தினமும் காஃபி குடிக்கிறீர்களா? கல்லீரல் முதல் இதயம் வரை கிடைக்கும் நன்மைகள்!

காலையில் ஒரு கப் சூடான காஃபி இல்லாமல் நாளைத் தொடங்க முடியாதவர்கள் ஏராளம். புத்துணர்ச்சியையும் சுறுசுறுப்பையும் தரும் காஃபி உண்மையில் உடல்நலத்திற்கு நல்லதா? அல்லது அதிகமாகக் குடித்தால் பாதிப்பை ஏற்படுத்துமா? என்ற கேள்வி பலருக்கும் இருக்கிறது. சமீபத்திய ஆய்வுகள், அளவோடு பருகப்படும் காஃபிக்கு சில ஆரோக்கிய நன்மைகள் இருப்பதாகத் தெரிவிக்கின்றன.

காஃபியில் காஃபீன் மட்டுமின்றி பாலிபீனால்கள் உள்ளிட்ட பல தாவரச் சேர்மங்களும் உள்ளன. இவை ஆன்டிஆக்ஸிடன்ட் மற்றும் அழற்சி எதிர்ப்பு செயல்பாடுகளைக் கொண்டிருக்கலாம். காஃபி அருந்துவது டைப்-2 நீரிழிவு, இதய நோய், பக்கவாதம் மற்றும் சில கல்லீரல் நோய்களின் அபாயம் குறைவதுடன் தொடர்புடையதாக பல ஆய்வுகள் தெரிவிக்கின்றன.

குறிப்பாக, காஃபி அருந்துபவர்களுக்கு கல்லீரல் புற்றுநோய், கல்லீரல் நார்த்திசு மற்றும் சிரோசிஸ் ஏற்படும் அபாயம் குறைவாக இருக்கலாம் என்று ஆராய்ச்சிகள் கூறுகின்றன.

காஃபீன் மூளையில் விழிப்புணர்வை அதிகரித்து, கவனம் செலுத்தவும் தற்காலிகமாக ஆற்றலை அதிகரிக்கவும் உதவுகிறது. ஆனால் அதன் தாக்கம் அனைவருக்கும் ஒரே மாதிரியாக இருப்பதில்லை. அதிகப்படியான காஃபீன் பதற்றம், நடுக்கம், இதயத் துடிப்பு, வயிற்று அசௌகரியம் மற்றும் தூக்கமின்மை போன்ற பிரச்சினைகளை ஏற்படுத்தலாம். குறிப்பாக மாலை அல்லது இரவு நேரத்தில் காஃபி குடிப்பது தூக்கத்தின் தரத்தை பாதிக்கக்கூடும்.

ஆரோக்கியமான பெரியவர்களுக்கு தினசரி மொத்த காஃபீன் அளவு 400 மில்லிகிராமுக்குள் இருப்பது பொதுவாக பாதுகாப்பானதாகக் கருதப்படுகிறது. ஒரு சாதாரண 240 மில்லி அளவு காஃபியில் சுமார் 95 மில்லிகிராம் காஃபீன் இருக்கலாம். இருப்பினும், காஃபியின் அளவு, தயாரிக்கும் முறை மற்றும் தனிநபரின் உணர்திறன் ஆகியவற்றைப் பொறுத்து காஃபீன் அளவு மாறும்.

சர்க்கரை, கிரீம், சாக்லேட் சிரப் போன்றவற்றை அதிகமாகச் சேர்த்த காஃபி கூடுதல் கலோரிகளை வழங்கும். எனவே, குறைந்த சர்க்கரையுடன் அல்லது சர்க்கரை இல்லாமல் காஃபி பருகுவது சிறந்தது. மேலும், ஃபில்டர் மூலம் தயாரிக்கும் காஃபியைத் தேர்வு செய்வது நல்லது. வடிகட்டாத காஃபியில் உள்ள சில சேர்மங்கள் எல்டிஎல் கொழுப்பை அதிகரிக்கக்கூடும்.

காஃபியை வெறும் காஃபீன் கிடைக்கும் பானமாக மட்டும் பார்க்க வேண்டியதில்லை. காஃபி விதையில் உள்ள இயற்கைச் சேர்மங்களும் அதன் ஆரோக்கிய விளைவுகளில் பங்கு வகிக்கின்றன. காஃபீனுக்கு அதிக உணர்திறன் உள்ளவர்கள் குறைந்த அளவு காஃபியையோ டிகாஃப் காஃபியையோ தேர்வு செய்யலாம். கர்ப்பிணிகள் தினசரி காஃபீனை 200 மில்லிகிராமுக்குள் கட்டுப்படுத்துவது பரிந்துரைக்கப்படுகிறது.

மேலும், காலை உணவுடன் அல்லது உணவுக்குப் பிறகு குடிப்பது சிலருக்கு வயிற்று அசௌகரியத்தை குறைக்க உதவலாம். தாகத்தைத் தீர்க்க தண்ணீருக்கு மாற்றாகக் காஃபியை கருதாமல், போதுமான தண்ணீரையும் தினமும் குடிப்பது அவசியம். எந்த ஆரோக்கிய நன்மைக்காகவும் காஃபியை கட்டாயமாகத் தொடங்க வேண்டிய அவசியமில்லை.

நல்ல தூக்கம், சீரான உணவு, உடற்பயிற்சி ஆகியவற்றுக்கு மாற்றாக காஃபியை நினைக்கக் கூடாது. குறிப்பாக இரவில் காஃபி பழக்கம் இருப்பவர்கள் நேரத்தை மாற்றிப் பார்ப்பது நல்லது. உடலின் மாற்றத்தை கவனிக்கவும்.

காஃபி தோட்டத்தில் இருந்து நம் கப் வரை:

காஃபி நம் கையில் வருவதற்கு முன் அது ஒரு சுவாரஸ்யமான பயணத்தை கடக்கிறது. காஃபி செடிகள் பொதுவாக வெப்பமண்டலப் பகுதிகளில் வளர்க்கப்படுகிறது. அராபிகா காஃபி மற்றும் ரோபஸ்டா காஃபி ஆகியவை உலகில் வணிக ரீதியாக அதிகம் பயிரிடப்படும் முக்கிய காஃபி வகைகளாகும்.

காஃபி செடியில் முதலில் சிறிய வெள்ளை மலர்கள் பூக்கும். பின்னர் பச்சை நிறத்தில் தோன்றும் காஃபி பழங்கள், பழுத்ததும் சிவப்பு அல்லது மஞ்சள் நிறமாக மாறுகிறது. இந்த பழங்களுக்குள் இருக்கும் விதைகள் தான் நாம் பயன்படுத்தும் காஃபி பீன்ஸ்.

பழுத்த பழங்களை அறுவடை செய்த பிறகு, அவற்றிலிருந்து விதைகள் பிரிக்கப்படுகின்றன. சில இடங்களில் பழங்களை வெயிலில் உலர்த்தி விதைகளைப் பிரிக்கும் உலர் முறையும், தண்ணீர் பயன்படுத்தி பழச் சதையை நீக்கும் ஈர முறையும் பின்பற்றப்படுகிறது.

பின்னர் பச்சை காஃபி விதைகள் உலர்த்தப்பட்டு தரம் பிரிக்கப்பட்டு வறுக்கப்படுகின்றன. வறுக்கும் அளவைப் பொறுத்து காஃபியின் நிறம், மணம், சுவை மாறுகிறது. இப்படிப் பல நிலைகளைக் கடந்து வரும் ஒரு கப் காஃபி, விவசாயியின் உழைப்பையும் இயற்கையின் கொடையையும் நமக்கு நினைவூட்டுகின்றன.

காஃபி தோட்டங்களில் மரங்களுடன் இணைந்து காஃபி வளர்ப்பது மண்ணின் வளத்தையும் பல்லுயிர் பெருக்கத்தையும் பாதுகாக்க உதவும் முறையாகக் கருதப்படுகிறது. எனவே காஃபியை ரசிக்கும் போது அதன் பின்னுள்ள விவசாய உழைப்பையும் நாம் மதிக்க வேண்டும்.

தரமான காஃபி கிடைப்பதற்கு மண், மழை, உயரம், வெப்பநிலை போன்ற இயற்கை காரணிகளும் முக்கிய பங்கு வகிக்கின்றன என்பதை நினைவில் கொள்ளலாம்.

காஃபி ஒரு மருந்தல்ல; அதே நேரத்தில் அது முழுமையாகத் தவிர்க்க வேண்டிய பானமும் அல்ல. உடல்நிலை, வயது மற்றும் காஃபீனுக்கான தனிப்பட்ட உணர்திறனை கருத்தில் கொண்டு அளவோடு பருகினால், காஃபி ஒரு நல்ல பானமாக இருக்கலாம். தூக்கப் பிரச்சினை, கட்டுப்படுத்தப்படாத ரத்த அழுத்தம் போன்றவை இருப்பவர்கள் மருத்துவரின் ஆலோசனையுடன் அளவைக் குறைப்பது பாதுகாப்பானது. முக்கியம் காஃபி குடிப்பதல்ல; அதை எவ்வளவு, எப்போது, எப்படிக் குடிக்கிறோம் என்பதுதான் முக்கியம்!

காஃபி என்பது வெறும் புத்துணர்ச்சிக்கான பானம் மட்டும் அல்ல. பலரது அன்றாட வாழ்க்கையின் ஓர் அங்கமாக மாறி விட்டது. அதன் சுவையையும் மணத்தையும் ரசித்தாலும் அளவோடு அருந்துவது நல்லது. நம் உடல் நிலை, வயது பழக்கவழக்களுக்கு ஏற்ப காஃபி உட்கொள்ளும் அளவைத் தீர்மானித்துக் கொண்டால் அதன் சுவையையும் புத்துணர்ச்சியையும் ஆரோக்கியமான முறையில் தொடர்ந்து அனுபவிக்கலாம்!

Reference