2026 உலக கை கழுவும் தினம்: கிருமிகளை அழித்து ஆரோக்கியம் காக்கும் எளிய வழிகள்!

இன்று (அக்டோபர் 15) உலக கை கழுவும் தினம். நோய்களைத் தடுத்து உயிர்களைக் காக்கக்கூடிய மிக எளிய, செலவில்லாத ஒரு பழக்கம்தான் சோப்பு போட்டு கைகளைக் கழுவுவது. இதன் முக்கியத்துவத்தை உலகெங்கும் உணர்த்துவதற்காக, 2008-ஆம் ஆண்டு 'குளோபல் ஹேண்ட்வாஷிங் பார்ட்னர்ஷிப்' (Global Handwashing Partnership) என்ற அமைப்பால் இந்த சிறப்பு தினம் உருவாக்கப்பட்டது. 

இந்த ஆண்டின் விழிப்புணர்வுக் கருப்பொருள் "கை கழுவும் ஹீரோவாக இருங்கள்" (Be a Handwashing Hero) என்பதாகும். குழந்தைகள் முதல் பெரியவர்கள் வரை அனைவரும் இந்த ஆரோக்கியமான பழக்கத்தைப் பின்பற்றி ஒரு ஹீரோவாக மாறலாம் என்பதே இதன் நோக்கம்.

கை கழுவுதல் ஏன் இவ்வளவு முக்கியம்? 

நமது அன்றாட வாழ்வில் மொபைல் போன்கள், கதவு கைப்பிடிகள், மேஜைகள் எனப் பல பொருட்களை நாம் தொடுகிறோம். இவற்றில் கண்ணுக்குத் தெரியாத கிருமிகள் ஏராளமாக வாழ்கின்றன. கைகளைக் கழுவாமல் அந்த கிருமிகளுடன் நமது கண்கள், மூக்கு அல்லது வாயைத் தொடும்போது, அந்த நோய்க்கிருமிகள் எளிதாக நமது உடலுக்குள் நுழைந்துவிடுகின்றன. நோய் கட்டுப்பாட்டு மையத்தின் அறிக்கையின்படி, முறையாகக் கைகளைக் கழுவுவதால் ஏற்படும் நன்மைகள் பல. 

• வயிற்றுப்போக்கு சம்பந்தமான நோய்களை 23% முதல் 40% வரை குறைக்கிறது.

• சளி, காய்ச்சல் போன்ற சுவாசக் கோளாறுகளை 16% முதல் 21% வரை தடுக்கிறது.

• உடல்நலக்குறைவால் குழந்தைகள் பள்ளிக்கு விடுமுறை எடுப்பதை 29% முதல் 57% வரை கணிசமாகக் குறைக்கிறது.

• மேலும், Norovirus, Salmonella, E. coli மற்றும் Hepatitis A போன்ற வேகமாகப் பரவும் நோய்களைத் தடுப்பதில் இது மிக முக்கியப் பங்கு வகிக்கிறது.

சுத்தமான கைகளுக்கான 5 எளிய டிப்ஸ்!

சுகாதார அமைப்புகள் பரிந்துரைக்கும் இந்த 5 டிப்ஸ்களைப் பின்பற்றி கைகளைச் சுத்தம் செய்யுங்கள்:

1. சுத்தமான ஓடும் நீரில் கைகளை நனைத்து, சோப்பு போடவும்.

2. கைகளை நன்றாகத் தேய்த்து நுரை வரச் செய்யவும். உள்ளங்கை, புறங்கை, விரல்களுக்கு இடுக்குகள் மற்றும் நகங்களுக்கு அடியிலும் நன்றாகத் தேய்க்க வேண்டும்.

3. குறைந்தது 20 விநாடிகளுக்குக் கைகளைத் தேய்த்துக் கழுவவும்.

4. மீண்டும் சுத்தமான ஓடும் நீரில் கைகளை நன்றாக அலசவும்.

5. இறுதியாக, சுத்தமான துண்டு அல்லது ஏர் ட்ரையர் மூலம் கைகளை முழுமையாகத் துடைத்து உலர்த்தவும்.

கை கழுவ வேண்டிய மிக முக்கியமான நேரங்கள்: 

கீழ்க்காணும் தருணங்களில் கைகளைச் சுத்தமாகக் கழுவுவதை ஒரு கட்டாயப் பழக்கமாக்கிக் கொள்ளுங்கள்.

• உணவு சமைப்பதற்கு முன், சமைக்கும் போது, சமைத்த பின் மற்றும் சாப்பிடுவதற்கு முன்பு.

• கழிவறையைப் பயன்படுத்திய பின், குழந்தையின் டயப்பரை மாற்றிய பின் அல்லது குழந்தையைச் சுத்தம் செய்த பின்பு.

• இருமல், தும்மல் அல்லது மூக்கைச் சிந்திய பிறகு.

• விலங்குகள், அவற்றின் உணவுகள் அல்லது அவற்றின் கழிவுகளைத் தொட்ட பிறகு.

• காயங்களுக்கு மருந்து போடுவதற்கு முன்பும் பின்பும்; நோயாளிகளைக் கவனித்துக்கொள்வதற்கு முன்பும் பின்பும்.

நமது ஆரோக்கியம் மிகவும்  விலைமதிப்பற்றது. அந்த ஆரோக்கியத்தை வெறும் சோப்பு மற்றும் தண்ணீர் மூலம் நம்மால் பாதுகாத்துக்கொள்ள முடியும். நோய்களைத் தடுக்கும் முதல் அரணாக விளங்கும் இந்தக் 'கை கழுவுதல்' பழக்கத்தை நாமும் பின்பற்றுவோம், நம் வருங்கால தலைமுறைக்கும் கற்றுக்கொடுப்போம். ஆரோக்கியமான சமுதாயத்தை உருவாக்க, நாமும் ஒரு 'ஹேண்ட்வாஷிங் ஹீரோ' ஆவோம்.

Reference