ஓவர் திங்கிங் செய்து உறவை கெடுப்பவரா நீங்கள்? இத படிச்சா நீங்க ஆடிப்போயிடுவீங்க!

நமது வாழ்க்கையில் சில நபர்களைப் பார்க்கும்போது இவர்கள் மிகவும் சிறந்தவர்கள், எந்தவொரு குறையும் இல்லாதவர்கள் என்று அவர்களைப் பற்றி ஒரு பெரிய கற்பனைக் கோட்டையை நமது மனதிற்குள்ளேயே கட்டி விடுகிறோம். ஆனால் ஒருநாள் அவர்கள் ஒரு சாதாரணமான தவற்றைச் செய்யும்போது நாம் ஏதோ பெரிய துரோகத்திற்கு ஆளானது போல மனமுடைந்து போகிறோம். 

உண்மையில் அவர்கள் எந்த துரோகமும் செய்யவில்லை. அவர்களைப் பற்றி நீங்களே உங்களுக்குள் எழுதி வைத்திருந்த ஒரு கற்பனை கதாபாத்திரம் தான் அன்று உடைந்திருக்கிறது. இதைத்தான் உளவியலாளர்கள் மற்றவர்களை ரொமான்டிசைஸ் செய்தல் என்று கூறுகிறார்கள்.

தவறான பிம்பம்!

நாம் ஒரு புதிய நபரை சந்திக்கும்போது அவர்களைப் பற்றி நமக்கு முழுமையாக எதுவும் தெரியாது. ஆனால் அந்த வெற்றிடத்தை அப்படியே வைத்துக்கொள்ள நமது மூளை ஒருபோதும் விரும்புவதில்லை. உடனே அந்த நபர் சொல்லும் ஒரு சாதாரண வார்த்தையை வைத்து அவர் மிகவும் அறிவாளி என்றும், அவர் காட்டும் ஒரு சிறு அன்பை வைத்து அவர் மிகவும் இரக்க குணம் கொண்டவர் என்றும் நமது மூளை ஒரு போலி பிம்பத்தைத் தானாகவே உருவாக்கி விடுகிறது. எட்வர்ட் தோர்ன்டைக் (Edward Thorndike) என்ற உளவியலாளர் இதையே ஹாலோ எஃபெக்ட் (Halo Effect) என்று கூறுகிறார்.

ஒருவரைப் பற்றிப் பெரிய அளவில் கற்பனை செய்த பிறகு, நாம் அவர்களை ஒரு மனிதராகப் பார்ப்பதை முற்றிலுமாக நிறுத்தி விடுகிறோம். அதற்குப் பதிலாக நமது கற்பனை பிம்பத்தோடு அவர்கள் சரியாகப் பொருந்துகிறார்களா என்று ஒவ்வொரு முறையும் அவர்களை நாம் ரகசியமாகச் சோதிக்கிறோம். 

ஒருவேளை அவர்கள் நமது எதிர்பார்ப்பிற்கு எதிராக நடந்துகொண்டால், அவர் இன்று சரியாக இல்லை, இது அவருடைய உண்மையான குணம் கிடையாது என்று நமக்கு நாமே பல காரணங்களைச் சொல்லி அந்த போலி பிம்பத்தை நியாயப்படுத்தப் பார்க்கிறோம்.

யதார்த்தத்தை ஏற்றுக் கொள்ளுங்கள்! 

எப்போது நீங்கள் ஒருவரின் குறைகளை சாதாரணமாகக் கடந்து சென்று அவரை ஒரு மனிதராக மட்டுமே பார்க்கத் தொடங்குகிறீர்களோ, அன்றுதான் உங்களின் உண்மையான அன்பான வாழ்க்கை முழுமையாகத் தொடங்குகிறது. அந்த நொடி முதல் நீங்கள் மற்றவர்களை ரொமான்டிசைஸ் செய்வதைத் தவிர்த்துவிட்டு ஒரு தெளிவான மனநிலையை அடைகிறீர்கள். 

அவர்களை ஒரு கல் சிலையாகப் பார்க்காமல் சாதாரண உணர்வுகள் கொண்ட ஒரு மனிதனாகப் பார்க்கத் தொடங்குவீர்கள். இதுவே எந்தவொரு உறவின் நீண்ட கால வெற்றிக்கும் ஒரு மிகச் சிறந்த அஸ்திவாரமாக அமைகிறது.

ஒருவரை அவர் குறைகளுடன் முழுமையாக ஏற்றுக்கொள்வதே உண்மையான அன்பாகும். நமது கற்பனையில் நாம் உருவாக்கிய அந்தச் சரியான மனிதனை நிஜ உலகில் நாம் எப்போதுமே ஒருபோதும் கண்டுபிடிக்கவே முடியாது. ஒவ்வொரு மனிதனும் நல்ல மற்றும் கெட்ட குணங்களின் கலவை என்பதை உணர்ந்து அவர்களின் யதார்த்தமான குணத்தை மதித்து வாழுங்கள். 

அதுவே இருவருக்குமான உண்மையான நிம்மதியையும் மகிழ்ச்சியையும் என்றென்றும் தரும்.