மறைந்திருக்கும் உப்பு அபாயம்: உடல்நலக் கேடுகளைத் தவிர்ப்பது எப்படி?

உப்பு உணவுக்கு சுவை அளிப்பதோடு உடலின் சீரான செயல்பாடுகளுக்கு அவசியமானது. ஆனால் தேவைக்கு அதிகமாக உணவில் சேர்த்துக் கொள்ளும்போது சிறுநீரகம், இதயம் உட்பட பல உறுப்புகளுக்கு கடுமையான பாதிப்பை. ஏற்படுத்துகிறது. அது பற்றி இந்தப் பதிவில் விரிவாக பார்ப்போம்.

ஒரு நாளுக்கு எவ்வளவு உப்பு தேவை?

மனிதர்கள் தேவையான அளவு உப்பு எடுக்காமல் இருக்கும்போது உடலின் நீர் சமநிலையைப் பாதித்து மூளைக்கும் தசைகளுக்கும் இடையேயான சமிக்கை பரிமாற்றத்தில் சிக்கலையும், தைராய்டு பிரச்னைகளை ஏற்படுத்தும்.

ஆரோக்கியமாக இருக்கும் மனிதர் ஒரு நாளைக்கு சுமார் ஐந்து முதல் ஆறு கிராம் அளவுள்ள ஒரு டீஸ்பூன் வரை மட்டுமே உப்பு எடுத்துக் கொள்ள வேண்டும். ரத்த அழுத்த நோயாளிகள் 3.5 கிராம் வரை எடுத்துக் கொண்டாலே போதுமானது. இந்த அளவை மீறும் போதுதான் ஆரோக்கியம் பாதிக்கப்படுகிறது.

அதிகமான உப்பு ஏற்படுத்தும் விளைவுகள்

ரத்த அழுத்தம் அதிகரித்தல்

உடலில் அதிக உப்பு சேரும்போது அது ரத்தத்தில் நீரை ஈர்க்கிறது. இதனால் ரத்தத்தின் அளவு அதிகரித்து ரத்தக் குழாய்களில் அழுத்தம் அதிகமாகி, உயர் ரத்த அழுத்தத்திற்கு வழிவகுக்கிறது.

இதய செயலிழப்பு

ரத்த அழுத்தம் அதிகரிக்கும்போது இதயம் அதிகமாக வேலை செய்ய வேண்டி இருப்பதால் மாரடைப்பு மற்றும் இதய செயலிழப்பு ஏற்படும் வாய்ப்புகள் அதிகரிக்கின்றன.

சிறுநீரகச் சேதம்

சிறுநீரகத்தின் வேலை உடலில் உள்ள அதிகப்படியான உப்பை வெளியேற்றுவதுதான். தொடர்ந்து அதிக உப்பை உட்கொள்ளும்போது வடிகட்டும் பணியின் சுமை காரணமாக நெஃப்ரான்கள் சேதமடைந்து சிறுநீரக செயலிழப்பு ஏற்படுகிறது.

சிறுநீரகக் கல்

அதிக உப்பு காரணமாக சிறுநீர் வழியாக கால்சியம் அதிகமாக வெளியேறி சிறுநீரகக் கல் உருவாகிறது.

பிற பாதிப்புகள்

கட்டுப்பாடற்ற உயர் ரத்த அழுத்தம் பக்கவாதத்தின் அபாயத்தையும் அதிகரிக்கிறது. அதிகளவு உப்பை சேர்க்கும்போது கணுக்கால், பாதங்கள் அல்லது கைகளில் வீக்கம் ஏற்படலாம். வயிறு உப்புசம் மற்றும் அசவுகரித்தையும் ஏற்படுத்தும். உடலில் சோடியத்தின் அளவு அதிகரிக்கும் போது அதை சமன் செய்ய அதிக நீர் தேவைப்படுவதால் வாய் வறண்டு தாகம் அதிகமாக எடுக்கும். தூங்குவதில் சிரமம், நள்ளிரவில் விழித்தெழுதல் போன்ற பாதிப்புகளையும் ஏற்படுத்தும்.

உப்பு அதிகமாக உள்ள பொருட்கள்

நாம் கடைகளில் வாங்கும் தின்பண்டங்களில் உப்புச் சுவை இல்லாத உணவுகளில் கூட சோடியம் மறைந்து இருக்கும். பதப்படுத்தப்பட்ட தின் பண்டங்களான சிப்ஸ் பாக்கெட், மிக்ஸர், முறுக்கு, சால்ட் பிஸ்கட்டுகள் போன்றவற்றில் அதிகப்படியான உப்பு சேர்க்கப்படுகிறது. பீட்சா, பர்கர், வறுத்த கோழி, நூடுல்ஸ் போன்றவற்றிலும் அதிகப்படியான சோடியம் உள்ளது. உறைய வைக்கப்பட்ட சூப்புகள், பதப்படுத்தப்பட்ட இறைச்சிகள் போன்றவற்றில் அதிக உப்பு உள்ளது.

சோயா சாஸ், கெட்சப், ஊறுகாய்கள் சாலட் டிரஸ்சிங்களில் சுவை கூட்டியாக அதிகப்படியான சோடியம் சேர்க்கப்படுகிறது. ஒரு டேபிள் ஸ்பூன் ஊறுகாயிலேயே அதிக அளவு சோடியம் இருக்கும். ரொட்டி, சில வகையான சீஸ், பட்டர் மில்க் போன்றவற்றிலும் அதிக அளவு உப்பு உள்ளது.

என்ன செய்ய வேண்டும்?

கடைகளில் பதப்படுத்தப்பட்ட உணவை வாங்கும்போது சோடியம் அளவை சரிபார்த்து குறைந்த சோடியம் உள்ள உணவுகளை தேர்ந்தெடுக்க வேண்டும். வீட்டு உணவுகளான இட்லி சாதம் போன்றவற்றில் உப்பின் அளவை குறைத்துக்கொள்ள வேண்டும். புதிய பழங்கள், காய்கறிகள், வீட்டில் சமைத்த உணவுகளில் இயற்கையாகவே சோடியம் குறைவாக இருக்கும்.

உப்புக்கு மாற்றாக எலுமிச்சைசாறு, மூலிகைகள், மசாலாப் பொருட்கள், பூண்டு போன்றவற்றை பயன்படுத்தி சுவையை மேம்படுத்தலாம். உப்பின் அளவைக் குறைத்து இதயநோய், உயர் ரத்த அழுத்தம், சிறுநீரக பாதிப்பு ஆகிவற்றிலிருந்து நம் உடலை பாதுகாத்துக் கொள்ள வேண்டியது அவசியமாகும்.