2026 ம் ஆண்டின் சிறந்த காய்கறியாக முட்டைக்கோஸ் அறிவிக்கப்பட்டது - ஏன் தெரியுமா?..

ஆரோக்கியம் மற்றும் சமையல் நிபுணர்களின் கூற்றுப்படி, முட்டைக்கோஸ் 2026 ஆம் ஆண்டின் சிறந்த காய்கறியாக (Superfood) கொண்டாடப்படுகிறது. காரணம் மலிவான விலையில் கிடைக்கும் இந்த காய்கறி, பல ஆரோக்கிய நலன்களை கொண்டுள்ளதுடன், சமைப்பதற்கு எளிதானது மற்றும் வியக்கத்தக்க வகையில் தற்போதைய நவநாகரிகப் போக்கிற்கு ஏற்றதாகவும் உள்ளது.

2026-ஆம் ஆண்டில் சற்றும் எதிர்பாராத வகையில் முட்டைக்கோஸ் இன்ஸ்டாகிராம் மற்றும் டிக்டாக் போன்ற சமூக ஊடகத் தளங்களில் முக்கிய இடத்தைப் பிடித்து, பிரபலமாகி வந்தது. இந்நிலையில் புகழ்பெற்ற பகுத்தாய்வு நிறுவனமான 'பின்ட்ரெஸ்ட்' இதை இந்த ஆண்டின் 'பிரபலமான' காய்கறியாகப் பெயரிட்டுள்ளதுடன், முட்டைக்கோஸ் ஸ்டீக்ஸ், கிம்ச்சி காக்டெய்ல்ஸ் மற்றும் முட்டைக்கோஸை முதன்மைப்படுத்தும் பிற சமையல் குறிப்புகள் எங்கும் பரவலாகக் காணப்படும் என்றும் கணித்துள்ளது.

"முட்டைக்கோஸ் என்பது மலிவான, பலவிதமாகப் பயன்படுத்தக்கூடிய, சுவையான மற்றும் சத்தான ஒரு காய்கறி. ஆனால், நீண்ட காலமாக இதற்கு அதிக கவனம் கிடைக்கவில்லை," என்று யேல் மருத்துவப் பள்ளி சமையல் மருத்துவ நிறுவன இயக்குநரான நேட் வுட் கூறியுள்ளார்.

முட்டைக்கோஸ் குறைந்த கார்போஹைட்ரேட், குறைந்த கலோரி மற்றும் கொழுப்பு சத்து உள்ள உணவு. அதிக நார்ச்சத்து உள்ளது. 100 கிராம் முட்டைக்கோஸில் 2.5 கிராம் நார்ச்சத்து உள்ளது. முட்டைக்கோஸில் வைட்டமின் சி, கே, ஏ, ஃபோலேட், பொட்டாசியம், கால்சியம், மாங்கனீசு மற்றும் மெக்னீசியம் சத்துக்கள் நிறைந்துள்ளன.

ஒரு கப் பச்சையான முட்டைக்கோஸில் சுமார் 36 மில்லிகிராம் வைட்டமின் சி உள்ளது. இது பெண்களுக்குப் பரிந்துரைக்கப்பட்ட தினசரி உட்கொள்ளும் அளவில் (75 மில்லிகிராம்) கிட்டத்தட்ட பாதியாகவும், ஆண்களுக்குப் பரிந்துரைக்கப்பட்ட தினசரி உட்கொள்ளும் அளவில் (90 மில்லிகிராம்) சுமார் 40 சதவீதமாகவும் இருக்கிறது. இதிலுள்ள பொட்டாசியம் இரத்த அழுத்தத்தை குறைக்கும், கெட்ட கொழுப்பு சேர்வதை தடுக்கும். இதிலுள்ள வைட்டமின் கே எலும்புகளின் அடர்த்தி காக்க உதவும்.

முட்டைக்கோஸில் உள்ள பாலிஃபீனால் மற்றும் சல்பர் சத்து கலவை உடலின் உள்ளே ஏற்படும் அழற்சியை குறைக்கும், செல்கள் அழிவை தடுக்கும். இதனால் இதயத்தின் ஆரோக்கியம் மேம்படும்; இரத்த சர்க்கரை அளவு கட்டுப்படும்; வேலை செய்யும் நேரத்தில் ஏற்படும் மறதிகள் குறையும் என்கிறார்கள்.

முட்டைக்கோஸில் உள்ள பெரும்பாலான நார்ச்சத்து கரையாத நார்ச்சத்து ஆகும். இது உங்கள் மலத்திற்கு அடர்த்தியைச் சேர்ப்பதோடு, குடல் இயக்கங்களைத் தூண்டி, உங்கள் குடல் இயக்கத்தை சீராக வைத்திருக்க உதவுகிறது. மேலும், இது உங்கள் வயிற்றில் இடத்தை எடுத்துக்கொள்வதால், உங்களை நீண்ட நேரம் வயிறு நிறைந்ததாக உணர வைக்கிறது.

முட்டைக்கோஸில் சிறிதளவு கரையக்கூடிய நார்ச்சத்தும் உள்ளது. இது குடலுக்குள் திரவத்துடன் கலந்து, கூழ் போன்ற ஒரு பொருளை உருவாக்குகிறது. இது கொழுப்பைக் குறைக்கவும், இரத்தச் சர்க்கரை அளவைக் கட்டுப்படுத்தவும், வயிறு நிறைந்த திருப்தியை உணரவும் உதவும்.

மேலும், முட்டைக்கோஸில் உள்ள சில நார்ச்சத்துக்கள் ப்ரீபயாடிக் எனக் கருதப்படுகின்றன. அதாவது, அவை நன்மை தரும் குடல் பாக்டீரியாக்களுக்கு உணவளித்து, அவை செழித்து பெருக உதவுகின்றன. நல்ல செரிமானத்தை ஆதரிக்கும். நோய் எதிர்ப்புச் சக்தியை மேம்படுத்தும் மற்றும் கனிம உறிஞ்சுதலைச் சீராக்கும்.

இது உடலுக்கு நீர்ச்சத்தையும் அளிக்கிறது. முட்டைக்கோஸில் இயற்கையாகவே அதிக நீர்ச்சத்தும், குறைந்த சோடியம், கொழுப்பு மற்றும் கலோரிகளும் உள்ளன. எனவே, சாலடுகள், சூப்கள், குழம்புகளின் அளவை அதிகரிக்க இதைச் சேர்ப்பது ஒரு சிறந்த உணவாகும்.

வதக்குதல், வேகவைத்தல் மற்றும் சூப் தயாரித்தல் மூலமாக முட்டைக்கோஸை எளிதாக உட்கொள்ளலாம். முட்டைக்கோஸ் சமைக்கும் போது அதிக நேரம் வேகவைக்க கூடாது. இதனால் அதிலுள்ள சத்துக்கள் கரைந்து விடும்.

5 முதல் 7 நிமிடங்கள் வதக்கவும் மற்றும் பொரிக்கவும் செய்தாலே அதிலுள்ள வைட்டமின் சி மற்றும் ஃபோலேட், குளூக்கோஸ் சத்துக்கள் அப்படியே இருக்கும். முட்டைக்கோஸ் சமைக்கும் போது தண்ணீர் இல்லாமல் அல்லது குறைந்த தண்ணீர் சேர்த்து சமைக்க வேண்டும் என்கிறார்கள்.

முட்டைக்கோஸ் சத்தான உணவு தான். ஆனால், தைராய்டு பாதிப்பு உள்ளவர்கள் அளவாக சாப்பிட்டு வருவது நல்லது அதுவும் அயோடின் உப்பு சேர்த்து சமைத்து சாப்பிட்டு வர வேண்டும். ஆன்டிகோகுலண்ட் (Anticoagulant) இரத்த உறைவுத் தடுப்பு மருந்து எடுத்து கொள்பவர்கள் முட்டைக்கோஸ் சாப்பிவதை தவிர்க்க வேண்டும். எரிச்சல் கொண்ட குடல் நோய்க்குறி (Irritable Bowel Syndrome ) மற்றும் சிறுநீரகக்கல் பாதிப்புள்ளவர்கள் அளவாக அல்லது முற்றிலும் தவிர்க்கலாம் என்கிறார்கள்.

எளிய முறையில் கிடைக்கக்கூடிய முட்டைக்கோஸை உங்கள் தினசரி உணவில் சரியாகச் சேர்ப்பதன் மூலம், உடல் எடையைக் கட்டுக்குள் வைத்து, செரிமான மண்டலத்தை மேம்படுத்தி, நீண்ட நாள் ஆரோக்கியத்துடன் இளமையாகவும் வாழலாம்.

Reference