ஜிம் போறீங்களா? காபியில் கிரியேட்டின் கலந்து குடித்தால் தீங்கு விளைவிக்குமா?

இன்றைய ஃபிட்னஸ் உலகில், தசை வலிமையை அதிகரிக்க கிரியேட்டின் மற்றும் சுறுசுறுப்பிற்கு காபி என இரண்டுமே தவிர்க்க முடியாதவை. ஆனால், இவை இரண்டையும் ஒன்றாகக் கலந்து குடித்தால் என்னவாகும்? இது உங்கள் ஒர்க்அவுட் வேகத்தை இரட்டிப்பாக்குமா அல்லது ஆரோக்கியத்திற்கு தீங்கு விளைவிக்குமா? என இந்தக் கட்டுரையில் தெரிந்துகொள்ளலாம்.

கிரியேட்டின் என்றால் என்ன?

சர்வதேச விளையாட்டு ஊட்டச்சத்து சங்கத்தின் (JISSN) ஆய்வுகளின்படி, 'கிரியேட்டின் மோனோஹைட்ரேட்' (Creatine Monohydrate) என்பது தசை வளர்ச்சிக்காக அதிகம் ஆராயப்பட்ட ஒரு பொருளாகும். இது தசைகளில் உள்ள பாஸ்போகிரியேட்டின் இருப்பை அதிகரிக்கிறது. இதன் மூலம் செல்கள் ஆற்றலை வேகமாக உற்பத்தி செய்கின்றன. குறிப்பாக பளு தூக்குதல், ஓட்டம் போன்ற தீவிர பயிற்சிகளின் போது இது உடலுக்கு அபார வலிமையைத் தருகிறது.

அதேசமயம், காபியை எடுத்துக்கொண்டால், இதில் உள்ள கஃபைன் நமது நரம்பு மண்டலத்தைத் தூண்டி, சோர்வை விரட்டுகிறது. தொடர்ச்சியாக கஃபைன் எடுத்துக்கொள்வது கிரியேட்டினின் நன்மைகளைக் குறைப்பதில்லை என ஊட்டச்சத்து நிபுணர்கள் கூறுகின்றனர்.

காபி மற்றும் கிரியேட்டின் இரண்டையும் ஒன்றாகக் கலந்து குடித்தால் என்னவாகும்?

காபியுடன் கிரியேட்டினை இணைக்கும்போது ஏராளமான நன்மைகள் கிடைக்கின்றன.

• காபி உங்கள் மூளையை விழிப்படையச் செய்கிறது.

• கிரியேட்டின் உங்கள் தசைகளுக்கு எரிபொருள் வழங்குகிறது.

• உடற்பயிற்சியின் போது அதிக எடையைத் தூக்க இது உதவுகிறது.

• தீவிரப் பயிற்சிக்குப் பிறகு ஏற்படும் தசை வலியை உணரும் தன்மையைக் கஃபைன் குறைக்கிறது.

• தனித்தனியாக எடுப்பதற்குப் பதில், காலையில் குடிக்கும் காபியிலேயே கலந்துவிடுவது பலருக்கு வசதியாக இருக்கிறது.

• கிரியேட்டின் செல்களுக்குள் நீர்ச்சத்தை நிலைநிறுத்த உதவுகிறது.

எப்படி எடுத்துக் கொள்வது?

கிரியேட்டினை வெதுவெதுப்பான காபியில் கலக்கலாம். ஆனால், கொதிக்கும் நீரில் கலப்பதைத் தவிர்க்கவும்; ஏனெனில் அதிக வெப்பம் கிரியேட்டினின் வீரியத்தைக் குறைக்கக்கூடும்.

ஒரு நாளைக்கு 3 முதல் 5 கிராம் கிரியேட்டின் போதுமானது.

காபியைப் பயிற்சிக்கு 1 அல்லது 2 மணி நேரத்திற்கு முன்பும், கிரியேட்டினை பயிற்சிக்குச் சற்று முன்பும் எடுப்பது சிறந்தது.

பக்கவிளைவுகள் உண்டா?

சிலருக்கு இந்த கலவை செரிமானக் கோளாறுகளை ஏற்படுத்தலாம். சிறுநீரகப் பாதிப்பு அல்லது ரத்த அழுத்தம் உள்ளவர்கள் மருத்துவ ஆலோசனையின்றி இதை எடுக்கக்கூடாது.

முக்கிய குறிப்பு: காபி ஒரு சிறுநீர் பெருக்கி (Diuretic), ஆனால் கிரியேட்டின் தசைகளுக்குள் நீரை இழுக்கும். எனவே, இந்த இரண்டையும் எடுக்கும்போது வழக்கத்தை விட அதிகமாக தண்ணீர் குடிப்பது மிகவும் அவசியம் என ஊட்டச்சத்து நிபுணர்கள் எச்சரிக்கின்றனர்.

காபியில் கிரியேட்டின் கலந்து குடிப்பது செயல்திறனை ஓரளவு அதிகரிக்கலாம், ஆனால் இது மட்டுமே போதாது. சரியான உணவு, முறையான பயிற்சி மற்றும் சீரான நீர்ச்சத்துடன் இதைச் சேர்க்கும்போது நல்ல பலன் கிடைக்க வாய்ப்புள்ளது.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)