வண்ண உளவியல் (Colour Psychology) என்பது  வண்ணங்கள், மனித நடத்தை மற்றும் மனநிலையை  எவ்வாறு பாதிக்கின்றன என்பதைப் பற்றிய ஆய்வு. நாம் வாங்கும் உடைகள், வீட்டு உபயோகப் பொருட்கள், வாகனம், வீட்டிற்கு அடிக்கும் பெயின்ட் முதலியவை நம் உணர்வுகள், எண்ணங்களைப் பிரதிபலிக்கின்றன. பொருட்களை வடிவமைக்கும் நிறுவனங்கள், தங்கள் தயாரிப்புகளை வாங்க வாடிக்கையாளர்களை ஊக்குவிக்கும் விதமான வண்ணங்களைத் தேர்வு செய்கின்றன. மேலும், அவற்றை சந்தைப்படுத்தும்போது விளம்பரங்களிலும் வண்ணங்களை கவனமாக தேர்வு செய்கின்றன. மேலும், பல்வேறு நோய்களுக்கு சிகிச்சையளிக்கவும் வண்ணங்கள் பயன்படுத்தப்படுகின்றன.

வண்ணங்களும், அவை மனிதர்களுக்கு ஏற்படுத்தும் தாக்கங்களும்:

சிவப்பு நிறம்: இது அன்பு, எச்சரிக்கை, ஆத்திரம், தைரியம், சக்தி, கட்டுப்பாடு, ஆபத்து மற்றும் வலிமையுடன் தொடர்புடையது. ட்ராஃபிக் விளக்குகளில் சிவப்பு நிறத்தில் வாகனம் ஓட்டுபவர்கள் எச்சரிக்கையாக இருக்கவும், நிறுத்தவும், என்பதைக் குறிக்கின்றன. சிவப்பு நிறம் உணர்ச்சியைக் குறிக்கிறது. இந்த நிற உடைகளை விரும்பி அணிவோர் போராட்டம், சண்டை மற்றும் போராட்டக் குணம் கொண்டிருப்பார்கள்.

நீல நிறம்: இது அமைதி, நம்பிக்கை, குளிர்ச்சி, பாதுகாப்பு, சோகம் போன்ற உணர்வுகளைத் தூண்டக்கூடியது. இது தர்க்கம், தகவல் தொடர்பு மற்றும் புத்திசாலித்தனத்தின் சின்னமாகும். உலகளாவிய ஆராய்ச்சி ஆய்வுகளில் நீல நிறமானது மிகவும் பிரபலமான நிறமாகத் தேர்ந்தெடுக்கப்பட்டுள்ளது.

மஞ்சள் நிறம்: இது ஒரு பிரகாசமான நிறம். மகிழ்ச்சி, நட்பு, நம்பிக்கை மற்றும் படைப்பாற்றலின் நிறம். போக்குவரத்துச் சின்னங்கள், டாக்சிகள் மற்றும் பள்ளிப் பேருந்துகளில் பெரும்பாலும் கருப்பு நிறத்துடன் மஞ்சள் நிறமும் பயன்படுத்தப்படுவதால் இது நம் கவனத்தை ஈர்க்கிறது. மேலும். இது பயம், கோழைத்தனம் போன்ற உணர்வுகளைத் தூண்டுகிறது.

பச்சை நிறம்: இது பொதுவாக இயற்கையுடன் தொடர்புடையது. வளர்ச்சி, செழிப்பு, செல்வம், நல்ல அதிர்ஷ்டம், பாதுகாப்பு, ஆரோக்கியம், இரக்கம், லட்சியம் போன்றவற்றைக் குறிக்கிறது. இது இனிமையான நிறமாகவும், மன அழுத்தத்தை நீக்குவதாகவும் கருதப்படுகிறது. பச்சை நிறத்துடன் எதிர்மறையான தொடர்புகளில் பேராசை, பொறாமை, அக்கறையின்மை மற்றும் சோம்பல் ஆகியவை அடங்கும்.

ஆரஞ்சு நிறம்: இது அதிக ஆற்றல் கொண்ட சிவப்பு மற்றும் உணர்ச்சி ரீதியாக உற்சாகமான மஞ்சள் நிறத்தின் கலவையான குணங்களைக் குறிக்கிறது. ஆரஞ்சு அரவணைப்பு, உற்சாகம், ஆசை, பெருமை, தனிமை, ஞானம் மற்றும் ஊக்கத்துடன் தொடர்புடையது. இது மன செயல்பாடு மற்றும் புத்திசாலித்தனத்தை அதிகரிக்கும் என்று கருதப்படுகிறது.

ஊதா நிறம்:  இது ஆன்மிகம், புனிதம், அதிகாரம், கருணை, செல்வம், ஞானம், ஆணவம், பொறுமையின்மை ஆகியவற்றுடன் தொடர்புடையது. வெளிர் ஊதா நிறங்கள் காதல் மற்றும் மென்மையான தன்மையையும், அடர் ஊதா துக்கம், பயம் மற்றும் பயம் ஆகியவற்றைக் குறிக்கிறது.

இளஞ்சிவப்பு: ஒரு வேடிக்கையான நிறமாகவும், பெண்மையின் குறியீடாகவும் கருதப்படுகிறது. மகிழ்ச்சி, அன்பு, விளையாட்டுத்தனம், மன உறுதி இல்லாமை, அரவணைப்பு. நல்லிணக்கம் போன்றவற்றை பிரதிபலிக்கிறது.

கருப்பு நிறம்: கருப்பு என்பது மர்மம், பயம், மரணம்,  தீமை, அதிகாரம், அதிநவீனம், வெறுமை. தீவிரத்தன்மை, சுதந்திரம், சோகத்தைப் பிரதிபலிக்கிறது.

வெள்ளை நிறம்: கருப்புக்கு எதிரானது வெள்ளை நிறம். பரிபூரணம், தூய்மை, நன்மை, குளிர்ச்சி, மென்மையை இது குறிக்கிறது. இது பாதுகாப்பு, ஆன்மிகம் மற்றும் நம்பிக்கை போன்ற உணர்வுகளுடன்   தொடர்புடையது. மேலும், தனிமை, வெறுமையைக் குறிக்கிறது.

பெரும்பான்மை உடைகள் விளம்பரங்கள் மற்றும் உணவுப்பொருட்களை சிவப்பு, மஞ்சள் மற்றும் ஆரஞ்சு நிறங்களில் வடிவமைக்கக் காரணம் அவை  உற்சாகமான உணர்ச்சிகளைத் தூண்டுவதால் தான். மருத்துவமனைகளில் படுக்கை, நோயாளிகள், சர்ஜன்களின் உடைகள், நீலம், ஊதா மற்றும் பச்சை நிறங்களில் வடிவமைக்கக் காரணம்  அவை குளிர்ச்சி மற்றும் அமைதியுடன் தொடர்புடையவை என்பதால்தான்.