மனிதர்களின் தலையாய கவலைகளில் ஒன்று தலைமுடி. பெண்கள் தலைமுடி உதிர்வதைக் குறித்தும், ஆண்கள் வழுக்கைத் தலையைக் குறித்தும் கவலை கொள்கிறார்கள். பலர் விக் வைத்துக் கொள்கிறார்கள். ஆனால், வழுக்கைத் தலையுடன் இருப்பது பலவீனம் அல்ல. இந்தக் கருத்தை உணர்த்துவதற்காக அமெரிக்காவில் அக்டோபர் 14ம் தேதி ‘Be bald and free day’ என்று கொண்டாடுகிறார்கள். இந்த நாளில் தங்கள் வழுக்கையை மறைப்பதற்காக விக் அல்லது தொப்பி அணிந்திருந்தால், அதை எடுத்துவிட்டு சுதந்திரமாக இருக்கிறார்கள். தனது சொந்த அடையாளத்தை உலகிற்குப் பகிர்ந்துகொள்ளும் நாளாகக் கொண்டாடுகிறார்கள். மாற்ற வேண்டியது மனதைத்தானே தவிர, மறைக்க வேண்டியது வழுக்கைத் தலையை அல்ல என்கிற கோட்பாட்டை வலியுறுத்துகிறார்கள்.

உளவியலின்படி வழுக்கைத்தலை உடையவர்களின் நேர்மறை அம்சங்கள்:

அதிகாரம் மற்றும் நம்பிக்கை: வழுக்கைத் தலை உள்ள ஆண்கள் பெரும்பாலும் அதிக அதிகாரம் மிக்கவர்களாகவும் நம்பிக்கையுடையவர்களாகவும் கருதப்படுகிறார்கள் என்று ஆய்வுகள் நிரூபித்துள்ளன. பொதுவாக அவர்கள் உயர்ந்த அதிகாரம் செலுத்தும் பதவிகளில் இருக்கிறார்கள்.

திறமை: இவர்கள் மிகவும் திறமையானவர்களாக, குறிப்பாக தலைமை பதவிகளில் இருப்பதாக ஆராய்ச்சிகள் கூறுகின்றன. இது தொழில்முறை அமைப்புகளில் மற்றவர்களிடமிருந்து அதிக நம்பிக்கை மற்றும் மரியாதையைப் பெறுகிறார்கள்.

ஆதிக்கம்: இவர்கள் ஆதிக்கம் மற்றும் உறுதிப்பாடு போன்ற பண்புகள் கொண்டவர்களாக இருக்கிறார்கள். பிறர் இவர்களை சக்தி வாய்ந்தவர்களாகக் கருதுகிறார்கள்.

அழகு: பல பிரபலங்கள் வழுக்கைத் தலையை கவர்ச்சியாக எண்ணுகிறார்கள். இது முரட்டுத்தனத்தின் வெளிப்பாடு அல்லது ஆண்மையின் கம்பீரமென்று அவர்கள் கருதுகிறார்கள். அதனால் அவர்களது அழகு மேலும் கூடுவதாக சம்பந்தப்பட்ட நபர்களும் பிறரும் நினைக்க ஏதுவாக இருக்கிறது. பல ஆண்கள் தங்கள் வழுக்கையை அப்படியே ஏற்றுக்கொள்கிறார்கள். தங்களுடைய தோற்றத்தில் பெருமிதம் கொள்கிறார்கள். இது அவர்களது தன்னம்பிக்கையை காட்டுகிறது. இந்தக் குணம் பிறரையும் ஈர்க்கிறது.

நேரமும் செலவும் மிச்சம்: வழுக்கை உள்ள ஆண்களுக்கு முடியைப் பராமரிக்கும் நேரம் மற்றும் செலவுகள் ஆகியவை மிகவும் குறைவு. முடி பராமரிப்பு பற்றி அவர்கள் கவலைப்படத் தேவையில்லை. அந்த நேரத்தில் அவர்கள் தங்கள் செயல் திறன் மற்றும் பிற பணிகளுக்கு அதிக நேரம் ஒதுக்க முடிகிறது.

தோழமை: இவர்கள் பெரும்பாலும் தோழமை உணர்வு உடையவர்களாக இருக்கிறார்கள். பிறரிடம் எளிதில் நட்பு கொள்ளும் இயல்புடையவர்களாக, நட்புறவை வளர்க்கிறார்கள். இதனால் நல்ல சமூக உணர்வை உருவாக்குகிறார்கள்.

நேர்மறைப் பாங்கு: தொப்பி அல்லது விக் போன்றவற்றின் மூலம் தங்களது வழுக்கையை மறைக்க விரும்பாத ஆண்கள் தங்களது நேர்மறையான இயல்பை வெளிப்படுத்துகிறார்கள். தனது தோற்றத்தை அப்படியே ஏற்றுக்கொள்வதும் முடி தொடர்பான சமூக அழுத்தங்களிலிருந்து விலகி இருப்பதும் ஒட்டுமொத்த சுயமரியாதைக்கு வழிவகுக்கிறது.

நவீன கண்ணோட்டங்கள்: சமீபத்திய ஆண்டுகளில் வழுக்கைத் தலை உள்ள ஆண்கள் அதிகமாக கொண்டாடப்படுகிறார்கள். இது சமூகத்தில் நேர்மறையான கருத்துக்குப் பங்களிக்கிறது. தங்கள் உடல் உருவத்தை நேர்மறையாக ஏற்றுக்கொள்வதை ஊக்குவிக்கிறது. இதை ஊக்குவிக்கும் பிரச்சாரங்கள் வழுக்கைத் தலை நபர்களை முன்மாதிரியாகக் கொள்கின்றன.