முகம் சுளிக்க வைக்கும் வாய் துர்நாற்றம்: தப்பிப்பது எப்படி?

ஒருவரிடம் பேசிக்கொண்டிருக்கும்போது, அவர் ஏதாவது சாக்குப் போக்கு சொல்லி சற்று விலகிச் செல்கிறார் என்றால், உங்கள் வாயிலிருந்து நாற்றம் வருவதும் ஒரு காரணமாக இருக்கலாம்! குடும்பத்தில் இருப்பவர்கள் அல்லது நெருங்கிய நண்பர்கள் சுட்டிக்காட்டும்போதுதான் ஒருவருக்கு வாய் நாற்றம் ஏற்படுவது தெரியவரும். எனவே, தினமும் ஒரு முறையாவது, வாய் நாற்றம் ஏற்படுகிறதா என்று சோதித்துப் பார்ப்பது நமக்கும் நல்லது, நமக்கு அருகிலிருப்பவர்களுக்கும் நல்லது. முக்கியமாக உடலில் இருக்கும் நோய்களை அறிவிப்பதற்காகக்கூட வாய் நாற்றம் ஏற்படலாம்.

அந்த வகையில் வாய் சுகாதாரம் என்பது ஒவ்வொரு மனிதனுக்கும் முக்கியமான விஷயமாகும். நாம் ஒருவரை தொடர்பு கொள்வதற்கு நமக்கு உதவும் முக்கிய உறுப்பாக வாய் பகுதி உள்ளது. மேலும் நம் உடலுக்கு தேவையான உணவுகளை நாம் வாயின் வழியாக மென்றுதான் உடலுக்கு அனுப்புகிறோம். எனவே பல்வேறு உணவுகளையும் உண்பதால் வாயை சுகாதாரமாக வைத்திருப்பது முக்கியமாகும்.

நாம் உணவுகளை சுவைத்து உண்பதற்கு வாய் பகுதி உதவுகிறது. மேலும் செரிமான அமைப்பின் துவக்கமாக வாய் உள்ளது. ஆனால் நாம் தினமும் உண்ணும் சில உணவுகள் வாயில் துர்நாற்றத்தை ஏற்படுத்துகின்றன. ஆனால் பெரும்பாலானோர் அதை உணர்வதே இல்லை. கவனத்தில் கொள்வதுமில்லை. இதனால் நமக்கு எதிரே பேசுபவர்கள் முகம் சுளிக்கும் நிலை ஏற்படுகிறது.

இது பொதுவாக மோசமான வாய்வழி சுகாதாரம், புகைபிடித்தல் மற்றும் மது அருந்துதல் போன்ற ஆரோக்கியமற்ற பழக்கங்கள், வாயில் ஏற்படும் தொற்றுகள் மற்றும் நீங்கள் உண்ணும் உணவுகள் ஆகியவற்றால் ஏற்படுகிறது.

பூண்டு, வெங்காயம் மற்றும் காரமான உணவுகளில் உள்ள ரசாயனங்கள் ஜீரணிக்கப்பட்டு, இரத்த ஓட்டம் வழியாக நுரையீரலை அடையும் போது துர்நாற்றம் ஏற்படுகிறது. காபி, பால் பொருட்கள் மற்றும் அதிக சர்க்கரை உள்ள உணவுகளும் இதற்கு முக்கிய காரணங்களாகும்.

பூண்டு, வெங்காயம், காபி, புகையிலை பொருட்கள் மற்றும் பால் பொருட்களை அதிகம் உட்கொள்ளக்கூடாது. ஏனெனில் அவை கடுமையான வாய் துர்நாற்றத்தையும், நாவறட்சியையும் ஏற்படுத்தக்கூடும். வாய் துர்நாற்றத்துக்கு இடம் கொடுக்காமல் சுவாசத்தை இயற்கையாக புத்துணர்ச்சியாகவும் ஆரோக்கிமாகவும் வைத்திருக்க சில விஷயங்களை பின்பற்றுவது அவசியமானது.

அதேபோல் மற்ற காரணங்களாக நீங்கள் தினமும் பல் துலக்கவோ அல்லது ஃப்ளோஸ் (floss) செய்யவோ இல்லை என்றால், உணவுத் துகள்கள் உங்கள் வாயில் தங்கி துர்நாற்றத்தை ஏற்படுத்தும்.

சில மருந்துகள் மறைமுகமாக வறண்ட வாய்க்கு பங்களிப்பதன் மூலம் கெட்ட நாற்றத்தை உருவாக்குகின்றன.

சாப்பிட்டு முடித்தவுடன் பல் இடுக்குகளில் தங்கும் உணவுத் துகள்கள், வாய்ப் பகுதியிலிருக்கும் பாக்டீரியாக்களுடன் கூட்டு சேர்ந்து நாற்றத்தை உருவாக்கும்.

நாவறட்சி அதிகமிருந்தாலும், வாயில் நாற்றம் உண்டாகும். நாவறட்சி ஏற்படாமல் இருக்க, தேவையான அளவு தண்ணீர் குடிப்பதும் அவசியம்.

நாள்பட்ட அழற்சி அல்லது மூக்கு, தொண்டை அல்லது சைனஸ் தொற்றுகளும் வாய் துர்நாற்றத்திற்கு பங்களிக்கும். தவிர, வளர்சிதை மாற்றக் கோளாறுகள் அல்லது சில புற்றுநோய்கள் போன்ற நிலைமைகளும் அவை உற்பத்தி செய்யும் இரசாயனங்களின் விளைவாக வாய் துர்நாற்றத்தை ஏற்படுத்தும்.

வாய் துர்நாற்றத்திற்கு சிகிச்சையளிப்பது எப்படி?

வாய் துர்நாற்றத்தை போக்க, நீங்கள் சிறந்த வாய்வழி பராமரிப்பு பழக்கங்களை எப்போதும் கடைப்பிடிப்பதை உறுதி செய்யவும்.

காலை, மாலை என இருமுறை பல்துலக்க வேண்டும்.

நாக்கின் அடியில் கிருமிகள் சேர்ந்து நாற்றம் உண்டாக்கும் என்பதால், நாக்கையும் முறையாகச் சுத்தப்படுத்துவது முக்கியம்.

சாப்பிட்டவுடன் வாய்க்கொப்பளிக்கும் பழக்கம் வாய் துர்நாற்றம் ஏற்படாமல் பார்த்துக்கொள்ளும்.

நல்லெண்ணெய் அல்லது தேங்காய் எண்ணெயைக் கொண்டு வாய் கொப்பளிக்கலாம் (ஆயில் புல்லிங்).

நல்ல வாய்வழி பராமரிப்பு பழக்கங்களை கடைபிடிப்பதைத் தவிர, உங்கள் பல் மருத்துவரை வருடத்திற்கு இரண்டு முறையாவது பரிசோதிக்கவும், தொழில்முறை சுத்தம் செய்யவும் அறிவுறுத்தப்படுகிறது.

உணவு மூலமான வாய் துர்நாற்றத்தைக் குறைக்க எளிய வழிகள்:

வாய் துர்நாற்றம் இருந்தால், வெங்காயம், மசாலா, பூண்டு போன்ற உணவுகளைத் தவிர்ப்பது நல்லது.

கூடுதலாக, சர்க்கரை உணவுகள், காபி மற்றும் மது அருந்துவதைக் குறைக்கவும் பரிந்துரைக்கப்படுகிறது.

வாயை ஈரப்பதமாக்க, காலையில் ஒரு டம்ளர் தண்ணீர் குடியுங்கள்.

உணவில் புதினா, ஏலக்காய், இஞ்சியை சேர்த்து கொள்ளுங்கள்.

ஆரஞ்சு, எலுமிச்சை போன்ற வைட்டமின் சி நிறைந்த பழங்களை உண்ணுங்கள்.

பற்களுக்குள் உணவுத்துகள்கள் தங்குவதற்கு இடம் கொடுக்காதீர்கள்.

அதிக தண்ணீர் குடிப்பது கூட சுவாசத்தை உடனடியாக மேம்படுத்தும்.

உணவு உண்டபின் அல்லது காபி அருந்தியபின் தண்ணீர் குடிப்பதன் மூலம் வாயில் உள்ள துகள்கள் வெளியேறி, வாய் வறட்சி அடைவது தடுக்கப்படும்.

உணவு உட்கொண்ட பிறகு சர்க்கரை இல்லாத சூயிங்கம் மெல்லுவது உமிழ்நீர் உற்பத்தியை அதிகரித்து துர்நாற்றத்தை போக்கும்.

பச்சை புதினா கீரை, கொத்தமல்லி தழை ஆகியவற்றை மென்று சாப்பிட்டால் உடனடி பலன் கிடைக்கும்.

துர்நாற்றத்தைத் தவிர்க்க சில உணவுகளைத் தவிர்ப்பது மற்றும் சிறந்த வாய் சுகாதாரத்தைப் பராமரிப்பது அவசியம்.

Reference:

Bad breath