பாதுகாக்கும் ஒரு எளிய அறிவியல் தொழில்நுட்பம் கொண்ட அற்புதமான சாதனமாகும்.

ஆதாரம்: ஹாட்பாக்ஸ்களில் பயன்படுத்தப்படும் இரட்டைச் சுவர்கள் மற்றும் பாலியூரிதீன் ஃபோம் இன்சுலேஷன் (Polyurethane Foam Insulation) ஆகியவை வெப்பக் கடத்துதலைத் தடுத்து, உள்ளிருக்கும் உணவின் சூட்டை நீண்ட நேரம் வெளியேறாமல் பாதுகாக்கும் இயற்பியல் தத்துவத்தைக் கொண்டுள்ளன.

இதைப் படிப்பதன் மூலம் ஹாட் பாக்ஸில் நீண்ட நேரம் சூடு எப்படி நிலை கொண்டு இருக்கிறது; அதற்கான அறிவியல் காரணம் என்ன என்பதை தெளிவாகப் புரிந்து கொள்ளலாம்.