இந்திய கிரிக்கெட் வீரர் ஷிகர் தவானின் மனைவி ஆயிஷா, அவரை விவாகரத்து செய்துள்ளதாகத் தெரிவித்துள்ளார்.

இந்திய கிரிக்கெட் அணியின் தொடக்க ஆட்டக்காரரான ஷிகர் தவான், இப்போது டி-20 உலகக் கோப்பைப் போட்டிக்காகத் தயாராகி வருகிறார். இவருடைய மனைவி, ஆயிஷா முகர்ஜி. கடந்த 8 வருடங்களுக்கு முன் இவர்கள் காதலித்து திருமணம் செய்துகொண்டனர். இந்தியாவை பூர்விகமாகக் கொண்ட ஆயிஷா (வயது 46), ஆஸ்திரேலியாவின் மெல்போர்ன் நகரில் வசித்து வந்தார். கிக்பாக்ஸிங் வீராங்கனையான ஆயிஷா, ஏற்கனவே ஆஸ்திரேலிய தொழிலதிபர் ஒருவரை மணமுடித்து 2 பெண் குழந்தைகள் பிறந்த நிலையில் அவரை விவாகரத்து செய்திருந்தார். பின்னர் ஷிகர் தவானை காதலித்து கடந்த 2012-ம் ஆண்டு திருமணம் செய்துகொண்டார். இவர்களுக்கு ஒரு மகன் உண்டு. இந்நிலையில், ஷிகர் தவானை பிரிந்துவிட்டதாக ஆயிஷா முகர்ஜி தனது இன்ஸ்டாகிராமில் தெரிவித்துள்ளார்.

அதில் ஆயிஷா தெரிவித்திருப்பதாவது:

வாழ்க்கையில் 2-வது முறையாக விவாகரத்து செய்வேன் என்று கனவிலும் எதிர்பார்க்கவில்லை. ஆனால் அப்ப்டி செய்யும்படி ஆகிவிட்டது.

-இவ்வாறு குறிப்பிட்டுள்ள ஆயிஷா இந்த விவாகரத்து பற்றி நீண்ட அறிக்கை ஒன்றையும் வெளியிட்டுள்ளார். ஆனால் இந்த விவகாரம் குறித்து ஷிகர் தவான் தகவல் எதுவும் தெரிவிக்கவில்லை.