தினமும் 30 நிமிடம் போதும்! குழந்தைகளை ஓடி ஆட விடுங்கள்; நோய் எதிர்ப்பு சக்தி பெருகும்!

இன்றைய குழந்தைகளின் வாழ்க்கை நான்கு சுவர்களுக்குள் சுருங்கிவிட்டது. பள்ளி, பயிற்சி வகுப்புகள், தொலைக்காட்சி, கைப்பேசி, மின்னணு விளையாட்டுகள் என பெரும்பாலான நேரம் வீட்டுக்குள்ளேயே கழிகிறது. இதன் விளைவாக, வைட்டமின் டி குறைபாடு உலகளவில் வேகமாக அதிகரித்து வரும் ஒரு முக்கிய சுகாதாரப் பிரச்சினையாக மாறியுள்ளது. ஆனால் தினமும் சிறிது நேரம் இயற்கைச் சூரிய ஒளியில் விளையாடுவது, குழந்தையின் உடல் மற்றும் மனநலத்திற்கு விலைமதிப்பற்ற ஒன்றாகும்.

சூரிய ஒளி – வைட்டமின் டியின் இயற்கை தொழிற்சாலை

நமது தோலில் சூரியனின் புற ஊதாக் கதிர்கள் (UV rays) படும்போது, உடலே வைட்டமின் டி₃-ஐ உருவாக்கத் தொடங்குகிறது. உணவில் மட்டும் கிடைக்கும் அளவு போதுமானதல்ல. அதனால்தான் சூரிய ஒளியை 'இயற்கையின் இலவச மருந்து' என்று அழைக்கிறோம்.

உறுதியான எலும்புகளின் அடித்தளம் D3 

வைட்டமின் டி இல்லாமல், உணவில் இருக்கும் கால்சியம் மற்றும் பாஸ்பரஸ் முழுமையாக உடலில் உறிஞ்சப்படாது. இதன் விளைவாக எலும்புகள் வலுவிழக்கின்றன. சிறுவர்களில் ரிக்கெட்ஸ் (எலும்பு மெலிவு நோய்), வளர்ச்சி தாமதம், கால்கள் வளைதல் போன்ற பிரச்சினைகள் ஏற்படலாம்.

தசைகளின் சக்தியை அதிகரிக்கும்

எலும்புகள் மட்டுமல்ல; தசைகளும் வைட்டமின் டியை நம்பியே செயல்படுகின்றன. போதுமான அளவு இருந்தால் குழந்தைகள் வேகமாக ஓடவும், குதிக்கவும், சமநிலையுடன் விளையாடவும் முடியும். குறைபாடு இருந்தால் தசை பலவீனம், அடிக்கடி விழுதல், சோர்வு போன்றவை ஏற்படலாம்.

நோய் எதிர்ப்பின் இயற்கை நண்பன்

வைட்டமின் டி, உடலின் நோய் எதிர்ப்பு அணுக்களை சுறுசுறுப்பாகச் செயல்பட உதவுகிறது. சில ஆய்வுகள், போதுமான அளவு வைட்டமின் டி உள்ள குழந்தைகளுக்கு சில சுவாசத் தொற்றுகள் மற்றும் சில ஒவ்வாமை நோய்களின் தாக்கம் குறையக்கூடும் எனக் காட்டுகின்றன. இது உடலின் பாதுகாப்பு அமைப்பைச் செழுமைப்படுத்துவதிலும் பங்கு வகிக்கிறது.

மனமும் மூளையும் மலரச்சியாக இருக்க உதவுகிறது

மாலை நேரத்தில் வெளியில் விளையாடும் குழந்தைகள் அதிக மகிழ்ச்சியாகவும், அமைதியாகவும் இருப்பதை பெற்றோர் உணரலாம். இயற்கை ஒளி உடலின் உயிரியல் கடிகாரத்தை ஒழுங்குபடுத்தி, நல்ல தூக்கத்திற்கும், மன உற்சாகத்திற்கும், கவனக்குவிப்பிற்கும் உதவுகிறது. திறந்த வெளியில் விளையாடுவது மனஅழுத்தத்தையும் குறைக்கிறது.

மாலை விளையாட்டு – உடற்பயிற்சியும் நட்பும்

மாலைச் சூரிய ஒளியில் நண்பர்களுடன் ஓடி விளையாடுவது ஒரு முழுமையான உடற்பயிற்சி. இதனால் இதய நலம், உடல் எடை கட்டுப்பாடு, நுரையீரல் திறன், சமூகத் திறன், தன்னம்பிக்கை ஆகியவை வளர்கின்றன. எந்த மின்னணு விளையாட்டும் இதற்கு ஈடாக முடியாது.

இன்று உலகம் முழுவதும் குழந்தை மருத்துவர்களும் எலும்பியல் நிபுணர்களும் கூறும் செய்தி ஒன்றே - வைட்டமின் டி குறைபாடு அதிகரித்து வருகிறது; ஆனால் அதன் தீர்வு நம் வீட்டின் வாசலுக்கு வெளியிலேயே உள்ளது.

குழந்தைகளை மாலைச் சூரியனுடன் நண்பர்களாக்குங்கள்.

ஏனெனில்…

'சூரிய ஒளியில் தினமும் விளையாடும் குழந்தைகள், வைட்டமின் டி மட்டுமல்ல வலிமையான எலும்புகளும், உறுதியான தசைகளும், சுறுசுறுப்பான செயலும், நல்ல நோய் எதிர்ப்பும், மகிழ்ச்சியான மனமும் கொண்டு ஆரோக்கியமாக திகழ்கின்றனர்.'