பங்குச்சந்தை வீழ்ச்சி இனி கவலையில்லை! சாமானியர்களுக்கான செபியின் 'லைஃப் சைக்கிள் ஃபண்ட்'!

பங்குச்சந்தையின் ஏற்ற இறக்கங்களைக் கண்டு அஞ்சாத சில்லறை முதலீட்டாளர்களே இல்லை என்று சொல்லலாம். "இன்னும் பத்து வருஷத்துல பொண்ணு காலேஜ் படிப்புக்கு பணம் வேணுமே, கடைசி நேரத்துல மார்க்கெட் டவுன் ஆயிட்டா என்ன பண்றது?" என்ற கவலை ஒவ்வொரு சாமானிய குடும்பத் தலைவருக்கும் உண்டு.

இந்த அச்சத்திற்கு முற்றுப்புள்ளி வைக்கும் வகையில், இந்தியப் பங்குச்சந்தைக் கட்டுப்பாட்டு வாரியமான செபி (SEBI) சில்லறை முதலீட்டாளர்களுக்காக ஒரு புதிய பரஸ்பர நிதித் திட்டத்தை சமீபத்தில் நடைமுறைக்குக் கொண்டுவந்துள்ளது. அதுதான் 'லைஃப் சைக்கிள் ஃபண்ட்' (Life Cycle Fund).

பொதுவாக, நாம் ஒரு குறிப்பிட்ட இலக்கை நோக்கி முதலீடு செய்யும்போது, ஆரம்பத்தில் அதிக வளர்ச்சி சாத்தியமுள்ள பங்குகளில் முதலீடு செய்வோம். இலக்கு நெருங்கும் காலத்தில் அந்தப் பணத்தைப் பாதுகாப்பான கடன் பத்திரங்களுக்கு மாற்ற வேண்டும்.

ஆனால், சந்தையைக் கவனித்து இந்த மாற்றத்தைச் சரியாகச் செய்வதற்குப் பெரும்பாலான முதலீட்டாளர்களுக்கு நேரமும் இருப்பதில்லை, அனுபவமும் இருப்பதில்லை. இந்தச் சிக்கலுக்குத் தானியங்கித் தீர்வாக அமையப்போவதுதான் இந்தத் திட்டம்.

இலக்கை மையமாகக் கொண்ட இயக்கம்

லைஃப் சைக்கிள் ஃபண்ட் என்பது முதலீட்டாளரின் குறிப்பிட்ட எதிர்கால இலக்கு ஆண்டை (Target Maturity Year) மையமாகக் கொண்டு இயங்கக்கூடிய ஒரு பரஸ்பர நிதி வகையாகும். உதாரணமாக, 2040-இல் உங்கள் குழந்தையின் உயர்கல்வித் தேவை இருக்கிறது அல்லது 2050-இல் நீங்கள் ஓய்வு பெறத் திட்டமிடுகிறீர்கள் என்றால், "லைஃப் சைக்கிள் ஃபண்ட் 2040" அல்லது "லைஃப் சைக்கிள் ஃபண்ட் 2050" என்ற பெயரிலேயே இந்த நிதிகள் சந்தையில் கிடைக்கப்பெறும்.

முதலீட்டாளர்கள் தங்களின் தேவைக் காலத்திற்கு ஏற்ற ஆண்டைத் தேர்வு செய்து முதலீட்டைத் தொடங்கினால் போதுமானது. 5 ஆண்டுகள் முதல் 30 ஆண்டுகள் வரையிலான கால அளவுகளில் (5, 10, 15, 20, 25, 30 என ஐந்தின் மடங்கு ஆண்டுகளில்) இத்திட்டங்கள் வடிவமைக்கப்பட உள்ளன.

ஆபத்தைக் குறைக்கும் உத்தி

இத்திட்டத்தின் மிக முக்கியமான சிறப்பம்சமே இதன் 'கிளைடு பாத்' (Glide Path Strategy) எனப்படும் முதலீட்டு நடைமுறைதான். உங்கள் முதலீட்டுக் காலம் நீண்டதாக உள்ள ஆரம்பக் கட்டத்தில், அதாவது இலக்கு 15 முதல் 30 ஆண்டுகள் தொலைவில் இருக்கும்போது, பணத்தை வேகமாகப் பெருக்கும் நோக்கில் நிதியின் 65% முதல் 95% வரையிலான பகுதி பங்குச்சந்தையில் (Equity) முதலீடு செய்யப்படும்.

காலம் செல்லச் செல்ல, அதாவது இலக்கு கைக்கெட்டும் தூரத்திற்கு வரும்போது (10 முதல் 15 ஆண்டுகள் வரை), ஃபண்ட் மேனேஜர் ஆபத்து நிறைந்த பங்குகளில் உள்ள முதலீட்டைக் கொஞ்சம் கொஞ்சமாகக் குறைப்பார். அந்தப் பணம் பாதுகாப்பான கடன் பத்திரங்களுக்கு (Debt Funds) மாற்றப்படும்.

இலக்கு முடிவதற்கு இறுதி 1 முதல் 3 ஆண்டுகள் மட்டுமே இருக்கும் சூழலில், சந்தையில் பெரிய வீழ்ச்சி ஏற்பட்டாலும் உங்கள் பணம் பாதிக்கப்படாத வகையில், பெரும்பகுதி நிதி அரசு மற்றும் நிறுவனக் கடன் பத்திரங்கள், தங்கம் அல்லது வெள்ளி சார்ந்த இ.டி.எஃப்-களில் (Gold/Silver ETFs) இருக்கும். (இருப்பினும் சிறிதளவு — சுமார் 5%-20% — பங்கு முதலீடும் தொடரும்). இந்த மறுசீரமைப்பை (Automatic Rebalancing) முதலீட்டாளர் செய்ய வேண்டியதில்லை; நிதியை நிர்வகிக்கும் நிறுவனமே பொறுப்பேற்றுச் செய்யும்.

ஒழுக்கமான முதலீடும் வெளியேற்றக் கட்டணமும்

முதலீட்டாளர்கள் அவசரப்பட்டு விலகிச் செல்லாமல், குறைந்தபட்சம் சில ஆண்டுகளுக்காவது முதலீட்டைத் தொடர வேண்டும் என்பதை ஊக்குவிக்கும் வகையில் இதன் கட்டமைப்பு அமைந்துள்ளது.

முதலீடு செய்த முதலாண்டிற்குள் வெளியேறினால் 3% வெளியேற்றக் கட்டணம் (Exit Load), இரண்டாம் ஆண்டிற்குள் வெளியேறினால் 2%, மூன்றாம் ஆண்டிற்குள் வெளியேறினால் 1% என இந்தக் கட்டணம் விதிக்கப்படும். மூன்று ஆண்டுகளுக்குப் பிறகு இந்தக் கட்டணமே நீக்கப்பட்டுவிடும் - அதாவது, உங்கள் இலக்கு ஆண்டு இன்னும் பல ஆண்டுகள் தொலைவில் இருந்தாலும் சரி, முதலீடு செய்த மூன்றாண்டுகள் கடந்தவுடனேயே கட்டணமின்றி வெளியேற முடியும்.

அமெரிக்கா போன்ற மேலைநாடுகளில் "Target Date Funds" என்ற பெயரில் இத்திட்டம் மிகவும் பிரபலம். அங்குள்ள பெரும்பான்மையான குடும்பங்களின் ஓய்வூகாலச் சேமிப்பில் கணிசமான அளவு இத்தகைய நிதிகளில் பாதுகாக்கப்படுகிறது. இந்தியாவில் சில்லறை முதலீட்டாளர்கள் சந்தைப் பதற்றத்தால் தவறான காலத்தில் பணத்தை எடுத்து நஷ்டமடைவதைத் தடுக்கவே செபி இதனை இங்கு கொண்டுவருகிறது.

தற்போதைய நிலை என்ன?

செபி இத்திட்டத்திற்கான விதிமுறைகளை முழுமையாக நடைமுறைப்படுத்திவிட்ட நிலையில், முதலாவது நிறுவனமாக 'ஜெரோதா' (Zerodha) இத்திட்டங்களைச் சந்தையில் அறிமுகப்படுத்தியது.

ஜூன் 2026-இல் 2036 மற்றும் 2041 ஆகிய இலக்கு ஆண்டுகளுடன் தொடங்கப்பட்ட அந்த இரு நிதிகளும் ஜூலை மாதத்திலேயே NFO-வை நிறைவு செய்து, தற்போது முதலீட்டாளர்களின் நேரடிச் செயல்பாட்டிலும் பயன்பாட்டிலும் உள்ளன. இவற்றைத் தொடர்ந்து, 5 ஆண்டு முதிர்வு காலம் கொண்ட Zerodha Life Cycle Fund 2031-க்கான NFO ஆகஸ்ட் 27-இல் தொடங்கியது; இது செப்டம்பர் 10 அன்று மூடும் என்பதால், தற்போது விண்ணப்பங்கள் பெறப்பட்டு வருகின்றன.

• Zerodha Life Cycle Fund 2036: 10 ஆண்டு முதிர்வு காலம் — நடப்பில் உள்ளது.

• Zerodha Life Cycle Fund 2041: 15 ஆண்டு முதிர்வு காலம் — நடப்பில் உள்ளது.

• Zerodha Life Cycle Fund 2031: 5 ஆண்டு முதிர்வு காலம் — NFO செப்டம்பர் 10 வரை திறந்துள்ளது.

ஜெரோதாவைத் தொடர்ந்து, ICICI Prudential Mutual Fund 2031, 2036, 2041 ஆகிய இலக்கு ஆண்டுகளுடன் தனது லைஃப் சைக்கிள் ஃபண்டுகளை அறிமுகப்படுத்தியுள்ளது (NFO செப்டம்பர் 9 அன்று மூடுகிறது). மேலும் நிப்பான் இந்தியா, மிரே அசெட், தி வெல்த் கம்பெனி போன்ற நிறுவனங்களும் தங்களுக்கான லைஃப் சைக்கிள் ஃபண்டுகளுக்கான வரைவு ஆவணங்களைச் செபியிடம் தாக்கல் செய்துள்ளன.

எதிர்காலக் கனவுகளுக்காக முதலீடு செய்ய விரும்புபவர்கள், சந்தையின் தினசரி அசைவுகளைப் பற்றி கவலைப்படாமல் அமைதியாக இருக்க நினைத்தால், இந்த லைஃப் சைக்கிள் ஃபண்ட் ஒரு மிகச்சிறந்த பாதுகாப்பு வளையமாக இருக்கும்.

பங்குச்சந்தை வீழ்ச்சிகளைப் பற்றிய பயமின்றி உங்கள் குழந்தைகளின் எதிர்கால கல்வி மற்றும் திருமணத் தேவைகளுக்கான நிதி இலக்குகளை முன்கூட்டியே திட்டமிட்டு, பாதுகாப்பாகவும் உறுதியாகவும் அடையலாம்.

Reference: