‘பலாப்பழம் பிடிக்காது’ என்று யாருமே சொல்லி நீங்கள் கேள்விப்பட்டிருக்க முடியாது. ஏனென்றால், அனைவரையும் கவர்ந்த பழம் என்றால் அது நிச்சயம் பலாப்பழம் மட்டுமே. தற்பொழுது பலாப்பழ சீசன் நடந்து கொண்டிருக்கிறது. முக்கனிகளில் ஒன்றான பலாப்பழத்தை பல வழிகளில் உங்கள் உணவில் சேர்த்துக் கொள்ளலாம். இதில் நார்ச்சத்து, புரதம், வைட்டமின் ஏ, மெக்னீசியம், பொட்டாசியம் மற்றும் வைட்டமின் சி மற்றும் பிற முக்கிய ஊட்டச்சத்துக்கள் நிறைந்துள்ளன.
நீரிழிவு நோயாளிகளுக்கும் பலாப்பழம் நன்மை பயக்கும். அதன் குறைந்த கிளைசெமிக் குறியீடு இரத்த சர்க்கரை அளவை சீராக பராமரிக்க உதவுகிறது. பலாப்பழத்தைப் போலவே பலாக்கொட்டைகளிலும் ஒப்பீட்டளவில் ஆரோக்கியமானவை என்பது பலரும் அறியாதது.
இந்தக் கொட்டைகளில் தியாமின் மற்றும் ரிபோஃப்ளேவின் ஏராளமாக உள்ளன. இது உணவை ஆற்றலாக மாற்ற உதவுகிறது மற்றும் உங்கள் கண்கள், சருமம் மற்றும் முடியின் ஆரோக்கியத்தை பராமரிக்கிறது. கூடுதலாக இந்தக் கொட்டைகளில் துத்தநாகம், இரும்பு, கால்சியம், தாமிரம், பொட்டாசியம் மற்றும் மெக்னீசியம் போன்ற அத்தியாவசிய சத்துக்கள் நிறைந்துள்ளன.
பலாப்பழ கொட்டைகளின் பாக்டீரியா எதிர்ப்புப் பண்புகள் பாக்டீரியா மாசுபாட்டைக் குறைக்கவும், உணவு மூலம் பரவும் நோய்களின் வளர்ச்சியையும் குறைக்க உதவுகிறது. பலாப்பழ விதைகள் உங்கள் ஆரோக்கியத்தை பல்வேறு வழிகளில் மேம்படுத்தும். பலாக்கொட்டைகளால் கிடைக்கும் அற்புத நன்மைகள் என்னென்ன என்பதை இந்தப் பதிவில் பார்க்கலாம்.
செரிமானத்தை ஊக்குவிக்கும்: பலாக்கொட்டையின் நார்ச்சத்து சாதாரண குடல் இயக்கத்திற்கு உதவுவதோடு, செரிமானத்திற்கும் உதவுகிறது. இந்தக் கொட்டை குடல் இயக்கத்தை வலுப்படுத்துவதோடு, செரிமான நோய்களின் அபாயத்தைக் குறைக்கிறது.
இதய ஆரோக்கியம்: பலாப்பழக் கொட்டைகளில் பொட்டாசியம் அதிகமாக உள்ளது. பொட்டாசியம் இரத்த நாளங்களை தளர்த்துவதன் மூலம் இரத்த அழுத்தத்தைக் குறைக்கிறது, இதயம் மற்றும் சுற்றோட்ட அமைப்பில் அழுத்தத்தை குறைக்கிறது மற்றும் இதய நோய் அபாயத்தை குறைக்கிறது.
எலும்புகளை வலுப்படுத்துகிறது: வலுவான எலும்புகளுக்கு, உங்களுக்கு கால்சியம் தவிர வேறு பல ஊட்டச்சத்துகளும் தேவை, அதில் முக்கியமான ஒன்று மக்னீசியம். மக்னீசியம் நிறைந்த பலாப்பழ விதைகள் கால்சியம் உறிஞ்சுதல் மற்றும் எலும்புகளை வலுப்படுத்துவதன் மூலம் எலும்பு ஆரோக்கியத்தைப் பலப்படுத்தும்.
இரத்தசோகையைத் தடுக்கும்: பெரும்பாலும் பெண்கள் இரத்த சோகையால் பாதிக்கப்படுகின்றனர். பலாப்பழ விதைகளில் உள்ள இரும்பு ஆரோக்கியமான இரத்த சிவப்பணுக்களை உற்பத்தி செய்வதற்கான ஒரு சிறந்த ஆதாரமாகும். இரும்புச்சத்து போதுமான அளவு உட்கொள்வது உடல் முழுவதும் ஆக்ஸிஜன் விநியோகத்தை ஊக்குவிக்கும் மற்றும் இரும்புச்சத்து குறைபாடு இரத்த சோகையைத் தவிர்க்க உதவும்.
வளர்சிதை மாற்றத்தை ஊக்குவிக்கும்: அதிக கார்போஹைட்ரேட் உள்ளடக்கம் இருப்பதால், பலாப்பழம் ஒரு வலுவான ஆற்றல் மூலமாக செயல்படுகிறது. மேலும், அவற்றில் பி-காம்ப்ளக்ஸ் வைட்டமின்கள் உள்ளன, அவை உணவை ஆற்றலாக மாற்றுவதற்கும் ஆரோக்கியமான வளர்சிதை மாற்றத்தை மேம்படுத்துவதற்கும் அவசியம்.
மன அழுத்தத்தை குறைக்கும்: பலாப்பழ விதைகளில் புரதங்கள் மற்றும் பிற தாதுக்கள் நிறைந்திருப்பதால் மன அழுத்த நிலைகள் மற்றும் பல சரும பிரச்னைகளைக் குறைக்க உதவுகிறது.
இனி, பலாச்சுளையை சாப்பிட்டு முடித்தவுடன் பலாக்கொட்டைகளை வீசி எறியாதீர்கள் அதில்தான் அவ்வளவு விஷயங்கள் இருக்கு. நம் உடல் நலனை பக்காவாய் பாதுகாக்கும் இந்தப் பலாக்கொட்டைகள்.