38 ஆண்டுகள் பழமையான பெட்ரோல் பங்க் மூடும் நாளில் குவிந்த மக்கள்; கிலோமீட்டர் நீள வரிசை!

38 ஆண்டுகாலப்  பெட்ரோல் பங்க்கின் வித்தியாசமான பிரியாவிடை – நீண்ட வரிசைகள், போக்குவரத்து நெரிசல், மக்களின் உற்சாகம்!

நெதர்லாந்தின் கெல்டர்லாந்து மாகாணத்தில் உள்ள வூர்ஸ்ட் என்ற சிறிய கிராமத்தில், ஒரு பெட்ரோல் நிலையம் 38 ஆண்டுகளாக செயல்பட்டு வந்தது. அது நிரந்தரமாக மூடப்படும் சூழ்நிலையில் தனது கடைசி நாளில் நடத்திய அதிரடி விலைச் சலுகை பெரும் பரபரப்பை ஏற்படுத்தியது.

அங்கே அக்டோபர் 24, 2026 அன்று, மாலை 4 மணி முதல் 5 மணி வரை பெட்ரோலும் டீசலும் லிட்டருக்கு வெறும் ஒரு யூரோவுக்கு விற்பனை செய்யப்பட்டன.

வூர்ஸ்ட் கிராமத்தில் அமைந்திருந்த இந்த நிலையத்தை டி க்ரூன் குடும்பம் நடத்தி வந்தது. பல ஆண்டுகளாக உள்ளூர் மக்களுக்குச் சேவை செய்த இந்தத் தொழிலை நிறுத்திக் கொள்ள வேண்டிய சூழ்நிலை அவர்களுக்கு ஏற்பட்டது.

காரணம், இப்போது அந்த பெட்ரோல் பங்க் செயல்பட்டு வரும் இடத்தை ஒரு பெரிய ரியல் எஸ்டேட் நிறுவனம் வாங்கி, அங்கே வீடுகள் உள்ளிட்ட புதிய வளர்ச்சித் திட்டங்களை உருவாக்கத் திட்டமிடப்பட்டுள்ளது.

கடைசி நாளில் காலை 8 மணி முதலே வாடிக்கையாளர்களுக்குச் சலுகைகள் வழங்கப்பட்டன. ஆனால் அனைவரும் ஆவலுடன் எதிர்பார்த்த முக்கிய அறிவிப்பு மாலை 4 மணி முதல் 5 மணி வரையிலான ஒரு மணி நேரச் சலுகைதான்.

அந்த நேரத்தில் பெட்ரோலும் டீசலும் லிட்டருக்கு €1 என்ற விலையில் விற்கப்பட்டன. அதற்கு முன்பு பெட்ரோல் லிட்டருக்கு சுமார் €2.139, டீசல் €2.269 என்ற விலையில் விற்கப்பட்டது குறிப்பிடத்தக்கது.

ஆனால் சில கட்டுப்பாடுகளும் இருந்தன. ஒரு வாகனத்துக்கு அதிகபட்சம் 100 லிட்டர் மட்டுமே விற்பனை செய்யப்படும். தனியாகக் கொண்டுவரப்படும் எரிபொருள் கேன்களில் பெட்ரோல் அல்லது டீசல் நிரப்ப அனுமதி இல்லை. மாலை 5 மணிக்கு நிலையம் மூடப்படும்; அதற்குப் பிறகு சலுகை கிடையாது.

சலுகை மாலை 4 மணிக்குத் தொடங்கினாலும், சில வாகன ஓட்டிகள் பிற்பகல் 1.30 மணிக்கே வரிசையில் காத்திருக்கத் தொடங்கிவிட்டனர். நேரம் நெருங்க நெருங்க, வாகனங்கள் கிராமத்தின் நீளத்துக்கு வரிசையாக நின்றன. எதிர்ப்புறத்தில் இருந்த மற்றொரு தானியங்கி பெட்ரோல் நிலையத்தின் வளாகத்திலும் கார்கள் நிரம்பின. வெகு தொலைவில் இருந்தும் இந்தச் சலுகை மூலம் பயன் பெற பலர் வந்திருந்தார்கள்.

நிலையத்தின் கடைசி நாள் எரிபொருள் விற்பனையுடன் மட்டும் முடிவடையவில்லை. குறைந்தது 20 லிட்டர் எரிபொருள் வாங்கியவர்களுக்கு இலவசக் கார் வாஷ் வழங்கப்பட்டது. மேலும், அதிர்ஷ்டச் சக்கரத்தைச் சுழற்றி இலவசமாக எரிபொருள் நிரப்பும் வாய்ப்பையும் வாடிக்கையாளர்கள் பெற்றனர். குழந்தைகளுக்காக ஐஸ்கிரீம் மற்றும் விளையாடுவதற்கான பந்து நிரம்பிய சிறிய விளையாட்டுப் பகுதியும் ஏற்பாடு செய்யப்பட்டிருந்தது. ஆக மொத்த்ம் ஒரு கோலாகலமான மூடுவிழா!

டி க்ரூன் குடும்பத்தினர் வேறு ஒரு இடத்தில் பெட்ரோல் பங்க்க் திறப்பதற்கான முயற்சியில் ஈடுபட்டுள்ளனர்.